Pegasus Row అమెరికా బ్లాక్‌లిస్ట్‌లో ఎన్‌ఎస్ఓ.. సంబంధం లేదంటూ చేతులు దులిపేసుకున్న ఇజ్రాయేల్!
పెగాసస్ స్పైవేర్‌‌తో ఫోన్ హ్యాకింగ్ దుర్వినియోగానికి పాల్పడినట్టు ఆరోపణలు రావడంతో సంస్థ ఎన్‌ఎస్ఓ ()ను అమెరికా బ్లాక్‌లిస్ట్‌లో పెట్టిన విషయం తెలిసిందే. ఈ నేపథ్యంలో ఇజ్రాయెల్ విదేశాంగ మంత్రి యైర్ లాపిడ్ సంచలన వ్యాఖ్యలు చేశారు. ఆ సంస్థతో మాకు ఎటువంటి సంబంధం లేదని పేర్కొన్నారు. పెగాసస్ సాఫ్ట్‌వేర్ అనేక దేశాల్లోని జర్నలిస్టులు, మానవ హక్కుల కార్యకర్తలు, ప్రభుత్వ అధికారుల ఫోన్‌లను లక్ష్యంగా చేసుకున్నట్టు జులైలో 17 మీడియా సంస్థల పరిశోధన నివేదికలు వెల్లడించాయి. కంపెనీ తన ఉత్పత్తులను ఇజ్రాయెల్ రక్షణ మంత్రిత్వ శాఖ నుంచి లైసెన్సుల అనుమతి తీసుకుని విదేశాలకు పంపుతుంది. ఈ సాఫ్ట్‌వేర్ దుర్వినియోగంపై ఆరోపణలు రావడంతో తర్వాత కంపెనీ స్వంత విచారణను ప్రారంభించింది. కాగా, ఇప్పటి వరకూ NSO ఎగుమతుల పరిధిని పరిమితం చేయడాన్ని పరిశీలిస్తున్నట్లు ఇజ్రాయెల్ ఎటువంటి సంకేతాలు వెలువరించలేదు. అయితే, ఇజ్రాయేల్ మంత్రి చేసిన వ్యాఖ్యలకు ప్రాధాన్యత ఏర్పడింది. ‘NSO అనేది ఒక ప్రైవేట్ కంపెనీ.. ఇది ప్రభుత్వ ప్రాజెక్ట్ కాదు.. కాబట్టి ఇజ్రాయెల్ ప్రభుత్వ విధానాలతో దీనికి ఎటువంటి సంబంధం లేదు’ అని లాపిడ్ జెరూసలెంలో మీడియాతో మాట్లాడుతూ ఈ వ్యాఖ్యలు చేశారు. ‘విరుద్ధంగా ఉందని నేను అనుకోను.. సైబర్ వార్‌ఫేర్ ప్రకారం కఠినమైన నిబంధనలను కలిగి ఉన్న ప్రపంచంలోని మరొక దేశం.. ఇజ్రాయెల్ కంటే ఎక్కువగా ఆ నిబంధనలను విధిస్తోంది.. మేము దానిని కొనసాగిస్తాం’ అని అన్నారు. ఎన్‌ఎస్ఓను అమెరికా వాణిజ్య విభాగం బుధవారం బ్లాక్‌లిస్ట్‌లో పెట్టిన తర్వాత ఇజ్రాయేల్ సీనియర్ మంత్రి తొలిసారి స్పందించారు. NSO గ్రూప్ నిరంకుశ పాలకులకు హ్యాకింగ్ సాధనాలను విక్రయిస్తోందని ఆరోపణలు వెల్లువెత్తాయి. అయితే, తమ ఉత్పత్తులను చట్ట అమలు, గూఢచార సంస్థలకు మాత్రమే విక్రయిస్తామని, దుర్వినియోగాన్ని అరికట్టడానికి చర్యలు తీసుకుంటామని ఎన్‌ఎస్ఓ వెల్లడించింది. జాతీయ భద్రత లేదా విదేశాంగ విధాన ప్రయోజనాలకు విరుద్ధమైన కార్యకలాపాలకు పాల్పడ్డారని అమెరికా ఆరోపిస్తూ నిషేధం విధించింది. కాగా, అమెరికా నిర్ణయంతో నిరాశ చెందామని ఎన్‌ఎస్ఓ తెలిపింది. నేరాలు, ఉగ్రవాదంపై పోరాడటానికి సహాయపడే చట్టబద్ధమైన సాధనాలను దుర్వినియోగం చేసిన ప్రభుత్వ సంస్థలతో ఒప్పందాలను ముగించినట్లు తెలిపింది.
By November 07, 2021 at 12:27PM
No comments