డిసెంబరు 15 నుంచి అంతర్జాతీయ విమాన ప్రయాణాలు.. నిషేధం ఎత్తివేత
కరోనా వైరస్ వ్యాప్తితో ఏడాదిన్నరకుపైగా అంతర్జాతీయ విమాన ప్రయాణాలపై నిషేధం కొనసాగుతోంది. ప్రస్తుతం కోవిడ్ తగ్గుముఖం పట్టడం, వ్యాక్సినేషన్ ప్రక్రియ వేగంగా కొనసాగుతుండటంతో నిషేధాన్ని సడలించాలని కేంద్ర ప్రభుత్వం నిర్ణయించింది. డిసెంబరు 15 నుంచి అంతర్జాతీయ విమాన ప్రయాణాలను ప్రారంభించనున్నట్టు పౌర విమానయాన శాఖ శుక్రవారం రాత్రి వెల్లడించింది. ఈ అంశంపై కేంద్ర హోం, విదేశాంగ, ఆరోగ్య శాఖలతో సంప్రదింపుల తర్వాతే నిర్ణయం తీసుకున్నట్టు తెలిపింది. ‘‘షెడ్యూల్డ్ వాణిజ్య అంతర్జాతీయ ప్రయాణికుల సర్వీసుల పునఃప్రారంభించే అంశంపై కేంద్ర హోం, విదేశాంగ, ఆరోగ్య శాఖలను సంప్రదించి సమీక్షించి నిర్ణయం తీసుకున్నాం.. డిసెంబరు 15 నుంచి వీటిని ప్రారంభించే అవకాశం ఉంది’’ అని ఓ ప్రకటనలో తెలిపింది. అయితే, ఆరోగ్య శాఖ నివేదిక ప్రకారం 14 దేశాలు ‘రిస్క్’ జాబితాలో ఉన్నాయని, ఎయిర్ బుబుల్ అగ్రిమెంట్ ప్రకారం.. కరోనాకు ముందున్న 75 శాతం సర్వీసులను అనుమతిస్తామని చెప్పింది. ఈ దేశాల్లో బ్రిటన్, సింగపూర్, చైనా, బ్రెజిల్, బంగ్లాదేశ్, మారిషస్, జింబావ్వే, న్యూజిలాండ్ సహా కొత్త వేరియంట్ వెలుగుచూసిన దక్షిణాఫ్రికా, బోట్సవానా, ఇజ్రాయేల్, హాంకాంగ్‌లు ఉన్నాయి. భారత్‌తో ‘ఎయిర్ బబుల్’ఒప్పందాలు లేని రిస్క్ జాబితాలోని దేశాలకు మాత్రం 50 శాతం సర్వీసులను అనుమతిస్తామని తెలిపారు. గతేడాది మార్చి నుంచి అత్యవసర వస్తువుల రవాణాచేసే కార్గో విమానాల తప్పా మిగతా అంతర్జాతీయ సర్వీసులపై నిషేధం కొనసాగుతోంది. అయితే, విదేశాల్లోని చిక్కుకున్న భారతీయులను రప్పించడానికి వందే భారత్ పేరుతో ప్రత్యేక విమానాలను నడిపారు. ఆయా దేశాలతో చేసుకున్న ఒప్పందం ప్రకారం ప్రత్యేక విమానాల్లో భారతీయులను తరలించారు. మరోవైపు, దక్షిణాఫ్రికా వేరియంట్ భయంతో ఆ దేశం నుంచి వచ్చే విమాన ప్రయాణికులపై పలు దేశాలు నిషేధం విధిస్తున్నాయి. కార్గో విమానాలు, ఎయిర్ బబుల్ ఒప్పందంలో భాగంగా నడుస్తున్న ప్రత్యేక విమానాలకు మాత్రం మినహాయింపు ఇచ్చింది. కరోనా వైరస్ లాక్‌డౌన్ తర్వాత సుమారు 27 దేశాలతో భారత్ ఎయిర్ బబుల్ ఒప్పందం చేసుకుంది. ఈ దేశాల నుంచి భారత్‌కు రాకపోకలు సాగించే విమానాలకు ఎలాంటి ఆటంకం ఉండదు.
By November 27, 2021 at 08:08AM
No comments