ఏపీలో టిక్కెట్‌ రేట్స్‌పై కోర్టు కెళ్లబోతున్నారంటూ వస్తున్న వార్తలపై స్పందించిన RRR నిర్మాత... దానయ్య ఏమన్నారంటే?

కోవిడ్ సెకండ్ వేవ్ తర్వాత స్టార్ హీరోలు తమ సినిమాలను థియేటర్స్‌లో విడుద‌ల చేయ‌డానికి రెడీ అయిపోయారు. విడుద‌ల తేదీల‌ను కూడా అనౌన్స్ చేసేసుకున్నారు. అంతా బాగానే ఉంది. అయితే, నిర్మాత‌ల‌ను, డిస్ట్రిబ్యూట‌ర్స్‌, ఎగ్జిబిట‌ర్స్‌ను వేధిస్తున్న ప్ర‌ధాన‌మైన స‌మ‌స్య ఆంధ్ర‌ప్ర‌దేశ్ థియేట‌ర్స్‌లోని టిక్కెట్ రేట్స్‌. ఏప్రిల్ నుంచి ఏపీ ప్ర‌భుత్వం థియేట‌ర్స్ టిక్కెట్ రేట్స్‌ను త‌గ్గించి, అందుకు సంబంధించిన జీవోను జారీ చేసింది. టిక్కెట్ రేట్స్‌ను ఏమైనా పెంచాల‌ని, పెరిగిన బ‌డ్జెట్స్‌తో పాటు కోవిడ్ కార‌ణంగా సినీ ఇండ‌స్ట్రీ న‌ష్టాల్లో కూరుకుంద‌ని, సినీ పెద్ద‌లు, డిస్ట్రిబ్యూట‌ర్స్, ఎగ్జిబిట‌ర్స్, నిర్మాత‌లు ప‌లు సంద‌ర్భాల్లో దీనిపై ప్ర‌భుత్వ పెద్ద‌ల‌తో చ‌ర్చ‌లు జ‌రిపారు. అయితే ఆంధ్ర ప్ర‌దేశ్ ప్ర‌భుత్వం దీనిపై నోరు మొద‌ప‌డం లేదు. ఈ క్ర‌మంలో పాన్ ఇండియా మోస్ట్ ప్రెస్టీజియ‌స్ సినిమా జ‌న‌వ‌రి 7న విడుద‌ల‌వుతుంది. భారీ బ‌డ్జెట్‌తో తెర‌కెక్కుతోన్న ఈ సినిమా నిర్మాత దాన‌య్య అండ్ టీమ్‌ ఏపీలోని టికెట్ రేట్స్ పెంచాలంటూ కోర్టుకు వెళ్లబోతున్నార‌ని వార్త‌లు వినిపించాయి. దీనిపై దాన‌య్య త‌న ట్వ‌ట్ట‌ర్ ద్వారా వివ‌ర‌ణ ఇచ్చుకున్నారు. ‘‘పెరిగిన టిక్కెట్ ధరల కారణంగా మా సినిమాపై ప్రభావం ఉంటుందనే మాట వాస్తవం. కానీ మా RRR టీమ్ ఈ విష‌యంలో కోర్టుకు వెళ్లబోతుందంటూ వార్త‌లు రావ‌డంలో నిజం లేదు. అయితే మేం ఏపీ ముఖ్యమంత్రి వై.ఎస్‌.జ‌గ‌న్‌ను క‌లిసి ప‌రిస్థితిని వివ‌రిస్తాం. త‌గు ప‌రిష్కారాన్ని అడుగుతాం’’ అంటూ దానయ్య తన డివివి ఎంటర్టైన్మెంట్ ట్విట్టర్‌లో ట్వీట్ చేసి RRR టీమ్‌, ఏపీ ప్రభుత్వంపై కోర్టుకు వెళ్ల‌బోతుంద‌నే వార్త‌ల‌కు ఫుల్‌స్టాప్ పెట్టారు. నిర్మాత దాన‌య్య RRR చిత్రాన్ని దాదాపు నాలుగు వంద‌ల కోట్ల రూపాయ‌ల బ‌డ్జెట్‌తో నిర్మించారు. ఎప్పుడో 2020లోనే విడుద‌ల కావాల్సిన ఈ సినిమా కోవిడ్ రెండు వేవ్స్ కార‌ణంగా వాయిదా ప‌డుతూ వ‌చ్చింది. చివ‌ర‌కు వ‌చ్చే ఏడాది సంక్రాంతి సందర్భంగా జ‌న‌వ‌రి 7న విడుద‌ల కాబోతుంది. ఈ నేప‌థ్యంలో సినిమాపై భారీ అంచనాలు నెల‌కొన్నాయి. సినిమాపై ఉన్న అంచనాల‌కు ధీటుగానే రాజ‌మౌళి అండ్ టీమ్ సినిమాను భారీగా ప్ర‌మోట్ చేసుకుంటున్నారు. గోండు వీరుడు కొమురం భీమ్‌గా యంగ్ టైగ‌ర్ ఎన్టీఆర్‌.. మ‌న్యంవీరుడు అల్లూరి సీతారామ‌రాజుగా మెగాప‌వ‌ర్‌స్టార్ రామ్‌చ‌ర‌ణ్ ఈ సినిమాలో క‌నిపించ‌బోతున్నారు. అలాగే ఆలియా భ‌ట్‌, అజ‌య్ దేవ‌గ‌ణ్ వంటి బాలీవుడ్ స్టార్స్‌.. అలిసన్ డూడి, ఒలివియా మోరిస్‌, రే స్టీవెన్ స‌న్ వంటి హాలీవుడ్ స్టార్స్ కూడా ఈ సినిమాలో క‌నిపించ‌బోతున్నారు.

By November 14, 2021 at 11:11AM

Read More https://telugu.samayam.com/telugu-movies/cinema-news/producer-dvv-danayya-clarity-about-rumours-on-rrr-movie/articleshow/87695241.cms