మైసూరు గ్యాంగ్ రేప్: కీలక మలుపు.. స్టేట్‌మెంట్ ఇవ్వకుండా వెళ్లిపోయిన బాధితురాలు
మైసూర్ సామూహిక అత్యాచారం ఘటనలో పట్టుబడిన నిందితులకు కోర్టు పది రోజుల పోలీస్ కస్టడీ విధించింది. ఇదిలా ఉండగా అత్యాచార బాధితురాలు పోలీసులు తన వాంగ్మూలం రికార్డు చేయకుండానే మైసూర్ నగరం నుంచి తల్లిదండ్రులతో వెళ్లిపోయినట్టు విశ్వసనీయ వర్గాలు తెలిపాయి. నిందితులను అరెస్ట్ చేసినా.. కేసుకు బలమైన ఆధారాలు లేకుండా పోయిందని పోలీసులు భావిస్తున్నారు. స్టేట్‌మెంట్ రికార్డ్ చేయడానికి ఆమె సుముఖంగా లేదని పోలీసు వర్గాలు తెలిపాయి. బాధితురాలు షాక్‌లో ఉన్నందున ఆమె స్టేట్మెంట్ను పోలీసులు రికార్డ్ చేయలేకపోయారని ఇంతకు ముందు కర్ణాటక ప్రభుత్వం తెలిపింది. పోలీసులు ఐదుగురు నిందితుల్ని అరెస్ట్ చేయగా... నిందితులందరూ తమిళనాడుకు చెందిన కూలీలే. తమిళనాడులోని తిరుప్పూర్‌ జిల్లాకు చెందిన వీరు.. మైసూరులో రోజుకూలీలుగా పనిచేస్తున్నారని పోలీసులు తెలిపారు. ఈ కేసుతో సంబంధం ఉన్న మరో వ్యక్తి పరారీలో ఉన్నాడని, అతడి కోసం గాలిస్తున్నామని వెల్లడించారు. నిందితులలో భూపతి అనే వ్యక్తి తప్ప, ఇతరుల పేర్లు వెల్లడించని పోలీసులు, వారి ఫోటోలను మాత్రం మీడియాకు విడుదల చేశారు. విచారణలో అనేక అంశాలు వారు వెల్లడిస్తున్నట్లు పోలీసు ఉన్నతాధికారి ఒకరు తెలిపారు. ఆగస్టు 24న మైసూర్ నగర శివారుల్లో ఎంబీఏ విద్యార్థిని అత్యంత దారుణంగా గ్యాంగ్ రేప్‌కు గురైంది. ఆమె వెంటే ఉన్న స్నేహితుడిపై దాడి చేసి ఐదుగురు నిందితులు ఈ అఘాయిత్యానికి పాల్పడ్డారు. ఆ మెను చిత్రహింసలకు గురిచేసి రాక్షసానందం పొందారు. అపస్మారక స్థితిలో ఉన్న బాధితురాలిని ఆస్పత్రికి తరలించి చికిత్స అందించారు. ఆసుపత్రిలో చికిత్స పొందుతున్న ఆమె.. ఇంకా షాక్‌ నుంచి తేరుకోని కారణంగా పోలీసులు ఆమె నుంచి వివరాలు సేకరించలేకపోతున్నారని హోం మంత్రి అరగా జ్ఞానేంద్ర ప్రకటించారు. తలపై బలంగా కొట్టడంతో బాధితురాలి మిత్రుడు కూడా తీవ్రంగా గాయపడ్డాడు. ఆస్పత్రిలో చికిత్స పొందుతున్న అతడి స్టేట్మెంట్ను ప్రత్యేక దర్యాప్తు బృందం రికార్డ్ చేసింది. ఈ వాంగ్మూలంలో అతడు కీలక విషయాలు వెల్లడించాడు. ఘటన జరిగిన ప్రాంతం తనకు చాలా కాలం నుంచి తెలుసునని, రోజూ అక్కడికి జాగింగ్‌కు వెళ్లేవాడని అతడు తెలిపాడు.
By August 30, 2021 at 11:03AM
No comments