ప్రియురాలిపై మోజు.. గర్భంతో ఉన్న భార్యకు HIV రోగికి చేసిన సూదితో ఇంజెక్షన్
ప్రియురాలి మోజులో పడి విడాకుల కోసం భార్య వేధిస్తున్న ఓ ప్రబుద్ధుడు.. దారుణానికి ఒడిగట్టాడు. హెచ్ఐవీ రోగికి ఉపయోగించిన సూదితో ఆమెకు ఇంజెక్షన్ చేశాడు. ఈ అమానవీయ ఘటన ఉత్తర్ప్రదేశ్లోని అలీగఢ్‌లో వెలుగుచూసింది. పోలీసులకు ఫిర్యాదుచేసిన బాధితురాలి తండ్రి.. అల్లుడి ఈ పాశవిక చర్యలను వివరించారు. అంతేకాదు, దీని వెనుక తన కుమార్తె అత్తామామలతో పాటు ఆసుప్రతి యజమాని కూడా ఉన్నారని ఆయన ఆరోపించారు. వీరంతా బంధువులే అని పేర్కొన్నారు. పోలీసుల కథనం ప్రకారం.. నిందితుడు మహేశ్ గౌతమ్ అలీగఢ్లోని ఓ ఆసుపత్రిలోని ల్యాబ్లో కాంట్రాక్టు టెక్నీషియన్గా పనిచేస్తున్నాడు. అతడికి గతేడాదది డిసెంబర్ 7న బాధిత యువతితో వివాహం జరిగింది. పెళ్లి సమయంలో కట్నకానుకలు కింద రూ.12 లక్షల నగదు, మరో రూ.25 లక్షల విలువచేసే ఆస్తులను ముట్టజెప్పారు. అయితే మహేశ్‌కు అదే ఆస్పత్రిలో పనిచేసే యువతితో అక్రమ సంబంధం ఉన్న విషయం భార్యకు తెలిసింది. దీనిపై ఆమె నిలదీయడంతో అప్పటి నుంచి విడాకులు కావాలని వేధిస్తున్నాడు. అతడికి తల్లిదండ్రుల కూడా వత్తాసుపలకడంతో మరింత రెచ్చిపోయాడు. ఈ క్రమంలోనే.. ఓ హెచ్ఐవీ రోగికి ఇచ్చిన సూదితోనే మహేశ్ తన భార్యకు ఇంజెక్షన్ చేశాడు. ఈ విషయాన్ని ఆమె తండ్రికి తెలియజేయడంతో పోలీసులకు ఫిర్యాదు చేశారు. తాను గర్భవతి అని తెలిసినప్పటి నుంచి హెచ్ఐవీ అంటించేందుకు భర్త ప్రయత్నిస్తున్నాడని బాధితురాలు ఆరోపించింది. దీనికి నర్సింగ్ హోమ్ నడుపుతున్న మహేశ్ బావ సహకరించారని తెలిపింది. తాను రోగగ్రస్తురాలినని వేధించి విడాకులపై సంతకం చేయాలని ఒత్తిడి చేశారని పేర్కొంది. అందుకు తాను నిరాకరించడంతో గర్భవతినని తెలిసిన తర్వాత ఈ కుట్ర చేశారని వాపోయింది. వ్యాక్సిన్ వేయాలని చెప్పి వాళ్ల ఆస్పత్రికి తీసుకెళ్లి తనకు హెచ్ఐవీ రోగికి చేసిన సూదితో ఇంజెక్షన్ చేసినట్టు వెల్లడించింది. ఆమె ఫిర్యాదు ఆధారంగా నిందితుడు మహేశ్ గౌతమ్, అతడి తల్లిదండ్రులు, ఆసుపత్రి యాజమాన్యంపై వివిధ సెక్షన్ల కింద పోలీసులు కేసు నమోదు చేశారు. వరకట్న వేధింపులకు కూడా పాల్పడ్డారని, అందుకే నిబంధనల ప్రకారం కేసును కోర్టు మధ్యవర్తిత్వానికి పంపుతామని తెలిపారు.
By September 14, 2021 at 09:07AM
No comments