Pentagon భారత్ భూాభాగంలో గ్రామాన్ని సృష్టించిన చైనా.. అమెరికా నివేదికలో సంచలన విషయాలు
చైనా సైనిక కార్యకలాపాలపై అమెరికా రక్షణ శాఖ విడుదల చేసిన వార్షిక నివేదికలో ఆసక్తికర విషయాలను వెల్లడించింది. భారత్‌తో సరిహద్దుల్లో ఉద్రిక్తతలు కొనసాగుతున్న తరుణంలో పెంటగాన్ నివేదికకు ప్రాధాన్యత ఏర్పడింది. అరుణాచల్ ప్రదేశ్‌లో కొత్తగా ఓ గ్రామాన్ని చైనా సృష్టించిన విషయాన్ని అమెరికా తన నివేదికలో పేర్కొంది. 100 నివాసాలను ఈ గ్రామాన్ని ఏర్పాటుచేసినట్టు కాంగ్రెస్‌కు సమర్పించిన నివేదికలో వివరించింది. భారత భూ భాగంగా పేర్కొంటున్న ప్రాంతంలోనే డ్రాగన్ ఈ నిర్మాణం చేపట్టింది. ‘2020లో PRC (పీపుల్స్ రిపబ్లిక్ ఆఫ్ చైనా) ఎల్ఏసీ తూర్పు సెక్టార్‌లో బెట్ అటానమస్ రీజియన్, భారతదేశంలోని అరుణాచల్ ప్రదేశ్ రాష్ట్రం మధ్య వివాదాస్పద భూభాగంలో 100 ఇళ్లతో ఓ గ్రామాన్ని నిర్మించింది’ అని నివేదిక పేర్కొంది. 1962 యుద్ధానికి ముందు భారత్, చైనా సైనికుల మధ్య ఘర్షణలు జరిగిన ఎగువ సుబాన్సిరీ జిల్లాలోని సరీ చౌ నదీతీరంలో ఈ గ్రామాన్ని సృష్టించింది. ‘దీంతో పాటు చైనా ఇతర మౌలిక సదుపాయాల అభివృద్ధి ప్రయత్నాలు భారత ప్రభుత్వం, మీడియా వర్గాలు దిగ్భ్రాంతి వ్యక్తం చేశాయి’ అని వ్యాఖ్యానించింది. ఇదిలా ఉండగా, ఈ ప్రాంతంలో చైనా దశాబ్దానికిపైగా చిన్న సైనిక ఔట్‌పోస్ట్‌ను కొనసాగించింది. అయితే, 2010 నుంచి పరిస్థితిలో వేగంగా మార్పు చోటుచేసుకుంది. భారత్ భూభాగంలోకి చొచ్చుకొచ్చి రహదారి నిర్మాణాలు, గ్రామాన్ని ఏర్పాటుచేస్తోంది. ‘సరిహద్దు ఉద్రిక్తతలను తగ్గించడానికి దౌత్య, సైనిక సంభాషణలు, చర్చలు కొనసాగుతున్నప్పటికీ ఎల్ఏసీ వద్ద PRC వ్యూహాత్మక చర్యలను కొనసాగిస్తోంది’ అని పెంటగాన్ నివేదిక పేర్కొంది. పశ్చిమ హిమాలయాల్లోని మారుమూల ప్రాంతాల్లో చైనా పీపుల్స్ లిబరేషన్ ఆర్మీ ఫైబర్ ఆప్టిక్ నెట్‌వర్క్ వ్యవస్థను ఏర్పాటుచేస్తోందని అమెరికా రక్షణ సంస్థ పెంటగాన్ సంచలన నివేదికను బయటపెట్టింది. ‘పీపుల్స్ రిపబ్లిక్ ఆఫ్ చైనాలో సైనిక, భద్రతా అభివృద్ధి 2021’ పేరుతో పెంటగాన్ నివేదిక వెల్లడించింది. ‘భారత్‌తో సరిహద్దు వెంబడి తీవ్ర ఉద్రిక్తతలు, ఘర్షణల ఫలితంగా వాస్తవాధీన రేఖ వెంబడి బలగాల నిర్మాణం, మోహరింపు అమలుకు దారితీసింది’ అని పేర్కొంది.
By November 05, 2021 at 09:08AM
No comments