భార్య ప్రేమకు దాసుడు.. తాజ్మహల్ పోలిన ఇళ్లు కట్టించి గిఫ్ట్ ఇచ్చిన అభినవ షాజహాన్!
తన ప్రేమకు చిహ్నంగా మొగల్ చక్రవర్తి షాజహాన్ భార్య ముంతాజ్ కోసం తాజ్‌మహల్‌ను కట్టించారు. తాజాగా, ఓ భర్త తన భార్య కోసం తాజ్‌మహల్‌ను పోలిన ఇంటిని కట్టించి కానుకగా ఇచ్చాడు. భర్త నుంచి ఊహించని ఆ కానుకను చూసి భార్య సంభ్రమాశ్చర్యాలకు గురయ్యింది. కేవలం ఆమె ఒక్కరే కాదు.. ఆ ఇంటిని చూసిన ప్రతి ఒక్కరు ఫిదా అవుతున్నారు. మధ్యప్రదేశ్‌లోని బుర్హాన్‌పూర్‌లో జరిగిన ఈ ఘటన ఇప్పుడు దేశవ్యాప్తంగా వైరల్ అవుతోంది. మొగల్ చక్రవర్తి షాజహాన్ భార్య ముంతాజ్ బుర్హాన్‌పూర్‌లోనే మరణించారు. దీంతో తొలుత తపతి నది ఒడ్డున తాజ్‌మహల్‌ను నిర్మించాలని అనుకున్నా.. చివరకు ఆగ్రాలో యమునా నది పక్కన నిర్మించారు. అదే గ్రామానికి చెందిన ఆనంద్ చోక్సీ ఇదే విషయాన్ని ఆలోచించాడు. తమ నగరంలో ఎందుకు షాజహాన్ తాజ్‌మహల్‌ను నిర్మించకపోవడానికి కారణం ఏంటి.. అప్పుడు ఆయన చేయని పని తానుచేస్తే ఎలా ఉంటుందని భావించాడు. దీంతో తాజ్మహల్ లాంటి ఇంటిని నిర్మించి తన భార్యకు కానుకగా ఇవ్వాలని నిర్ణయించుకున్నాడు. ఆలోచన వచ్చిందే తడవుగా ఇంజినీర్‌ను కలిసి విషయం వివరించాడు. అలా అతడి మదిలో మెదిలిన ఆలోచన కార్యరూపం దాల్చడానికి మూడేళ్లు పట్టింది. ఈ భవన నిర్మాణంలో పలు సవాళ్లు ఎదురైనట్టు పనిచేసిన ఇంజినీర్ చెప్పుకొచ్చారు. తాజ్‌మహల్‌ను క్షుణ్ణంగా పరిశీలించానని తెలిపారు. ఇంటి లోపలి డిజైన్లను తీర్చిదిద్దేందుకు బెంగాల్, ఇండోర్ నుంచి కళాకారులను రప్పించాల్సి వచ్చిందన్నారు. డోమ్ 29 అడుగుల ఎత్తు అని, తాజ్‌మహల్‌ను పోలిన టవర్లు ఏర్పాటు చేశామన్నారు. రాజస్థాన్‌ నుంచి తెప్పించిన ‘మక్రానా’తో ఫ్లోరింగ్ చేయించినట్టు వివరించారు. ఇంటిలోపల ఫర్నిచర్‌ను ముంబై కళాకారులు తీర్చిదిద్దినట్టు తెలిపారు. పెద్ద హాలు, పైన రెండు, కింద రెండు పడక గదులు, లైబ్రరీ, ధ్యానం కోసం ఓ గదిని నిర్మించారు. అంతేకాదు, తాజ్మహల్ లానే చీకటిలోనూ ఈ ఇల్లు వెలుగులు విరజిమ్ముతుండడం మరో విశేషం. అందంగా, అద్భుతంగా నిర్మించిన ఈ ఇంటిని తన భార్యకు కానుకగా ఇవ్వడంతో ఆమె ఆనందానికి హద్దులు లేకుండా పోయింది. ఇప్పుడీ తాజ్మహల్ ఇల్లు సోషల్ మీడియాలో హల్‌చల్ చేస్తోంది.
By November 22, 2021 at 01:30PM
No comments