ఫేస్‌బుక్ సంచలన నిర్ణయం.. ఆ టెక్నాలజీని తొలగిస్తున్న దిగ్గజ సంస్థ!

ఇటీవలే మాతృసంస్థ పేరును మార్చిన సోషల్ మీడియా దిగ్గజం ఫేస్‌బుక్.. మరో కీలక నిర్ణయం తీసుకుంది. ఫేస్‌బుక్‌లో ఫేషియల్‌ రికగ్నిషన్‌ను తొలగించాలని నిర్ణయం తీసుకున్నట్లు వెల్లడించింది. ఫేస్‌ప్రింటర్లను సైతం తొలగించనున్నట్లు ఫేస్‌బుక్‌ మాతృసంస్థ ‘మెటా’ () తెలిపింది. ఫేషియల్‌ రికగ్నిషన్‌ టెక్నాలజీలో ఇదో భారీ మార్పు అని ఫేస్‌బుక్‌ ‘మెటా’ ఆర్టిఫిషియల్‌ ఇంటెలిజెన్స్‌ వైస్‌ ప్రెసిడెంట్‌ జెరోమ్‌ పెసెంటి తెలిపారు. వ్యక్తిగత గోప్యతపై తీవ్ర విమర్శలు వస్తున్న నేపథ్యంలో ఈ నిర్ణయం తీసుకోవడం గమనార్హం. ‘‘విస్తృత వినియోగం నుంచి పరిమిత వినియోగానికి తగ్గించేలా ఫేస్‌బుక్‌లో ఫేస్‌ రికగ్నిషన్‌ () సాంకేతికతను మేము తొలగించనున్నాం. ప్రస్తుతం ఫేస్‌బుక్‌లో దీన్ని ఉపయోగిస్తున్నవారు ఇక భవిష్యత్‌లో ఈ సాంకేతికతను వినియోగంచలేరు. ఫేస్ రికగ్నిషన్ కోసం ఉపయోగించే టెంప్లేట్‌లను తొలగించనున్నాం’’ అని జెరోమ్ సెపెంటి తన బ్లాగ్‌లో పేర్కొన్నారు. పెరుగుతున్న సామాజిక ఆందోళనలకు వ్యతిరేకంగా బ్యాలెన్స్‌ చేసేందుకు ఈ సానుకూల నిర్ణయం తీసుకుంటున్నట్లు ఆయన తెలిపారు. ఇక, ఫేస్‌ రికగ్నిషన్‌ టెక్నాలజీని ఫేస్‌బుక్‌ 2010లో అందుబాటులోకి తీసుకొచ్చింది. ఫేస్‌బుక్‌ వినియోగదారుల్లో మూడొంతుల మంది ఈ సాంకేతికతను ఉపయోగిస్తున్నారు. తాజా నిర్ణయంతో ఒక బిలియన్‌ కంటే ఎక్కువ మంది ప్రభావితం కానున్నారు. ముఖ్యంగా దృష్టిలోపం ఉన్నవారికి ఉపయోగపడే ఆటోమెటిక్‌ ఆల్ట్‌ టెక్ట్స్‌ (ఏఏటీ)పై దీని ప్రభావం పడనుంది. యూజర్ల అకౌంట్స్‌లోని వ్యక్తిగత ఫేస్ రికగ్నిషన్ టెంప్లేట్‌లు తొలగిపోనున్నాయి. ఫోటోలు, వీడియోల్లోని ముఖాలను ఫేస్‌బుక్‌ దానంతట అది గుర్తించదు. ఫొటోల్లోని వ్యక్తి సూచించడానికి, వారి పేరుతో ట్యాగ్‌ చేయడానికి ఇక కుదరదు. ఇక ఫొటోల్లోని వ్యక్తులను ఇతరులు గుర్తించకుండా సాధ్యపడుతుంది. వ్యక్తిగత గోప్యతకు సంబంధించి ఫేస్‌బుక్‌లో ఫేస్‌ రికగ్నిషన్‌ సాంకేతికతతో ప్రమాదం పొంచి ఉందని ప్రపంచ వ్యాప్తంగా ఆందోళన వ్యక్తం అవుతోంది. అయితే, దీనికి సంబంధించి వినియోగాన్ని నియంత్రించే నిబంధనలు రూపొందించే ప్రక్రియలో పలు సంస్థలు ఉన్నట్లు ‘మెటా’ తెలిపింది. ఈ మార్పులు ఈ నెలలోనే అమలులోకి వచ్చే అవకాశం ఉన్నట్లు తెలుస్తోంది. గత కొన్నిరోజులుగా ఫేస్‌బుక్‌ వ్యక్తిగత గోప్యతపై (Privacy )తరచూ విమర్శలు వెల్లువెత్తుతున్నాయి. పలుదేశాల్లో న్యాయపరమైన సమస్యలు ఎదురవుతున్నాయి. ఇటీవల ఆ మాజీ ఉద్యోగి ఫేస్‌బుక్‌ డాక్యుమెంట్లను లీక్‌చేయడంతో ఫేస్‌బుక్‌ మాతృసంస్థకు కష్టాలు ఎక్కువయ్యాయి. భద్రతా ప్రయోజనాల కోసం రిటైలర్లు, ఆసుపత్రులు, ఇతర వ్యాపార సంస్థలలో ఫేషియల్ రికగ్నిషన్ టెక్నాలజీ వ్యక్తిగత గోప్యత విషయంలో రాజీ పడుతుందని, అట్టడుగు వర్గాలను లక్ష్యంగా చేసుకుంటోందనేది విమర్శకులు అభిప్రాయం. ఇప్పటికే IBM ఈ సాంకేతికత ఉత్పత్తి, విక్రయాలను శాశ్వతంగా ముగించగా... Microsoft Corp, Amazon వంటి సంస్థలు పోలీసులకు అమ్మకాలను నిరవధికంగా నిలిపివేశాయి.

By November 03, 2021 at 07:25AM

Read More https://telugu.samayam.com/latest-news/international-news/social-media-gaint-facebook-will-shut-down-facial-recognition-system/articleshow/87498367.cms