తాగడానికి నీళ్లు లేక చంటి బిడ్డతో కాబూల్ ఎయిర్‌పోర్ట్ వద్ద భారతీయ మహిళ పడిగాపులు
అఫ్గనిస్థాన్‌ను ఆక్రమించుకున్న తర్వాత వేలాది మంది అక్కడ నుంచి విడిచి వెళ్లిపోతున్నారు. విదేశీయులు సహా అఫ్గన్ పౌరులు విమానాలు ఎక్కేందుకు వద్ద పడిగాపులు కాస్తున్నారు. మహిళలు, అభాగ్యులైన చిన్నారులు దిక్కుతోచని స్థితిలో చిక్కుకున్నారు. వీరిలో వందలాది మంది భారతీయులు కూడా ఉన్నారు. అక్కడ చిక్కుకున్న వారిని ప్రత్యేక విమానాల్లో భారత వైమానిక దళం తరలిస్తున్నా.. కానీ, చాలా మంది భయంతో అలసిపోయి, నిరాశగా ఎదురుచూస్తున్నారు. మూడు రోజులుగా కాబూల్ విమానాశ్రయం బయట వేచిచూస్తున్న ఓ మహిళ, ఆమె రెండేళ్ల కుమారుడు భయంకర పరిస్థితిని ఎదుర్కొంటున్నారని భారత్‌లోని ఆమె తల్లి వాపోయింది. అఫ్గన్ పౌరుడ్ని వివాహమాడిన ఆ భారతీయ యువతి.. సురక్షితంగా తనను భారత్‌కు తరలిస్తారని గత మూడు రోజులుగా కళ్లు కాయలు కాచేలా చూస్తోంది. అక్కడ తన కుమార్తె పరిస్థితి గురించి ఆమె తల్లి మాట్లాడుతూ.. ‘మూడు రోజుల కిందట కాబూల్‌లోని భారత రాయబార కార్యాలయం సిబ్బంది ఫోన్ చేసి.. ఎటువంటి లగేజ్ తీసుకోకుండా విమానాశ్రయానికి రావాలని చెప్పారు..మూడు రోజుల పాటు విమానాశ్రయం సమీపంలోని ఓ వెడ్డింగ్ హాల్‌లో ఆశ్రయం కల్పించి బయకు రావొద్దని సూచించారు’ అని తెలిపింది. ‘శుక్రవారం అర్ధరాత్రి 12 గంటల సమయంలో వారిని విమానాశ్రయానికి ఓ బస్సులో బయలుదేరారు.. వారంతా శనివారం ఉదయం 11 గంటల వరకూ బస్సులో ఉన్నారు.. ఇదే సమయంలో తాలిబన్లు వచ్చి 150 మందిని తీసుకెళ్లారు.. ఆ ప్రదేశానికి సమీపంలో ఉండే మా అల్లుడు తన సోదరుడికి ఫోన్ చేసి అక్కడ నుంచి తీసుకెళ్లాలని చెప్పాడు.. పత్రాలను పరిశీలించిన తర్వాత తమ వెంట తీసుకెళ్లినవారిని తాలిబన్లు వదిలిపెట్టారు.. నా కుమార్తె, మనవడు ఎయిర్‌పోర్ట్ వెలుపలే ఉన్నారు’ అని ఆవేదన వ్యక్తం చేసింది. ‘గత మూడు రోజుల నుంచి రోడ్డుమీదే ఉన్న నా కుమార్తెకు తాగడానికి నీళ్లు కూడా దొరకలేదు.. మనవడికి ఆహారం కనీసం పాలు కూడా లేవు.. వారిని సురక్షితంగా భారత్‌కు తీసుకురావాలని కేంద్ర ప్రభుత్వాన్ని వేడుకుంటున్నాను’అని కన్నీటి పర్యంతమయ్యింది. కాబూల్ విమానాశ్రయం సమీపంలో వెడ్డింగ్ హాల్‌లో దాదాపు 250 నుంచి 300 మంది భారతీయులు ఉన్నట్టు తెలుస్తోంది.
By August 22, 2021 at 08:11AM
No comments