ZyCoV-D దేశంలో 12 ఏళ్లు దాటిన పిల్లలకు తొలి టీకా.. జైడస్ క్యాడిలా జైకోవ్-డికి ఆమోదం
దేశంలో మరో కోవిడ్-19 వ్యాక్సిన్‌ అత్యవసర వినియోగానికి అందుబాటులోకి రానుంది. జైడస్ క్యాడిలా ఫార్మ అభివృద్ధి చేసిన ‘జైకోవ్-డి’ టీకాకు డ్రగ్స్ కంట్రోల్ జనరల్ ఆఫ్ ఇండియా () శుక్రవారం ఆమోదం తెలిపింది. దీంతో దేశంలో అత్యవసర వినియోగానికి ఆరో వ్యాక్సిన్‌కు ఆమోదం లభించింది. మిగతా వాటికి భిన్నంగా మూడు డోసుల ఈ టీకాను 12 ఏళ్లు దాటిన చిన్నారులకు ఇవ్వవచ్చు. ఈ వయసువారికి దేశంలో అందుబాటులోకి వచ్చిన తొలి కొవిడ్‌ టీకా ఇదే కావడం విశేషం. ‘జైకోవ్-డి’ప్రపంచంలోనే డీఎన్‌ఏ ఆధారంగా రూపొందిన మొట్టమెదటి కోవిడ్ వ్యాక్సిన్‌ అని బయోటెక్నాలజీ విభాగం (డీబీటీ) ప్రకటించింది. ‘మిషన్‌ కొవిడ్‌ సురక్ష’ కింద డీబీటీ భాగస్వామ్యంతో ఈ టీకాను అభివృద్ధి చేశారు. జైకోవ్-డికి ఆమోదం లభించడంపై ప్రధాన మంత్రి నరేంద్ర మోదీ హర్షం వ్యక్తం చేశారు. భారత శాస్త్రవేత్తల నూతన ఆవిష్కార సామర్థ్యానికి ఇది మచ్చు తునక అని ఆయన కితాబిచ్చారు. జైడస్ క్యాడిలా వ్యాక్సిన్‌ అత్యవసర వినియోగానికి అనుమతినివ్వాలని భారత కేంద్ర ఔషధ ప్రమాణాల నియంత్రణ సంస్థ (సీడీఎస్‌సీఓ) నిపుణుల కమిటీ సిఫార్సు చేయడంతో డీసీజీఐ ఆమోదం తెలిపింది. భారత్‌లో ఇప్పటికే కొవాగ్జిన్, కొవిషీల్డ్‌, స్పుత్నిక్‌-వీ, మోడెర్నా, జాన్సన్‌ అండ్‌ జాన్సన్‌ వ్యాక్సిన్ల వినియోగానికి అనుమతి లభించిన సంగతి తెలిసిందే. అయితే, కొవాగ్జిన్, కొవిషీల్డ్‌, స్పుత్నిక్‌-వీ టీకాలు మాత్రమే ప్రస్తుతం వినియోగంలో ఉన్నాయి. భారత్ బయోటెక్ కొవాగ్జిన్ తర్వాత స్వదేశీ పరిజ్ఞానంతో తయారైన రెండో టీకా‘జైకోవ్-డి’. ఏడాదికి 10-12 కోట్ల డోసులను ఉత్పత్తి చేయాలని లక్ష్యంగా పెట్టుకున్నట్లు జైడస్ క్యాడిలా ఈ సందర్భంగా తెలిపింది. ప్లాస్మిడ్‌ డీఎన్‌ఏ సాంకేతికత ఆధారంగా తయారైన ఈ టీకా.. కోవిడ్ స్పైక్‌ ప్రొటీన్‌ను ఉత్పత్తి చేసేలా శరీరానికి ఇది సంకేతాలిస్తుంది. దీని వల్ల శరీరంలో యాంటీబాడీలు తయారై.. కొవిడ్‌ నుంచి రక్షణ, వైరస్‌ నిర్మూలనలో కీలక పాత్ర పోషిస్తుందని డీబీటీ తెలిపింది. సూది వినియోగించకుండానే ఫార్మజెట్ అనే సాధనం ద్వారా జైకోవ్-డిని చర్మంలోకి ఎక్కిస్తారు. కొవిడ్‌ నుంచి రక్షణ కల్పించడంలో ఈ వ్యాక్సిన్‌ 66.6 శాతం సమర్థతను చాటినట్లు మూడో దశ క్లినికల్ ప్రయోగాలకు సంబంధించిన మధ్యంతర ఫలితాలు చెబుతున్నాయి. మూడు దశల క్లినికల్ ట్రయల్స్‌లో దేశవ్యాప్తంగా 28వేల వాలంటీర్లు పాల్గొన్నారు.
By August 21, 2021 at 06:55AM
No comments