ఉద్రిక్తలకు మూల కారణం అమెరికాయే.. కిమ్ సంచలన వ్యాఖ్యలు
కొరియా ద్వీపకల్పంలో ఉద్రిక్తతలకు అమెరికాయే కారణమని అధినేత మరోసారి ఆరోపించారు. డిఫెన్స్ ఎగ్జిబిషన్ ప్రారంభోత్సవంలో కిమ్ మాట్లాడుతూ.. అస్థిరతకు అమెరికా మూల కారణమని మండిపడ్డారు. అణ్వాయుధ పరీక్షలు, బాలిస్టిక్ క్షిపణి ప్రయోగాలను భారీగా నిర్వహిస్తోన్న ఉత్తర కొరియాపై అంతర్జాతీయంగా ఆంక్షలు కొనసాగుతున్నాయి. అయితే, వాటిని బేఖాతరు చేస్తూ కిమ్ జోంగ్ ఉన్ వరుస ప్రయోగాలతో దూసుకెళ్తున్నారు. ఇటీవల అత్యాధునిక హైపర్ సోనిక్ క్షిపణిని ఉత్తర కొరియా పరీక్షించిన విషయం తెలిసిందే. ఇక, అమెరికా మొత్తం భూభాగాన్ని చేరుకోగల ఖండాంతర క్షిపణులను 2017లో ఉత్తర కొరియా పరీక్షించింది. అమెరికా దాడుల నుంచి తనను తాను రక్షించుకోవడానికే ఆయుధాలను సమకూర్చుకుంటున్నామని అప్పట్లో ప్రకటించింది. ఈ వరుస ప్రయోగాలు ప్రపంచ దేశాలను కలవరానికి గురిచేసింది. అమెరికా, ఉత్తర కొరియా మధ్య ఉద్రిక్తలతో మరో ప్రపంచ యుద్దం తప్పదేమోనని ఆందోళన వ్యక్తమయ్యింది. తమకు ఉత్తర కొరియాపై దాడిచేసే ఉద్దేశమే లేదని బైడెన్ యంత్రాంగం పదే పదే చెబుతున్నా.. డిఫెన్స్ ఎగ్జిబిషన్‌లో కిమ్ మాట్లాడుతూ.. ‘మనల్ని నమ్మే వ్యక్తులు లేదా దేశాలు ఉన్నాయా అని నాకు చాలా ఆసక్తిగా ఉంది. వారితో మాకు శత్రుత్వం లేదు.. కానీ, చర్యలను మేము నమ్మడానికి ఎటువంటి ఆధారం లేదు’ అని అన్నారు. డొనాల్డ్ ట్రంప్, కిమ్ జోంగ్ ఉన్ మధ్య 2018లో సింగపూర్ వేదికగా చర్చలు జరిగాయి. అమెరికా అధ్యక్షుడితో సమావేశమైన తొలి ఉత్తర కొరియా నేతగా కిమ్ గుర్తింపు పొందారు. అయితే, ఈ చర్చలు అర్ధాంతరంగా ముగియగా.. తర్వాత హొనాయ్‌లో ఇరువురి మధ్య రెండో సమావేశం జరిగింది. అయినా, ఎటువంటి పురోగతి లేకుండానే ముగియడంతో అమెరికా, ఉత్తర కొరియాల మధ్య ప్రతిష్టంభన కొనసాగుతోంది. అమెరికా, దక్షిణ కొరియా మధ్య బలమైన రక్షణ బంధం కొనసాగుతోంది. అమెరికాకు చెందిన 28,500 మంది సైనికులు దక్షిణ కొరియాలో ఉన్నారు. ఆగస్టులో ఇరు దేశాలూ సంయుక్త సైనిక విన్యాసాలను నిర్వహించడం ఉత్తర కొరియా ఆగ్రహానికి కారణమయ్యింది. తొలిసారిగా జలాంతర్గామి క్షిపణిని దక్షిణ కొరియా పరీక్షించింది. ఈ విన్యాసాలపై కిమ్ జోంగ్ ఉన్ మండిపడ్డారు. సైనిక శక్తిని బలోపేతం చేయడానికి వారి అనియంత్రిత, ప్రమాదకరమైన ప్రయత్నాలు కొరియా ద్వీపకల్పంలోని సైనిక సమతౌల్యతను నాశనం చేస్తున్నాయి.. అస్థిరతను పెంచుతున్నాయని ధ్వజమెత్తారు.
By October 12, 2021 at 08:41AM
No comments