NCB సమీర్ వాంఖడేపై మరో బాంబు పేల్చిన మంత్రి.. ఈసారి ఆధారాలతో సహా!
ఎన్‌సీబీ జోనల్ డైరెక్టర్ సమీర్ వాంఖడేపై నవాబ్ మాలిక్ ఆరోపణలు పరంపర కొనసాగుతోంది. నౌకలో ఏర్పాటుచేసిన పార్టీ పేరుతో ఆర్యన్ ఖాన్‌ను కిడ్నాప్‌ చేయడానికి ప్రయత్నించారని, ఇందుకు సూత్రధారి సమీర్ వాంఖడేనే ఆదివారం ఆరోపించిన విషయం తెలిసిందే. తాజాగా, ఓ అడుగు ముందుకేసి మాలిక్ మరిన్ని ఆరోపణలు చేశారు. వాంఖడే మరదలు హర్షదా దీనానత్‌ రేడ్కర్‌కు డ్రగ్స్ వ్యాపారాలతో సంబంధముందన్న ఆయన.. దీనిపై ఎన్‌సీబీ అధికారి సమాధానం చెప్పాలని డిమాండ్‌ చేశారు. మాదకద్రవ్యాల అక్రమ రవాణా నియంత్రణ చట్టం కింద 2008లో నమోదైన కేసులో వాంఖడే భార్య క్రాంతీ రేడ్కర్‌ సోదరి హర్షదా పేరు కూడా ఉంది. ఈ కేసును ఆధారంగా చేసుకుని తాజాగా నవాబ్ మాలిక్ సమీర్‌పై ఆరోపణలు చేశారు. ‘‘సమీర్ దావూద్‌ వాంఖడే.. మీ మరదలు హర్షదా దీనానత్‌ రేడ్కర్‌ డ్రగ్స్ వ్యాపారం చేశారా? దీనికి మీరు తప్పనిసరిగా సమాధానం చెప్పాలి.. ఎందుకంటే ఆమె కేసు పుణే కోర్టులో పెండింగ్‌లో ఉంది.. అధారాలు ఇదిగో’’ అని మాలిక్ ట్వీట్ చేశారు. ఈ కేసుకు సంబంధించిన వివరాలను షేర్ చేశారు. అయితే, ఈ ఆరోపణలను సమీర్ వాంఖడే ఖండించారు. 2008 నాటికి తాను ఇంకా సర్వీసులోకే రాలేదని, క్రాంతి రేడ్కర్‌‌తో 2017లో తనకు వివాహమయ్యిందని తెలిపారు. అందువల్ల మంత్రి ఆరోపిస్తోన్న కేసుతో తనకు ఎలాంటి సంబంధం లేదని చెప్పుకొచ్చారు.ఇదిలా ఉండగా.. నవాబ్ మాలిక్‌పై వాంఖడే తండ్రి ధ్యాన్‌దేవ్‌ వాంఖడే బాంబే హైకోర్టులో రూ.1.25 కోట్లకు పరువు నష్టం దావా వేశారు. తమ మత విశ్వాసాలను అవమానిస్తూ మాలిక్ ఆరోపణలు చేస్తున్నారని, దీని వల్ల తమ కుటుంబ గౌరవ, మర్యాదలకు భంగం వాటిల్లిందని ధ్యాన్‌దేవ్‌ పేర్కొన్నారు. మంత్రిపై చర్యలు తీసుకోవాలని న్యాయస్థానాన్ని కోరారు. షారుక్ ఖాన్ కుమారుడు ఆర్యన్ ఖాన్ డ్రగ్స్ కేసు నుంచి సమీర్ వాంఖడేను ఎన్‌సీబీ తప్పించిన విషయం తెలిసిందే. అవినీతి ఆరోపణలు రావడంతోనే సమీర్ వాంఖడేను తప్పించినట్టు సమాచారం. ఆర్యన్ సహా మరో ఆరు కేసుల నుంచి ఆయనను తప్పించారు. ఈ మొత్తం కేసుల విచారణను సీనియర్ పోలీస్ అధికారి సంజయ్ సింగ్ నేతృత్వంలో ప్రత్యేక దర్యాప్తు బృందం (సిట్) చేపట్టింది. వీటిలో మహారాష్ట్ర మంత్రి అల్లుడి డ్రగ్స్ కేసు కూడా ఉంది.
By November 08, 2021 at 01:21PM
No comments