lakhimpur Kheri Violence ‘ప్రియాంక గాంధీని విడుదల చేయలేదో’.. యూపీ పోలీసులకు సిద్ధూ వార్నింగ్
లఖింపూర్ ఖేరి ఘటనలో చనిపోయిన రైతు కుటుంబాలను పరామర్శించేందుకు వెళ్లిన కాంగ్రెస్ నాయకురాలు ప్రియాంక గాంధీని పోలీసులు సోమవారం అదుపులోకి తీసుకున్న విషయం తెలిసిందే. రెండు రోజులుగా ఆమె పోలీసుల నిర్బంధంలో ఉన్నారు. ఈ నేపథ్యంలో ప్రియాంక అరెస్ట్‌పై తీవ్ర ఆగ్రహం వ్యక్తం చేసిన సీనియర్‌ నేత నవజోత్‌ సింగ్‌ సిద్ధూ.. యూపీ పోలీసులకు వార్నింగ్ ఇచ్చారు. బుధవారంలోగా ప్రియాంకను విడుదల చేయాలని, నిందితులను అరెస్టు చేయాలని డిమాండ్‌ చేశారు. అలా కాకుంటే పంజాబ్‌ నుంచి లఖింపూర్ ఖేర్ వరకు ర్యాలీ నిర్వహిస్తామని యూపీ పోలీసులను సిద్ధూ హెచ్చరించారు. ‘‘రైతుల దారుణ హత్యకు కారణమైన కేంద్రమంత్రి కుమారుడిని రేపటిలోగా అరెస్టు చేయాలి.. అన్నదాతల కోసం పోరాడేందుకు వచ్చిన మా నాయకురాలు ప్రియాంక గాంధీని చట్టవిరుద్ధంగా అరెస్టు చేశారు. ఆమెను రేపటిలోగా విడుదల చేయాలి.. లేదంటే పంజాబ్‌ కాంగ్రెస్ లఖింపూర్ ఖేరి వరకు మార్చ్‌ నిర్వహిస్తుంది’’ అని సిద్ధూ ట్విటర్‌లో పేర్కొన్నారు. ఇక, ప్రియాంక గాంధీని సీతాపూర్ వద్ద అరెస్ట్ చేసిన పోలీసులు.. ఆమెను ప్రభుత్వ గెస్ట్‌హౌస్‌లో ఉంచారు. ఈ గెస్ట్‌హౌస్ లోని గదిని ప్రియాంక ఊడుస్తున్న వీడియో సోషల్ మీడియాలో వైరల్ అయ్యింది. ఈ వీడియోను చూసిన నెటిజన్లు పోలీసులపై ఆగ్రహం వ్యక్తం చేస్తున్నారు. ప్రియాంకకు పరిశుభ్రంగా ఉన్న గదిని కూడా ఇవ్వలేదంటూ మండిపడుతున్నారు. స్వచ్ఛ భారత్ అంటే ఇదేనా? అని ఒక కాంగ్రెస్ నేత విమర్శలు గుప్పించారు. శుభ్రంగా లేని గదిని ఇచ్చినప్పటికీ... ప్రియాంక ఏ మాత్రం భేషజాలకు పోకుండా గదిని తనకు తానే శుభ్రం చేసుకున్నారని కొనియాడారు. ఉత్తర్‌ప్రదేశ్‌ డిప్యూటీ సీఎం కేశవ్‌ ప్రసాద్‌ మౌర్య పర్యటన నేపథ్యంలో ఆదివారం లఖింపూర్ ఖేరీలో హింస చెలరేగిన సంగతి తెలిసిందే. కొత్త సాగు చట్టాల రద్దు కోరుతూ తికోనియా-బన్బీర్‌పుర్‌ రహదారిపై అన్నదాతలు ఆందోళన వ్యక్తం చేస్తుండగా... కేంద్ర మంత్రి అజయ్ మిశ్రా కుమారుడి కాన్వాయ్ దూసుకెళ్లడంతో నలుగురు రైతులు చనిపోయారు. అనంతరం రైతులు ఆగ్రహంతో జరిపిన దాడిలో మరో నలుగురు మృతిచెందారు. ఈ అల్లర్లలో ఓ జర్నలిస్ట్ కూడా ప్రాణాలు కోల్పోయారు.
By October 06, 2021 at 07:58AM
No comments