Modi US Tour మోదీతో భేటీ.. ఉగ్రవాదంపై పాక్‌కు కమలా హ్యారిస్ స్ట్రాంగ్ మెసేజ్
అమెరికా పర్యటనలో ఉన్న ప్రధాని నరేంద్ర మోదీ.. ఉపాధ్యక్షురాలు కమలా హ్యారిస్‌తో తొలిసారిగా సమావేశమయ్యారు. ఈ సందర్భంగా ఉగ్రవాదం విషయంలో పాత్రపై ఘాటుగా స్పందించారు. భారత్, అమెరికా భద్రతపై ప్రభావం చూపకుండా ఉగ్రవాదం విషయంలో పాక్ కఠిన చర్యలు తీసుకోవాలని కమలా సూచించారు. విదేశాంగ శాఖ కార్యదర్శి హర్ష్ వర్దన్ శ్రింగ్లా మాట్లాడుతూ.. పలు దశాబ్దాలుగా ఉగ్రవాద బాధిత దేశంగా భారత్ ఉందని కమలా హ్యారిస్ అంగీకరించారని తెలిపారు. పాకిస్థాన్ మద్దతిస్తున్న ఉగ్రవాద సంస్థలను నిశితంగా పరిశీలించి, నియంత్రించాల్సిన అవసరం ఉందని స్పష్టం చేశారన్నారు. వైట్‌హౌస్ వేదికగా కమలా హ్యారిస్- ప్రధాని నరేంద్ర మోదీ మధ్య దాదాపు గంటపాటు సమావేశం జరిగింది. ఈ భేటీలో భారత్-అమెరికా వ్యూహాత్మక భాగస్వామ్యం, ప్రజాస్వామ్యానికి ఏర్పడిన ముప్పు, అఫ్గనిస్థాన్, ఇండో-పసిఫిక్ సహా వివిధ అంశాలపై ఇరువురూ చర్చించారు. ‘ఇందులో భాగంగా ఉగ్రవాదం అంశం చర్చకు రాగా.. పాకిస్థాన్ పాత్రను అమెరికా ఉపాధ్యక్షురాలు కమలా హ్యారిస్ స్వయంగా నొక్కి చెప్పారు’ అని మీడియా అడిగిన ప్రశ్నకు సమాధానంగా ఇచ్చారు. పాకిస్థాన్ భూభాగం నుంచి ఉగ్రవాద సంస్థల కార్యకలాపాలు కొనసాగుతున్నాయని ఆమె అంగీకరించారని పేర్కొన్నారు. ‘అమెరికా, భారతదేశ భద్రతపై ప్రభావం చూపకుండా చర్యలు తీసుకోవాలని ఆమె పాకిస్థాన్‌ను కోరారు.. సీమాంతర ఉగ్రవాదం వాస్తవం. అనేక దశాబ్దాలుగా భారత్ తీవ్రవాదానికి బాధిత దేశంగా ఉంది.. అటువంటి ఉగ్రవాద గ్రూపులకు పాకిస్తాన్ మద్దతును నిశితంగా పర్యవేక్షించాల్సిన అవసరం ఉందని ఆమె ప్రధానమంత్రి జరిగిన భేటీలో అంగీకరించారు’ అని వ్యాఖ్యానించారు. ‘ప్రపంచవ్యాప్తంగా ఉన్న ప్రజాస్వామ్య విలువలు, వ్యవస్థలను రక్షించాల్సిన బాధ్యత రెండు దేశాలపై ఉందని ఆమె స్పష్టం చేశారు’ అని శ్రింగ్లా తెలిపారు. ‘ప్రపంచవ్యాప్తంగా ప్రజాస్వామ్య వ్యవస్థలు ప్రమాదంలో ఉన్నాయి.. మన దేశాలలో, ప్రపంచవ్యాప్తంగా ప్రజాస్వామ్య సూత్రాలు, సంస్థలను రక్షించడం అత్యవసరం.. అంతర్గతంగా ప్రజాస్వామ్యాలను బలోపేతం చేయడానికి మనం ఏమి చేయాలో మేము నిర్వహిస్తాం.. మన దేశాల ప్రజల ప్రయోజనాల కోసం ప్రజాస్వామ్యాలను కాపాడటం మన బాధ్యత’ అన్నారు.
By September 24, 2021 at 11:32AM
No comments