ఆ నలుగురి ఆచూకీ చెబితే.. ఒక్కొక్కరికీ రూ.38 కోట్ల చొప్పున రివార్డు.. అమెరికా సంచలన ప్రకటన
డ్రగ్స్ అక్రమ రవాణాలో కరుడగట్టిన మెక్సికో నేరగాడు సోదరుడితో సహా నలుగురు మెక్సికో డ్రగ్స్ నేరస్థులను పట్టుకోడానికి అధికారులకు సహకరించి, సమాచారం ఇస్తే ఒక్కొక్కరికీ 5 మిలియన్ డాలర్లు (దాదాపు రూ.37.5 కోట్లు) చొప్పున నజరానా ఇస్తామని అమెరికా శుక్రవారం ప్రకటించింది. దోషులుగా నిర్ధారించడంలో అధికారులకు సహకరిస్తే రివార్డును అందజేస్తామని అమెరికా విదేశాంగ శాఖ స్పష్టం చేసింది. డ్రగ్స్ కేసుల్లో పట్టుబడి ప్రస్తుతం జైల్లో ఉన్న జోక్విన్ ఎల్ చాపో గుజ్‌మెన్ సోదరుడు ఆరేలియానో గుజ్మాన్ లోరా, రూపెర్టో సల్గొరియో నెవారెజ్, జోస్ సల్గొరియో నెవారెజ్, హెరిబెర్టో సల్గొరియా నెవారెజ్ సోదరుల కోసం అమెరికా గాలిస్తోంది. ఈ నలుగురు నిందితులు అమెరికా డ్రగ్ చట్టాలను ఉల్లంఘించి, అంతర్జాతీయంగా మారిజోనా, కొకైన్, మెథాంఫెటమిన్, ఫెంటానిల్‌ను కుట్రపూరితంగా సరఫరా చేశారన్న అభియోగాలు నమోదయినట్టు అమెరికా విదేశాంగ శాఖ అధికార ప్రతినిధి నెడ్ ప్రైస్ ఓ ప్రకటనలో తెలిపారు. ‘మార్చి 2020- 2021 మధ్య అమెరికాలో 96,779 డ్రగ్ ఓవర్‌డోస్ మరణాలు సంభవించగా.. ఇందులో 63 శాతం అత్యంత ప్రమాదకరమైన సింథటిక్ ఓపియాయిడ్ ఫెంటానిల్ వల్లే జరిగాయి’అని తెలిపింది. ఈ నలుగురూ మెక్సికోలో డ్రగ్స్ అక్రమ రవాణా ముఠాల్లో ఒకటైన సినాలో కార్టెల్‌‌కు చెందిన సభ్యులు. అరెస్ట్‌కు ముందు గతంలో దీనికి ఎల్ చాపో నాయకత్వం వహించాడు. ఎల్ చాపోను మెక్సికో 2017లో అమెరికాకు అప్పగించడంతో రెండేళ్ల విచారణ అనంతరం అతడికి కోర్టు యావజ్జీవిత ఖైదు విధించింది. అంతర్జాతీయ అక్రమ రవాణా చట్టాలను ఉల్లంఘించినందుకు నలుగురిపై అభియోగాలు మోపుతూ న్యాయ శాఖ ప్రకటన వెలువడిన రోజునే విదేశాంగ శాఖ ప్రకటన రావడం గమనార్హం. ఒక దశాబ్దం పాటు అమెరికా, మెక్సికోలు మెరిడా అనే కార్యక్రమం కింద మాదకద్రవ్యాల అక్రమ రవాణాకు వ్యతిరేకంగా పోరాటం చేస్తున్నాయి. దీనికి అమెరికా సైనిక సాయం, సాంకేతిక మద్దతు, మరియు భద్రతా శిక్షణను అందిస్తోంది. అక్టోబరులో ఈ పొరుగు దేశాలు డ్రగ్స్ మూలు కారణాలను పరిష్కారం, సరిహద్దుల్లో ఆయుధాల అక్రమ రవాణాను అరికట్టడానికి ప్రయత్నాలను వేగవంతం చేయాలని ఓ ఒప్పందానికి వచ్చాయి. 2006లో డ్రగ్స్‌పై యుద్ధం ప్రకటించినప్పటి నుంచి మూడు లక్షల కంటే ఎక్కువ మంది హత్యకు గురయ్యారు.
By November 06, 2021 at 01:17PM
No comments