హ్యాట్సాఫ్ మేడం.. విపత్తులో మహిళా ఈ ఎస్ఐ తెగువకు సెల్యూట్ చేయాల్సిందే
భుజాలపై బాధితుణ్ని మోస్తున్న మహిళా ఇన్స్‌పెక్టర్ ఫొటోలు ఇప్పుడు ఇంటర్నెట్‌ను షేక్ చేస్తున్నాయి. ఆపత్కాలంలో అద్భుతంగా స్పందించిన ఈ ఆఫీసర్ పనితీరుపై యావత్ దేశం ప్రసంశలు కురిపిస్తోంది. చెన్నై నగరాన్ని కొన్ని రోజులుగా కుండపోత వానలు కకావికలం చేస్తున్నాయి. వరద బాధితులకు సాయం అందించేందుకు ప్రభుత్వ సిబ్బంది, పోలీసులు విరామం లేకుండా పనిచేస్తున్నారు. ఇలా ఉండగా.. గురువారం ఉదయం 8 గంటల సమయంలో పోలీస్ కంట్రోల్ రూమ్‌కు ఓ కాల్ వచ్చింది. సమీపంలోని శ్మశాన వాటికలో చెట్టు కూలి మీద పడటం వల్ల ఓ యువకుడు చనిపోయాడని ఆ కాల్ చేసిన వ్యక్తి తెలిపాడు. ఆ సమాచారం అందుకున్న వెంటనే ఎస్సై రాజేశ్వరి తన బ్రుందంతో అక్కడికి చేరుకున్నారు. చెట్టును పక్కకు తొలగించి అక్కడ పడిఉన్న యువకుడిని పరిశీలించి ఆశ్చర్యానికి గురయ్యారు. అతడు ఇంకా ఊపిరి తీసుకుంటున్నాడు. అతడు ప్రాణాలతో ఉన్నాడనే విషయం గ్రహించగానే ఎస్సై రాజేశ్వరి క్షణం ఆలస్యం చేయలేదు. సృహ కోల్పోయి ఉన్న ఆ యువకుడిని అమాంతం తన భుజాల పైకి ఎత్తుకొని వరద నీటిలో నుంచి మోసుకుంటూ వచ్చారు. ఓ ఆటోలో ఎక్కించి, ఆస్పత్రికి తరలించి వెంటనే చికిత్స అందేలా చూశారు. విపత్తులో ఆ మహిళా ఆఫీసర్ ప్రదర్శించిన తెగువను చూసి నెటిజన్లు ‘సెల్యూట్ మేడం’ అంటూ ప్రసంశలు గుప్పిస్తున్నారు. బాధిత యువకుడిని ఉదయ్ కుమార్‌గా గుర్తించారు. అతడి వయసు 28 ఏళ్లు. టీపీ ఛత్రం ప్రాంతంలోని శ్మశాన వాటికలో అతడు పనిచేస్తున్నాడు. గత రాత్రి అతడు తన స్నేహితుడితో కలిసి మద్యం తాగి పడుకున్నాడు. తెల్లారే సరికి అతడిపై చెట్టు కూలిపోయింది. మద్యం మత్తు వీడని అతడి స్నేహితుడు కనీసం.. ఉదయ్ బతికున్నాడా, లేదా అని కూడా చూసుకోకుండా పోలీసులకు ఫోన్ చేశాడు. ఉదయ్ కుమార్ కోమా నుంచి కోలుకున్నాడని, ఔట్ ఆఫ్ డేంజర్ అని ఎస్సై రాజేశ్వరి తెలిపారు.
By November 12, 2021 at 10:14AM
No comments