తాలిబన్ల దెబ్బకు భారీగా పడిపోయిన బైడెన్ గ్రాఫ్.. పోల్‌లో ఆసక్తికర విషయాలు

అఫ్గనిస్థాన్ నుంచి బలగాల ఉపసంహరణ విషయంలో అమెరికా అధ్యక్షుడు వైఖరిపై విమర్శలు వెల్లువెత్తుతున్న విషయం తెలిసిందే. తాలిబన్లు మెరుపు వేగంతో అఫ్గన్‌ను ఆక్రమించుకోవడంతో విదేశాలతోపాటు స్వదేశంలోనూ బైడెన్‌ను దుమ్మెత్తిపోస్తున్నారు. ఈ నేపథ్యంలో బైడెన్ పాపులారిటీ అమాంతం పడిపోయినట్టు ఓ సర్వే పేర్కొంది. జో విదేశాంగ విధానంతో మెజార్టీ అమెరికన్లు తీవ్రంగా విబేధించినట్టు ఎన్‌పీఆర్, పీబీఎస్ న్యూస్‌హవర్‌తో కలిసి నిర్వహించిన న్యూ మారిస్ట్ నేషనల్ పోల్‌లో వెల్లడయ్యింది. అంతేకాదు, అఫ్గన్‌లో అమెరికా విధానం కూడా విఫలమయ్యిందని చాలా మంది అభిప్రాయపడ్డారు. బైడెన్ పాపులారిటీ 43 శాతం కనిష్టానికి పడిపోగా.. అమెరికా అధ్యక్షుడిగా బాధ్యతలు చేపట్టిన తర్వాత ఇంతగా తగ్గిపోవడం ఇదే తొలిసారి. బైడెన్ విదేశాంగ విధానాన్ని 43 శాతం మంది సమర్ధించగా.. 56 శాతం మంది వ్యతిరేకించారు. అఫ్గనిస్థాన్ నుంచి బలగాల ఉపసంహరణను 61 శాతం మంది వ్యతిరేకించడం గమనార్హం. అంతేకాదు, అఫ్గన్‌లో అమెరికా విధానం పూర్తిగా విఫలమయ్యిందని 71 శాతం మంది అభిప్రాయపడ్డారు. అలా అభిప్రాయపడిన 71 శాతం మంది అమెరికన్లలో 73 శాతం మంది రిపబ్లికన్లు.. 66 శాతం మంది డెమొక్రాట్లు కూడా ఉన్నారు. ఇది బైడెన్ సొంత పార్టీ సహచరులల్లోనే ప్రధాన అసమ్మతిని సూచిస్తుంది. ఈ విభాగంలో 75 శాతం స్వతంత్ర రాజకీయ నాయకులు కూడా ఉన్నారు. అయితే, అధిక శాతం మంది అమెరికన్లు లేదా 61 శాతం మంది యూఎస్ ప్రమేయం లేకుండా అఫ్గన్లు తన భవిష్యత్తును నిర్ణయించుకోవాలని.. 29 శాతం మంది యుద్ధంలో పాల్గొనడం అమెరికా విధి అని నమ్ముతున్నారు. బలగాల ఉపసంహరణపై భిన్నాభిప్రాయాలు వ్యక్తం చేశారు. పూర్తిగా బలగాలను ఉపసంహరించడాన్ని 37 శాతం మంది సమర్ధించగా.. 38 శాతం మంది మాత్రం కొద్ది మందిని వెనక్కు తెచ్చి మిగతావారిని ఉంచాల్సిందని తెలిపారు. అలాగే, మరో 10 శాతం మంది ఉపసంహరించరాదని, మరో 5 శాతం మంది అదనంగా పంపాల్సిందని అభిప్రాయం వ్యక్తం చేశారు. అయితే, చివరిగా అఫ్గనిస్థాన్‌లో పరిస్థితులకు బైడెన్‌దే పూర్తి బాధ్యతని అమెరికన్లు భావించడం లేదని పోల్ వెల్లడించింది. మిలటరీ వైఫల్యానికి మాజీ అధ్యక్షుడు జార్జ్ డబ్ల్యూ బుష్ ప్రధాన కారణమని అత్యధికంగా 36 శాతం మంది తర్వాత బైడెన్ (21 శాతం), బరాక్ ఒబామా (15 శాతం), డొనాల్డ్ ట్రంప్ (12) అని తెలిపారు. బుష్ కారణమని 53 శాతం, డొనాల్డ్ ట్రంప్ కారణమని 22 శాతం మంది డెమొక్రాట్లు.. అలాగే బైడెన్ కారణమని 38 శాతం, ఒబామా కారణమని 34 శాతం మంది రిపబ్లికన్‌లు పేర్కొన్నారు.

By September 03, 2021 at 10:34AM

Read More https://telugu.samayam.com/latest-news/international-news/us-president-joe-biden-approval-rating-at-all-time-low-after-afghanistan-withdrawal/articleshow/85889222.cms