రియల్ వంటలక్క... 30 నిమిషాల్లో 134 వంటకాలు.. ఇండియా బుక్‌ ఆఫ్‌ రికార్డ్స్‌లో చోటు

వంట చేయడం పెద్ద కష్టమా అంటూ చాలామంది మగాళ్లు తమ భార్యలను సూటిపోటి మాటలు అంటుంటారు. తీరా ఆమె ఒకట్రెండు రోజులు ఇంట్లో లేకపోతే కిచెన్‌లోకి వెళ్లాడానికే వణికిపోతారు. వంటలు చేయటమంటే అంతా ఆషామాషీ కాదని ఆ సందర్భంలోనే తెలుస్తుంది. అయితే రోజూ కుటుంబానికి అవసరమైన వంటలు చేయడం కాస్త సులభమే అయినా... తక్కువ సమయంలో అందరినీ మెప్పించేలా ఎక్కువ వంటకాలు చేయాలంటే మాత్రం సాహసమనే చెప్పాలి. ఆ సాహసాన్ని చేసి రికార్డు నెలకొల్పారు తమిళనాడులోని మదురైకి చెందిన ఇందిరా రవిచంద్రన్‌ అనే మహిళ. కేవలం 30 నిమిషాల సమయంలో ఏకంగా 134 వంటకాలు సిద్ధం చేసి పాక కళలో సరికొత్త రికార్డు సృష్టించారు. జిల్లా తిరుమంగలానికి చెందిన ఇందిరా రవిచంద్రన్‌ వంటలు చేయడంలో దిట్ట. ఈ క్రమంలోనే వంటలు చేయడంలో రికార్డు సృష్టించాలని సంకల్పించుకున్నారు. ఇందుకోసం సాధన చేసిన ఆమె ఇండియా బుక్‌ ఆఫ్‌ రికార్డ్స్‌ ప్రతినిధి పర్యవేక్షణలో సోమవారం 30 నిమిషాల్లో శాకాహార, మాంసాహార వంటలు కలిపి మొత్తం 134 రకాల ఆహార పదార్థాలను తయారు చేసి ఔరా అనిపించారు. ఆమె తయారు చేసిన వాటిలో దోస, ఇడ్లీ, ఆమ్లెట్, ఊతప్పం, ఐస్‌క్రీమ్, కోడికూర, బిర్యానీ, ఫిష్ కర్రీ వంటి అనేక రుచికరమైన ఆహార పదార్ధాలు ఉన్నాయి. ఇంతకుముందు ఒక గంటలో 122 రకాల వంటకాలను చేసి కేరళకు చెందిన హెయన్‌ అనే పదేళ్ల బాలుడు ఇండియా బుక్‌ ఆఫ్‌ రికార్డ్స్‌లో స్థానం సంపాదించాడు. తాజాగా ఆమె 30 నిమిషాల్లో 134 రకాల వంటకాలు తయారు చేసి ఇండియా బుక్‌ ఆఫ్‌ రికార్డ్స్‌లో చోటు దక్కించుకున్నారు. దీంతో ఇందిరా రవిచంద్రన్‌పై ప్రశంసలు జల్లు కురుస్తోంది. ప్రస్తుతం ఆమె తమిళనాడులో పెద్ద సెలబ్రెటీగా మారిపోయారు. అనేక టివి ఛానళ్ళు తమ వంటల కార్యక్రమంలో న్యాయనిర్ణేతగా వ్యవహరించాలంటూ ఆమెను ఆహ్వానిస్తున్నాయట.

By August 24, 2021 at 08:01AM

Read More https://telugu.samayam.com/latest-news/india-news/tamil-nadu-woman-whips-up-134-dishes-in-30-mins-sets-new-record/articleshow/85582169.cms