Tiktok రాత్రి 7 దాటితే పనిచేయెద్దు.. ఉద్యోగులకు టిక్‌టాక్ బంపరాఫర్!

టిక్‌టాక్‌ సంస్థ మాతృ సంస్థ బైట్‌డ్యాన్స్‌ లిమిటెడ్‌ (Byte dance)తన సంస్థలో పనిచేసే ఉద్యోగుల విధుల విషయంలో కీలక నిర్ణయం తీసుకుంది. తమ సంస్థలోని ఉద్యోగులకు రాత్రి 7 గంటలతో షిఫ్టులు ముగుస్తాయని తెలిపింది. సోమవారం నుంచి శుక్రవారం వరకే పనిరోజులు ఉంటాయని, రాత్రి 7 గంటలు దాటిన తరువాత పని చేయాల్సిన అవసరం లేదని పేర్కొంది. ఒక వేళ పనిచేయాల్సిన సందర్భం వస్తే కంపెనీ అనుమతి తీసుకోవాలని, ఇదంతా ఉద్యోగుల సంక్షేమార్థం తీసుకొచ్చిన కొత్త విధానమి బైట్‌ డ్యాన్స్‌ ప్రకటించింది. ఉదయం 10 గంటల నుంచి రాత్రి 7 గంటల వరకే షిఫ్టు ఉంటుందని, అదనంగా పనిచేయాల్సి వస్తే కనీసం ఒక్క రోజు ముందు అనుమతి తీసుకోవాలని స్పష్టం చేసింది. సాధారణంగా చైనాలో ‘996’ వర్క్‌ కల్చర్‌ ( అంటే వారంలోని 6 రోజుల పాటు ఉదయం 9 నుంచి రాత్రి 9 గంటలకు వరకూ) ఉంటుంది. ఉద్యోగులు 12 గంటల పాటు పనిచేయడం వల్ల ఒత్తిడికి గురికావడం, విశ్రాంతి లేకపోవడం, మానసిక సమస్యలు కారణంగా చాలా మంది ఆత్మహత్య చేసుకున్న ఘటనలు చోటుచేసుకున్నాయి. దీంతో సోషల్‌ మీడియాలో ఒక్కసారిగా టెక్ సంస్థల తీరుపై విమర్శలు వెల్లువెత్తాయి. అలాగే, ఈ ఏడాది ఆగస్టులో చైనా సుప్రీం పీపుల్స్‌ కోర్టు ‘996’ చట్టవిరుద్ధమని తీర్పు వెలువరించింది. ఈ నేపథ్యంలో టిక్‌టాక్‌ సంస్థ తీసుకున్న నిర్ణయం పట్ల అక్కడ ఉద్యోగులు సర్వత్రా హర్షం వ్యక్తం చేస్తున్నారు. కాగా, ఓ ఆన్‌లైన్‌ నివేదిక ప్రకారం.. ఉద్యోగులతో ఓవర్‌టైమ్ చేయించడం, ఇతర ఉల్లంఘనలకు దూరంగా ఉండాలని కంపెనీలకు చైనా ప్రభుత్వం హెచ్చరించింది. ఇదే అంశంపై అధ్యక్షుడు జీ జిన్‌పింగ్ మాట్లాడుతూ.. దేశం ఉమ్మడి శ్రేయస్సు కోసం పని చేయాలని కంపెనీలు, అధికారులకు పిలుపునిచ్చారు. బ్లూమ్‌బెర్గ్ నివేదిక ప్రకారం.. చైనాలో పని విధానానికి సంబంధించి కొత్త పాలసీని తీసుకొచ్చారు. దాని ప్రకారం ఉద్యోగులు.. ఓవర్‌టైమ్‌ డ్యూటీ చేయాలన్నా కొన్ని షరతులు ఉన్నాయి. వారంలో మూడు గంటల కంటే ఎక్కువ (లేదా) వారాంతంలో 8 గంటల పాటు ఓవర్‌టైమ్ కోసం దరఖాస్తు చేసుకోవాలి. ఇందుకు వారు తీసుకునే సాధారణ జీతం కంటే మూడు రెట్ల అదనంగా వేతనం పొందుతారు. ఉద్యోగుల సంక్షేమాన్ని మెరుగుపరచడానికి బైట్‌డాన్స్ చేస్తున్న ప్రయత్నంలో భాగమే కొత్త విధానం. ఈ ఏడాది ఆరంభంలో సోషల్ మీడియా దిగ్గజం, ప్రత్యర్థి కౌశాయ్ టెక్నాలజీతో పాటు ఉద్యోగులు ప్రతి రెండు వారాలకు వారానికి ఒక రోజు సెలవు తీసుకునే ప్రత్యామ్నాయ వ్యవస్థను రద్దు చేసింది. గత నెలలో బైట్‌డాన్స్‌ సహా కొంతమంది ప్రైవేట్ సంస్థల ఉద్యోగులు అధిక పని సంస్కృతికి వ్యతిరేకంగా తమ పని గంటలను తగ్గించాలని ఆందోళన నిర్వహించారు.

By November 02, 2021 at 08:03AM

Read More https://telugu.samayam.com/latest-news/international-news/tiktok-owner-bytedance-shortens-china-work-hours-only-9-hours-per-day/articleshow/87477054.cms