అఫ్గనిస్థాన్‌పై వచ్చే నెల భారత్ కీలక సమావేశం.. పాక్‌కు ఆహ్వానం!

అఫ్గనిస్థాన్‌లో సమ్మిళిత ప్రభుత్వం కోసం తాలిబాన్‌లపై ఒత్తిడి పెంచేందుకు భాగస్వామ్య దేశాలతో భారత్ ప్రత్యేకంగా సమావేశం నిర్వహించే అవకాశం ఉంది. అఫ్గన్‌లో చోటుచేసుకుంటున్న పరిణామాలు, పరిస్థితులపై నవంబరు రెండో వారంలో నిర్వహించే ఈ సమావేశం కోసం రష్యా, చైనా, అమెరికా, అనేక ప్రాంతీయ దేశాలతో సంప్రదింపులు జరుపుతోంది. ఈ సమావేశాన్ని నవంబరు 10 లేదా 11 తేదీలలో నిర్వహించాలని భారత్ ప్రతిపాదించినట్టు విశ్వసనీయ వర్గాలు వెల్లడించాయి. అయితే, ఈ సదస్సుకు తాలిబాన్లను ఆహ్వానించడంపై ఎటువంటి ప్లాన్ లేనప్పటికీ, పాకిస్థాన్‌కు ఆహ్వానాన్ని తోసిపుచ్చలేమని తెలిపాయి. ఈ ఏడాది మేలోనూ అఫ్గన్, పాకిస్థాన్‌లతో ఇటువంటి సమావేశాన్ని నిర్వహించాలని భారత్ భావించింది. కానీ, కరోనా రెండో దశ వ్యాప్తి చెందడంతో అది సాధ్యం కాలేదు. భారత్ నిర్వహించే ఈ సమావేశం అక్టోబర్ 20న జరగనున్న మాస్కో సమావేశం చర్చలను అనుసరిస్తుంది. ఈ సమావేశానికి భారత్‌ను రష్యా గతంలో మాదిరిగా ఆహ్వానించింది. దీనికి ముందు యుఎస్, చైనా, పాకిస్థాన్‌తో రష్యా సమావేశం కానుంది. భారత్‌లో జరిగే సమావేశం మాస్కో ఫార్మాట్ చర్చల ఎజెండాను ముందుకు తీసుకెళ్తుంది. అఫ్గన్ భూభాగాన్ని ఉగ్రవాదానికి ఉపయోగించకుండా చూడాల్సిన బాధ్యత తాలిబన్లకు ఉందని నొక్కిచెప్పడం, సమ్మిళిత ప్రభుత్వాన్ని ఏర్పాటుచేసే దిశగా ఒత్తిడి తేవడం ప్రధాన లక్ష్యం. అఫ్గన్‌లోని తాలిబన్ల తాత్కాలిక ప్రభుత్వం అందరినీ కలుపుకోలేదని, దానిని గుర్తించడంలో అంతర్జాతీయ సమాజం తొందరపడవద్దని ప్రధాని నరేంద్ర మోదీ స్వయంగా వెల్లడించారు. ప్రపంచ ఎజెండాను రూపొందించాలని ప్రభుత్వం విశ్వసించే ఆగస్టు 30 UNSC 2593 తీర్మానం ప్రాముఖ్యతను నొక్కి చెప్పే అవకాశాన్ని కూడా ఈ సమావేశం భారత్‌కు అందిస్తుంది.

By October 16, 2021 at 09:02AM

Read More https://telugu.samayam.com/latest-news/india-news/india-plans-own-conference-on-afghanistan-in-november-may-invite-pakistan-too/articleshow/87055030.cms