మహిళలపై నోరుజారిన ఆరోగ్య మంత్రి.. తీవ్ర దుమారం
మహిళలను ఉద్దేశించి డాక్టర్ కే సుధాకర్ చేసిన వ్యాఖ్యలపై దుమారం రేగుతోంది. ఆధునిక భారతీయ మహిళలు ఒంటరిగా ఉండాలని కోరుకుంటారని, పెళ్లైన తర్వాత కూడా పిల్లల్ని కనడానికి ఇష్టపడరు.. సరోగసీ ద్వారా సంతానానికి జన్మనివ్వాలని భావిస్తున్నారని వ్యాఖ్యానించారు. ప్రపంచ మానసిక ఆరోగ్య దినోత్సవం సందర్భంగా బెంగళూరులోని జాతీయ మానసిక ఆరోగ్యం, న్యూరోలాజికల్ సైన్సెస్ (నిమ్‌హాన్స్)లో ఆదివారం జరిగిన కార్యక్రమంలో ఆయన ఈ వ్యాఖ్యలు చేశారు. ‘ఈ రోజు, నేను ఈ విషయం చెబుతున్నందుకు క్షమించండి... ఆధునిక భారత మహిళల్లో చాలా మంది ఒంటరిగా ఉండాలనుకుంటున్నారు.. వివాహం చేసుకున్నప్పటికీ పిల్లలకు జన్మనివ్వడానికి ఇష్టపడరు.. వారికి సరోగసీ కావాలి.. కాబట్టి మన ఆలోచన విధానంలో వచ్చిన ఈ మార్పు మంచిది కాదు’ అని అభిప్రాయపడ్డారు. ఈ వ్యాఖ్యలపై మహిళా సంఘాలు తీవ్రంగా మండిపడుతున్నాయి. మంత్రి వ్యాఖ్యలు మహిళలను కించపరిచేవిగా ఉన్నాయని దుయ్యబడుతున్నారు. భారతీయ సమాజంపై ‘పాశ్చాత్య ప్రభావం’ గురించి విచారం వ్యక్తం చేసిన మంత్రి సుధాకర్.. తల్లిదండ్రులను తమతో ఉండనివ్వడానికి పిల్లలు ఇష్టపడటం లేదని అన్నారు. ‘దురదృష్టవశాత్తు ఈ రోజు మనం పాశ్చాత్య మార్గంలో వెళ్తున్నాం... తల్లిదండ్రులను మనతో కలిసి జీవించడానికి ఇష్టపడటం లేదు.. తాతలు మనతో ఉండటం మర్చిపోయాం" అని మంత్రి పేర్కొన్నారు. దేశంలోని ప్రతి ఏడుగురు భారతీయుల్లో ఒకరు స్వల్ప, మోస్తరు లేదా తీవ్రమైన మానసిక సమస్యను ఎదుర్కొంటున్నారని అన్నారు. ఒత్తిడి నిర్వహణ ఒక కళ.. దానిని భారతీయుడు నేర్చుకోవలసిన అవసరం లేదు.. కానీ, దానిని ఎలా నిర్వహించాలో ప్రపంచానికి బోధించాలి అని తెలిపారు. ‘ఒత్తిడి నిర్వహణ ఒక కళ.. దానిని భారతీయుడు నేర్చుకోవలసిన అవసరం లేదు.. కానీ, దానిని ఎలా నిర్వహించాలో ప్రపంచానికి బోధించాలి... ఎందుకంటే యోగా, ధ్యానం, ప్రాణాయామం మన పూర్వీకులు మనకు ఇచ్చిన గొప్ప ఆయుధాలు.. వేలాది ఏళ్ల కిందటే ప్రపంచానికి బోధించారు.’ కోవిడ్-19 మానసిక ఆరోగ్యంపై తీవ్ర ప్రభావం చూపిందన్నారు. కరోనాతో చనిపోయిన వారి మృతదేహాలను తాకడానికే కాదు, కనీసం దగ్గరకు కూడా బంధువులు చేరడం లేదని, ఇది ఓ మానసిక సమస్యని అన్నారు.
By October 11, 2021 at 07:56AM
No comments