మరో ఆరు నెలల్లో ఎండమిక్ దశకు కోవిడ్.. సాధారణ జలుబుస్థాయికి?

దేశంలో కోవిడ్ రెండో దశ ఉధృతి క్రమంగా తగ్గుముఖం పట్టినా.. థర్డ్ వేవ్ ముప్పు పొంచి ఉందని నిపుణులు హెచ్చరిస్తున్నారు. ఈ నేపథ్యంలో, రాబోయే రోజుల్లో ఇది స్థానికంగా ఎప్పటికీ ఉండిపోయే (Endemic) దశలోకి మారే సూచనలు కనిపిస్తున్నాయి. వచ్చే ఆరు నెలల్లోనే కోవిడ్‌-19 ఎండెమిక్‌గా మారే అవకాశాలు ఉన్నాయని జాతీయ వ్యాధుల నియంత్రణ కేంద్రం (ఎన్‌సీడీసీ) డైరెక్టర్ సుజీత్ సింగ్ వ్యాఖ్యానించారు. కేవలం కొత్త వేరియంట్లు పుట్టుకొచ్చినంత మాత్రాన థర్డ్‌ వేవ్‌కు కారణమవుతాయని ఖచ్చితంగా చెప్పలేమని అన్నారు. ‘కరోనా వైరస్‌ మహమ్మారి మన అంచనాలకు అందని విధంగా విజృంభించింది.. కానీ, రాబోయే ఆరు నెలల్లోనే ఇది స్థానికంగా ఉండిపోయే ‘ఎండెమిక్‌’ దశకు చేరుకుంటుంది. ముఖ్యంగా మరణాల సంఖ్య, సంక్రమణ రేటు నియంత్రణలో ఉన్నట్లయితే వ్యాధిని కట్టడి చేసుకోవచ్చు.. కొవిడ్‌ ఉద్ధృతి అత్యధికంగా ఉన్న కేరళ కూడా ఇప్పుడిప్పుడే ఆ సంక్షోభం నుంచి బయటపడుతోంది.. మహమ్మారిని ఎదుర్కోవడంలో వ్యాక్సినేషన్‌ అత్యంత కీలకం’ ఎన్‌సీడీసీ డైరెక్టర్‌ పునరుద్ఘాటించారు. ఇప్పటికే దేశవ్యాప్తంగా 75 కోట్ల టీకా డోస్‌లు పంపిణీ చేశారని గుర్తుచేశారు. ఒకవేళ వ్యాక్సిన్‌ సమర్థత 70 శాతంగా ఉన్నట్లయితే ఇప్పటికే దేశంలో దాదాపు 50 కోట్ల మందికి ఇమ్యూనిటీ వచ్చినట్లేనని ఆయన అభిప్రాయపడ్డారు. అలాగే, ‘మొదటి డోస్ వల్ల 30-31 శాతం ఇమ్యూనిటీ వస్తుందని కాబట్టి తొలి డోస్ వేసుకున్న 30 కోట్ల మందికి ఇమ్యూనిటీ వచ్చినట్టే.. అయితే, టీకా తీసుకున్నప్పటికీ కొవిడ్ నిబంధనలు తప్పనిసరిగా పాటించాలని’ స్పష్టం చేశారు. ముఖ్యంగా వ్యాక్సిన్‌ వేసుకున్న వారికి కూడా (Breakthrough) ఇన్‌ఫెక్షన్‌ సోకే ప్రమాదం 20-30 శాతం ఉన్నందున అత్యంత జాగ్రత్తగా ఉండాలని సూచించారు. కొత్త వేరియంట్ల కారణంగా బ్రేక్‌త్రూ వచ్చే అవకాశం ఉందని.. వీటితో పాటు వ్యాక్సినేషన్‌ వల్ల కలిగే రోగనిరోధక శక్తి 70 నుంచి 100రోజుల తర్వాత క్రమంగా క్షీణిస్తుందని నిపుణులు చెబుతున్న విషయాన్ని సుజీత్‌ సింగ్‌ గుర్తుచేశారు. అయితే, ప్రస్తుతం దేశంలో కొత్త వేరియంట్లు గుర్తించలేదని ముఖ్యంగా Mu, C.1.2 వేరియంట్‌ల ప్రభావం ఇప్పటివరకు భారత్‌లో లేదని ఆయన పేర్కొన్నారు. కేవలం కొత్త వేరియంట్‌ వెలుగు చూసినంత మాత్రాన అది థర్డ్‌ వేవ్‌కు కారణం కాదని వ్యాఖ్యానించారు. వేరియంట్ల ప్రవర్తనతో పాటు యాంటీబాడీల పనితీరుపై అది ఆధారపడి ఉంటుందని.. ప్రస్తుతం పండగల సీజన్‌ కావడం కాస్త ఆందోళనకరంగా కనిపిస్తోందని చెప్పారు. కాగా, ఇటీవల ప్రపంచ ఆరోగ్య సంస్థ (డబ్ల్యూహెచ్ఓ) కూడా ఇదే అభిప్రాయం వ్యక్తం చేసింది. భారత్‌లో ఇక ఓ మోస్తరు స్థాయిలో ఎప్పటికీ ఉండిపోయే వ్యాధి దశలోకి కొవిడ్‌-19 మారుతున్నట్లు కనిపిస్తోందని చీఫ్ సైంటిస్ట్ డాక్టర్‌ సౌమ్య స్వామినాథన్‌ వెల్లడించారు.

By September 16, 2021 at 11:51AM

Read More https://telugu.samayam.com/latest-news/india-news/covid-may-become-more-manageable-in-6-months-says-ncdc-director/articleshow/86254190.cms