Maa Elections: రంగంలోకి రెబల్ స్టార్.. వాటికి పుల్ స్టాప్ పెట్టేలా కృష్ణం రాజు నిర్ణయం!
మూవీ ఆర్టిస్ట్స్‌ అసోసియేషన్‌ (మా) ఎన్నికల ప్రక్రియలో రోజుకో కొత్త మలుపు తిరుగుతోంది. ఇక ఇప్పుడు ‘మా’ను చక్కబెట్టేందుకు రెబల్ స్టార్ కృష్ణంరాజు రంగంలోకి దిగినట్టు తెలుస్తోంది. ఎన్నికలు ఎప్పుడు జరుపుతారు? ఏకగ్రీవం చేయండి.. పెద్దలు అందరూ నిర్ణయించండి అని ఇలా రకరకాల ప్రశ్నలు ప్రతిపాదనలు వస్తున్న నేపథ్యంలో కృష్ణంరాజు నిర్ణయమే కీలకంగా మారనున్నట్టు తెలుస్తోంది. ఎన్నికలు ఎప్పుడు జరపాలనే విషయంపై తుది నిర్ణయాన్ని ‘మా’ క్రమశిక్షణా సంఘం అధ్యక్షుడు కృష్ణంరాజుకే వదిలేసినట్లు సమాచారం. ఇప్పటికే ఒకరిపై ఒకరు ఆరోపణలు, విమర్శలు చేసుకుంటూ మీడియాకెక్కుతున్నారు. ఇలాంటి తరుణంలో విభేదాలు మరింత ముదరకుండా కొందరు పెద్దలు తమ ప్రయత్నాలను ముమ్మరం చేశారు. మామూలుగా అయితే ‘మా’లోని సభ్యుల మధ్య తలెత్తిన విభేదాలను పరిష్కరించటానికి, కార్యక్రమాలు సజావుగా జరిగేలా చూడటానికి 2019లో కృష్ణంరాజు అధ్యక్షతన క్రమశిక్షణ సంఘాన్ని ఏర్పాటు చేశారు. ఇందులో చిరంజీవి, మురళీమోహన్‌, జయసుధ, మోహన్‌బాబు ఈ సంఘంలో సభ్యులన్న సంగతి తెలిసిందే. ‘మా’కు సంబంధించి ఈ సంఘానిదే తుదినిర్ణయం. అయితే సుమారు నాలుగు నెలల క్రితం చిరంజీవి క్రమశిక్షణ సంఘ సభ్యత్వానికి రాజీనామా చేశారు. కానీ దీనిని ఇతర సభ్యులు ఇంకా అంగీకరించలేదు. అధికారికంగా ఆయన ఆ పదవిలో కొనసాగుతున్నట్లే లెక్క. ఇప్పుడు వీరంతా కలిసి ఎలాంటి నిర్ణయం తీసుకుంటారా? అనే చర్చ కొనసాగుతోంది. ప్రస్తుత ‘మా’ ఎగ్జిక్యూటివ్‌ కమిటీ పదవీకాలం ఈ ఏడాది మార్చిలో ముగిసింది. అయితే కోవిడ్‌ వల్ల ఎన్నికలు వాయిదా పడ్డాయి. సెప్టెంబర్‌లో ఎన్నికలు జరుపుతామని ప్రస్తుత అధ్యక్షుడు నరేష్ ఇది వరకే క్లారిటీ ఇచ్చారు. మళ్లీ ఆ మధ్య ప్రకాష్ రాజ్ ప్రశ్నలు వేయడంతో కాస్త సెటైరికల్‌గానే నరేష్ జవాబిచ్చారు. అయితే ఈ విషయాలన్నీ కూడా కృష్ణంరాజుకు చేరాయని సమాచారం. ఎన్నికలు ఎప్పడు జరపాలనే విషయంపై అభిప్రాయాలను చెప్పాలంటూ కృష్ణంరాజు మిగిలిన నలుగురు సభ్యులను కోరినట్లు తెలుస్తోంది. వీరి నుంచి సమాధానాలు వచ్చిన తర్వాత ఆయన తుది నిర్ణయం వెల్లడించే అవకాశముంది. అలా ఒక్క సారి కృష్ణంరాజు నిర్ణయం తీసుకుంటే అదే ఫైనల్ అవుతుంది. ఇక ఎలాంటి నిర్ణయం తీసుకుంటారో చూడాలి. ఏకగ్రీవం చేస్తారో.. లేదంటే ప్రస్తుతానికి ఓ తాత్కాలిక కమిటీ, దానికి ఓ అధ్యక్షుడిని నియమిస్తారో చూడాలి.
By July 17, 2021 at 09:50AM
No comments