ఐరాస ఉగ్రవాదుల జాబితాలోని 14 మందికి తాలిబన్ ప్రభుత్వంలో చోటు!
అఫ్గనిస్థాన్‌లో ఏర్పడిన తాలిబన్ల ప్రభుత్వంలో ఐక్యరాజ్యసమితి ధ్రువీకరించిన మోస్ట్ వాంటెడ్ ఉగ్రవాదులు 14 మందికి చోటుదక్కింది. ప్రపంచ వ్యాప్తంగా తీవ్రమైన నేర, ఉగ్రవాద కార్యకలాపాలకు పాల్పడిన వారిని ఐరాస భద్రతా మండలి గుర్తించి, ఆంక్షలు విధిస్తున్న విషయం తెలిసిందే. ఈ నేపథ్యంలో ఐరాస భద్రతా మండలి ఆంక్షల జాబితాలోని డ్రగ్స్‌ మాఫియా, హత్యలు, ఉగ్రవాద కార్యకలాపాలు లాంటి హీనమైన చర్యలకు పాల్పడినవారి జాబితాలో అఫ్గన్ కొత్త ప్రధాని ముల్లా మహ్మద్‌ హసన్ అఖుండ్, డిప్యూటీ పీఎం సహా ప్రావిన్స్‌ గవర్నర్ల ఉన్నారు. ప్రధాని ముల్లా అహ్మద్ హసన్ అఖుండ్.. 1996 నుంచి 2001 వరకు నాటి తాలిబన్ ప్రభుత్వంలో విదేశాంగ మంత్రిగా పనిచేశారు. తాలిబన్ వ్యవస్థాపకుడు మల్లా ఒమర్‌కు అత్యంత సన్నిహితుడైన అఖుండ్ ఐరాస ఆంక్షల జాబితాలో చాలా కాలం నుంచి కొనసాగుతున్నారు. ఇక, డిప్యూటీ పీఎంగా నియమితులైన ముల్లా అబ్దుల్‌ ఘనీ బరాదర్‌‌ది మరింత ఘనమై చరిత్ర. మాజీ ఉగ్రవాదిని 2010లో అమెరికా బంధించి.. పాకిస్థాన్‌ జైలుకు తరలించింది. అయితే, 2018లో ట్రంప్‌ యంత్రాంగం రహస్య ఆదేశాలతో బరాదర్‌ను పాక్ ప్రభుత్వం విడుదల చేసింది. మరో డిప్యూటీ ప్రధాని అబ్దుల్‌ సలాం హనాఫీది కూడా అంతకంటే ఘోరమైన నేర చరిత్ర. ఇక, కరడుగట్టిన ఉగ్రవాదులపై లక్ష డాలర్లు రివార్డులను అమెరికా ప్రకటిస్తుంది. ఆ జాబితాకు చెందిన వ్యక్తే అఫ్గన్ అంతర్గత వ్యవహారాల శాఖ కొత్త మంత్రి సిరాజుద్దీన్‌ హక్కానీ. అఫ్గన్ మాజీ ప్రధాని హమీద్‌ కర్జాయ్‌‌పై హత్యాయత్నం సహా పలు ఉగ్రవాద కార్యకలాపాల్లో ప్రధాన నిందితుడిగా ఉన్నారు. అతడిపై అమెరికా 50 లక్షల డాలర్లు రివార్డును ప్రకటించింది. కరడుగట్టిన అంతర్జాతీయ ఉగ్రవాదులను గ్వాంటెనామో బే జైలులో అమెరికా ఉంచుతుంది. ఆ జైలులో శిక్ష అనుభవించిన నలుగురికి తాజా తాలిబన్ మంత్రివర్గంలో చోటుదక్కడం గమనార్హం. మహమ్మద్‌ ఫాజిల్‌, ఖైరుల్లా, ముల్లా నూరుల్లా నూరిలు, అఫ్గాన్‌ నిఘా అధిపతి ముల్లా అబ్దుల్‌ హక్‌ వాసిఖ్‌ అక్కడ జైలులో ఖైదీలుగా ఉన్నారు. తాలిబన్ సహ వ్యవస్థాపకుడు ముల్లా ఒమర్ తనయుడు, రక్షణ మంత్రి ముల్లా యాకూబ్‌, విదేశాంగ మంత్రి ముల్లా అమీర్‌ ఖాన్‌, ఆయన సహాయకుడు మహ్మద్‌ అబ్బాస్‌లను ఐరాస భద్రతా మండలి 1988 ఆంక్షల కమిటీ ఉగ్రవాదులుగా పరిగణించి నిషేధం విధించింది.
By September 09, 2021 at 08:19AM
No comments