బాలకృష్ణ 107: గోపీచంద్‌తో మాస్ మూవీ స్టార్ట్.. షూటింగ్ అప్‌డేట్ ఇచ్చిన చిత్రయూనిట్
వరుస సినిమాలతో బిజీగా ఉన్న నందమూరి నటసింహం .. మాస్ డైరెక్టర్ దర్శకత్వంలో మరో సినిమాను షురూ చేశారు. ఇటీవల బాలయ్య బాబు బర్త్ డే సందర్భంగా ఈ మూవీ అధికారికంగా ప్రకటించడంతో ఆయన అభిమానులు హుషారెత్తిపోయారు. NBK107 మోషన్ పోస్టర్ రిలీజ్ చేయడంతో ఒక్కసారిగా అందరి దృష్టి ఈ సినిమాపై పడింది. ఈ నేపథ్యంలో తాజాగా పూజా కార్యక్రమాలతో లాంఛనంగా ప్రారంభించారు. ఫుల్ మాస్ మసాలా కమర్షియల్ అంశాలతో రాబోతోన్న ఈ చిత్రాన్ని మైత్రీ మూవీ మేకర్స్ ప్రతిష్టాత్మకంగా నిర్మించనుంది. బాలకృష్ణ సరసన హీరోయిన్‌గా శృతి హాసన్‌ను ఎంపిక చేశారు. నేడు (శనివారం) ఈ చిత్రానికి సంబంధించిన పూజా కార్యక్రమాలను హైద్రాబాద్‌లో ఘనంగా నిర్వహించారు. ఈ కార్యక్రమానికి ముఖ్య అతిథులుగా దర్శకులు బోయపాటి శ్రీను, వినాయక్, హరీష్ శంకర్, కొరటాల శివ, బాబీ, బీవీఎస్ రవి, బుచ్చిబాబు సన, సాయి మాధవ్ బుర్రా హాజరయ్యారు. ముహూర్తపు సన్నివేశానికి వివి వినాయక్ క్లాప్ కొట్టగా.. బోయపాటి శ్రీను కెమెరా స్విచ్ ఆన్ చేశారు. మొదటి సన్నివేశానికి హరీష్ శంకర్ దర్శకత్వం వహించారు. కొరటాల శివ, బాబీ, బుచ్చిబాబు సానా స్క్రిప్ట్‌ను మేకర్లకు అందజేశారు. ఈ చిత్రానికి తమన్ సంగీతం అందిస్తుండగా.. హీరోయిన్ వరలక్ష్మి శరత్‌కుమార్‌ ఓ కీలక పాత్రలో కనిపించనున్నట్లు చిత్రయూనిట్ తెలిపింది. జనవరి నుంచి ఈ మూవీ రెగ్యులర్ షూటింగ్ ప్రారంభం కానుంది. తనకెంతో ఇష్టమైన దర్శకుడు గోపీచంద్‌ మలినేనితో కలిసి బాలయ్య సినిమా కోసం పనిచేయడం చాలా ఆనందంగా ఉందని, ఎప్పుడెప్పుడు సెట్‌లోకి అడుగుపెట్టాలా అని ఆతృతగా ఎదురు చూస్తున్నానని వరలక్ష్మి శరత్ కుమార్ చెప్పింది. మాస్ ఆడియన్స్ టార్గెట్‌గా ఈ సినిమాను తెరకెక్కించబోతున్నారని, ఇందులో బాలయ్య బాబు పవర్‌ఫుల్ మాస్ గెటప్‌లో కనిపించనున్నారని టాక్.
By November 13, 2021 at 12:26PM
No comments