ఆర్డర్ సిద్ధం చేయడంలో జాప్యం.. రెస్టారెంట్ యజమానిని హత్యచేసిన స్విగ్గీ బాయ్!
ఆర్డర్ సిద్ధం చేయడంలో జాప్యం జరిగిందని రెస్టారెండ్ యజమానిని స్విగ్గీ డెలివరీ బాయ్ కాల్చిచంపాడు. ఈ ఘటన ఢిల్లీ సమీపంలోని గ్రేటర్ నోయిడాలో మంగళవారం రాత్రి చోటుచేసుకుంది. ఈ ఘటనపై కేసు నమోదు చేసిన పోలీసులు.. ఆ ప్రాంతంలోని సీసీటీవీ ఫుటేజీలను పరిశీలించి నిందితుడ్ని పట్టుకున్నారు. రెస్టారెంట్‌లో ఆర్డర్ తీసుకోడానికి బైక్‌పై వచ్చిన ముగ్గురు యువకులు.. పార్శిల్ ఆలస్యం కావడంతో రెస్టారెంట్ ఉద్యోగితో గొడవ పడ్డారు. వారిని వారించడానికి రెస్టారెంట్ యజమాని ప్రయత్నిస్తే ఆయనను కాల్పిచంపారు. పోలీసుల వివరాల ప్రకారం.. ‘‘చికెన్ బిర్యానీ, పూరీ సబ్జీ ఆర్డర్ తీసుకోడానికి స్విగ్గీ డెలివరీ బాయ్ ఓ రెస్టారెంట్‌కు వెళ్లాడు.. బిర్యానీ సిద్ధంగా ఉన్నప్పటికీ అక్కడ పనిచేసే ఓ వ్యక్తి ఆర్డర్‌కు మరికొంత సమయం పడుతుందని చెప్పాడు. దీంతో ఇద్దరి మధ్య వాగ్వాదం చోటు చేసుకుంది. ఈ క్రమంలో రెస్టారెంట్ ఉద్యోగిని డెలివరీ బాయ్ అసభ్య పదజాలంతో దూషించాడు... ఈ సమయంలో రెస్టారెంట్ యజమాని సునీల్ అగర్వాల్ సమస్యను పరిష్కరించడానికి ప్రయత్నించాడు. అయితే డెలివరీ ఏజెంట్ మరో ఇద్దరితో కలిసి రెస్టారెంట్ యజమాని తలపై తుపాకితో కాల్చాడు’’ అని పోలీసులు తెలిపారు. రెస్టారెంట్ సిబ్బంది అతడిని ఆసుపత్రికి తరలించగా అప్పటికే యజమాని చనిపోయినట్టు వైద్యులు ధ్రువీకరించారు. హత్యకు గురైన వ్యక్తిని సునీల్ అగర్వాల్‌గా గుర్తించామని, నొయిడాలోని మిత్రా నివాస సముదాయం లోపల ఓ రెస్టారెంట్ నడుపుతున్నాడని పోలీసులు తెలిపారు. గొడవకు దిగిన సమయంలో ముగ్గురూ మద్యం సేవించి ఉన్నారని రెస్టారెంట్ సిబ్బంది పేర్కొన్నారు. కాల్పుల జరిపిన తర్వాత నిందితులు అక్కడ నుంచి బైక్‌పై పరారయ్యారని వివరించారు. రెస్టారెంట్ సమీపంలోని ఓ ప్రదేశంలో ముగ్గురు నిందితులను గుర్తించారు. వారి పట్టుకోడానికి పోలీసులకు కాల్పులు జరపాల్సి వచ్చింది. ఓ నిందితుడి కాళ్లపై బుల్లెట్ గాయం కాగా.. ముగ్గుర్నీ అదుపులోకి తీసుకున్నారు. కేసు నమోదుచేసిన పోలీసులు దర్యాప్తు చేపట్టారు. ఈ ఘటనపై స్విగ్గీ సంస్థ తీవ్ర ఆందోళన వ్యక్తం చేసింది. దారుణానికి ఒడిగట్టిన వ్యక్తికి స్విగ్గీతో సంబంధం ఉందా? అనేది ధ్రువీకరించడానికి సంబంధిత అధికారులను సంప్రదించామని తెలిపింది.
By September 02, 2021 at 07:22AM
No comments