Aryan Khan సమీర్ వాంఖడేకి షాక్.. అవినీతి ఆరోపణలతో ఆర్యన్ ఖాన్ కేసు నుంచి ఔట్!
షారుక్ ఖాన్ కుమారుడు ఆర్యన్ ఖాన్ డ్రగ్స్ కేసు నుంచి సమీర్ వాంఖడేను ఎన్‌సీబీ తప్పించింది. ఆయనను ఈ కేసు నుంచి తప్పించినా.. ముంబయి జోనల్ అధికారిగా కొనసాగుతారని స్పష్టం చేసింది. అవినీతి ఆరోపణలు రావడంతోనే సమీర్ వాంఖడేను తప్పించినట్టు తెలుస్తోంది. ఆర్యన్ సహా మరో ఆరు కేసుల నుంచి ఆయనను తప్పించారు. ఈ మొత్తం కేసుల విచారణను సీనియర్ పోలీస్ అధికారి సంజయ్ సింగ్ నేతృత్వంలో ప్రత్యేక దర్యాప్తు బృందం (సిట్) చేపట్టనుంది. వీటిలో మహారాష్ట్ర మంత్రి అల్లుడి డ్రగ్స్ కేసు కూడా ఉంది. ఇక, సమీర్‌ను కేసు నుంచి తప్పించడంపై నవాబ్ మాలిక్ ట్విట్టర్‌లో స్పందించారు. ఇది ఆరంభం మాత్రమేనని, వాంఖడేపై విచారణకు సిట్ ఏర్పాటుచేయాలని డిమాండ్ చేశారు. ఆర్యన్ ఖాన్‌‌ను బెదిరించి, లంచం డిమాండ్ చేశారని మాలిక్ ఆరోపించారు. ఇదిలా ఉండగా, ఏ అధికారి లేదా అధికారులను ప్రస్తుత విధుల నుంచి తప్పించలేదని ఎన్‌సీబీ స్పష్టం చేసింది. తాజా పరిణామాలపై వాంఖడే స్పందిస్తూ.. ‘నన్ను ఎవరూ తొలగించలేదు, కేసు నుంచి నేనే బదిలీ చేయాలని కోరాను’ అన్నారు. ‘విచారణ నుంచి తప్పించలేదు.. సీబీఐ లేదా ఎన్ఐఏ వంటి కేంద్ర సంస్థలతో దర్యాప్తు చేయించాలని బాంబే హైకోర్టులో నేను దాఖలుచేసిన రిట్ పిటిషన్ ఆధారంగా ఇప్పుడు సీనియర్ అధికారి నేతృత్వంలో సిట్‌ను ఏర్పాటు చేశారు’ అని పేర్కొన్నారు. కాగా, అక్టోబరు 3న ముంబయి తీరంలోని క్రూయిజ్ షిప్‌లో రేవ్ పార్టీ జరుగుతుండగా ఎన్‌సీబీ అధికారులు దాడులు నిర్వహించి ఆర్యన్ ఖాన్ సహా పలువుర్ని అరెస్ట్ చేసిన విషయం తెలిసిందే. ఆ సమయంలో వారి వద్ద డ్రగ్స్ లభించినట్టు ఎన్‌సీబీ పేర్కొంది. అయితే, ఆర్యన్‌ను కేసు నుంచి తప్పించాలంటే రూ.18 కోట్లు లంచం డిమాండ్ చేశారని, ఇందులో దర్యాప్తు అధికారి సమీర్ వాంఖడేకు రూ.8 కోట్లు ఇవ్వాల్సి ఉంటుందని చెప్పినట్టు ప్రత్యక్ష సాక్షి చేసిన ఆరోపణలతో వివాదం మొదలయ్యింది. బెదిరింపుల ద్వారా కోట్లాది రూపాయలు సంపాదిస్తున్నారని, వసూళ్ల కోసం ప్రయివేట్ ఆర్మీని నియమించారని మంత్రి మాలిక్ ఆరోపించిన విషయం తెలిసిందే. ఓ లేడీ డాన్‌కు ఆర్మీతో భాగస్వామ్యం ఉందని నవాబ్ మాలిక్ సంచలన వ్యాఖ్యలు చేశారు. ఈ మేరకు మీడియా ముందు ఓ వాట్సాప్ చాటింగ్‌ను మంత్రి బయటపెట్టారు.
By November 06, 2021 at 08:46AM
No comments