Breaking News

కామవాంఛ లేకుండా బాలిక బుగ్గను తాకితే లైంగిక దాడిగా భావించలేం: బాంబే హైకోర్టు


ఎటువంటి దురుద్దేశం లేకుండా బాలిక బుగ్గను తాకడం పోక్సో చట్టం కింద లైంగిక దాడిగా పరిగణించలేమని స్పష్టం చేసింది. ఈ కేసులో నిందితుడిగా ఉన్న వ్యక్తికి బెయిల్ మంజూరు చేసింది. ‘కామ వాంఛ లేకుండా బుగ్గలు తాకడం లైంగిక దాడి కాదని పోక్సో చట్టంలోని సెక్షన్‌-7 చెబుతోంది.. ఆధారాలను ప్రాథమికంగా పరిశీలించినప్పుడు నిందితుడు లైంగిక వాంఛతో బుగ్గలు తాకినట్టు అనిపించలేదు’ జస్టిస్‌ సందీప్‌ షిండే ఏకసభ్య ధర్మాసనం ఈ వ్యాఖ్యలు చేసింది. థానేకు చెందిన నిందితుడు మహమ్మద్‌ అహ్మద్‌ ఉల్లా (46) మాంసం దుకాణం నడుపుతున్నాడు. అయితే, 2020 జులైలో తన దుకాణం వద్ద ఓ ఎనిమిదేళ్ల బాలిక బుగ్గను ఉల్లా తాకినట్టు కేసు నమోదయింది. చిన్నారని దుకాణంలోకి పిలిచి, బుగ్గను తాకిన తర్వాత చొక్కా విప్పాడని, ప్యాంటు కూడా తీయబోయాడని ఆరోపణలు వచ్చాయి. అప్పుడే అక్కడికి వెళ్లిన బాలిక తల్లి దీన్ని గమనించి ఫిర్యాదు చేసిందని పోలీసులు తెలిపారు. బాలికను దుకాణంలోకి తీసుకెళ్లడాన్ని చూసిన ఆమె అనుమానంతో అక్కడికి వెళ్లిందని పేర్కొన్నారు. బాలిక ఒంటరిగా రావడంతో దుకాణం బయటకువచ్చి చుట్టుపక్కల ఎవరూ లేరని నిర్ధారించుకున్న తర్వాత.. లోపలికి తీసుకెళ్లాడని ఆరోపించింది. ఈ ఫిర్యాదు ఆధారంగా అతడిని అరెస్టు చేసిన పోలీసులు.. తలోజా జైలుకు తరలించారు. పదమూడు నెలలుగానే జైలులో ఉన్న నిందితుడు... బెయిల్‌ కోసం బాంబే హైకోర్టును ఆశ్రయించాడు. వ్యాపారాన్ని దెబ్బతీయడానికే ప్రత్యర్థులు కుట్ర పన్ని తనను కేసులో ఇరికించారని, తానెలాంటి నేరమూ చేయలేదని ఉల్లా వాదించాడు. అతడి వాదనలు విన్న న్యాయమూర్తి బెయిల్‌ మంజూరు చేశారు. తుదితీర్పుపై తన వ్యాఖ్యల ప్రభావం ఉండకూడదని న్యాయమూర్తి ఉద్ఘాటించారు. నిందితుడి తరఫున వాదనలు వినిపించిన లాయర్.. తన క్లయింట్‌‌పైనే కుటుంబం మొత్తం ఆధారపడి ఉందని, వ్యాపారం చేసుకుంటున్నాడని తెలిపారు. అందువల్ల బెయిల్‌పై బయటకొచ్చిన తర్వాత విచారణకు అందుబాటులో ఉండడనే ప్రశ్నే ఉత్పన్నం కాదన్నారు.


By August 30, 2021 at 09:08AM


Read More https://telugu.samayam.com/latest-news/india-news/touching-kids-cheeks-not-sexual-assault-says-bombay-high-court/articleshow/85756256.cms

No comments