Kabul అమెరికా సైన్యానికి అప్పగించిన అఫ్గన్ చిన్నారి మిస్సింగ్.. ఆ పాప ఎక్కడ?
ఆగస్టులో ఆక్రమించుకోవడంతో పెద్ద ఎత్తున అఫ్గన్ ప్రజలు దేశం విడిచి వెళ్లేందుకు కాబూల్ విమానాశ్రయానికి పోటెత్తిన విషయం తెలిసిందే. ఈ సందర్భంగా పలువురు తమ ప్రాణాలను కూడా లెక్కచేయకుండా విమానం రెక్కలపై కూడా ఎక్కి ప్రయాణించేందుకు ప్రయత్నించారు. ఒక్కసారిగా విమానాశ్రయానికి జన ప్రవాహం పోటెత్తడంతో వారిని అదుపు చేయడానికి తీవ్రంగా శ్రమించాల్సి వచ్చింది. ఇదే సమయంలో అమెరికా సైనికులు పలువురు చిన్నారులను ఆక్కున చేర్చుకుని మానవత్వాన్ని చాటుకున్నారు. శరణార్ధుల తరలింపు సందర్భంగా అమెరికా సైనికులకు అప్పగించిన ఓ రెండు నెలల వయసున్న చిన్నారి ఆచూకీ ఇప్పటికీ లభించలేదు. దీంతో ఆ పాప తల్లిదండ్రులు తమ బిడ్డ కోసం ఆశగా ఎదురుచూస్తున్నారు. కాబూల్‌లోని అమెరికా రాయబార కార్యాలయం వద్ద పదేళ్లు సెక్యూరిటీ గార్డుగా పనిచేసిన మిర్జా అలీ (35), తన భార్య సూరయా (32), అతడి ఐదుగురు పిల్లలతో దేశం విడిచి వెళ్లేందుకు ఆగస్టు 19న కాబూల్ విమానాశ్రయానికి వచ్చారు. ఈ సమయంలో రద్దీ ఎక్కువగా ఉండటంతో తన రెండు నెలల పాప సోహైల్ గురించి ఆందోళన చెందారు. దీంతో పాపను అమెరికా సైనికుడికి అందజేసి, మిగతా నలుగురు పిల్లలను తీసుకుని అతికష్టంతో విమానాశ్రయంలోకి ప్రవేశించారు. అనంతరం సోహైల్ కోసం వెళ్లగా పాప కనిపించలేదు. విమానాశ్రయం శిశువుకు చాలా ప్రమాదకరమని, పిల్లల కోసం ప్రత్యేక ప్రాంతానికి తీసుకెళ్లి ఉండవచ్చని ఓ మిలటరీ కమాండర్ తనతో చెప్పారని ఆయన చెప్పారు. కానీ అక్కడికి వెళ్లేసరికి ఖాళీగా ఉందని, నా వెంట ఆయన కూడా వచ్చి వెతికారని మీర్జా తెలిపారు. తన బిడ్డ తప్పిపోయి రోజులు గడుస్తున్నా ఆచూకీ దొరకలేదని అలీ కన్నీటి పర్యంతమయ్యారు. తనకు ఎదురయ్యే సహాయక కార్యకర్త, యుఎస్ అధికారికి సోహైల్ గురించి చెబితే.. ప్రతి ఒక్కరూ హామీ ఇస్తున్నారని, అయితే అవి కేవలం వాగ్దానాలుగా మిగిలిపోయాయని అన్నారు. కాబూల్ నుంచి ఖతార్.. అక్కడ నుంచి జర్మనీ మీదుగా అమెరికా చేరుకున్న అలీ కుటుంబం.. ప్రస్తుతం టెక్సాస్‌లోని అఫ్గన్ శరణార్ధి శిభిరంలో గడుపుతోంది. అఫ్గన్ శరణార్థుల మద్దతు బృందం సోషల్ మీడియాలో దీనిపై క్యాంపెయిన్ ప్రారంభించింది. సొహైల్ ఫోటోతో ‘మిస్సింగ్ బేబీ’ గ్రూప్ సృష్టించి, ఎవరైనా గుర్తిస్తారనే ఆశతో దానిని వారి నెట్‌వర్క్‌లలో షేర్ చేస్తున్నారు. అమెరికా ప్రభుత్వ అధికారి ఒకరు మాట్లాడుతూ.. కాబూల్ విమానాశ్రయంలో గందరగోళం సమయంలో చిన్నారిని యుఎస్ సైనికుడికి అప్పగించడం చివరిసారిగా కనిపించింది. అయితే దురదృష్టవశాత్తూ పాపను ఎవరూ కనుగొనలేకపోయారు అని అధికారి తెలిపారు.
By November 06, 2021 at 11:52AM
No comments