డెల్టా స్ట్రెయిన్‌కు డోస్‌ల వ్యవధి తక్కువే ఉండాలి.. Lancet Study

కరోనా అసలు స్ట్రెయిన్‌తో పోల్చితే భారత్‌లో తొలిసారి గుర్తించిన డెల్టా వేరియంట్‌పై ఫైజర్ వ్యాక్సిన్ అంత సమర్ధవంతంగా పనిచేయడంలేదని ఓ అధ్యయనం పేర్కొంది. కేవలం ఒక్క డోస్ తీసుకున్న వ్యక్తుల్లో ఈ వేరియంట్‌లకు యాంటీబాడీ ప్రతిస్పందన ఇంకా తక్కువగా ఉందని, డోస్‌ల మధ్య వ్యవధి డెల్టా వేరియంట్‌కు వ్యతిరేకంగా ప్రతిరోధకాలను గణనీయంగా తగ్గిస్తుందని తెలిపింది. ఈ మేరకు లాన్సెట్ జర్నల్‌ ఓ అధ్యయనాన్ని ప్రచురించింది. ‘ ఒక్క డోస్ తీసుకున్నవారిలో కరోనా వైరస్ అసలు స్ట్రెయిన్‌పై 79 శాతం ప్రభావం చూపింది.. కానీ, యూకే వేరియంట్‌ (అల్ఫా) పై 50 శాతం, డెల్టాపై 32 శాతం, దక్షిణాఫ్రికా స్ట్రెయిన్ (బీటా)పై 25 శాతం మాత్రమే సమర్ధంగా పనిచేస్తోంది’ అని వివరించింది. టీకాలు సాధ్యమైనంత ఎక్కువ మందిని ఆసుపత్రికి దూరంగా ఉండేలా చూడటం చాలా ముఖ్యం అని పరిశోధకులు గమనిస్తున్నారు. ‘దీనికి మంచి మార్గం రెండో డోస్‌లను త్వరగా పంపిణీ చేయడం.. కొత్త వేరియంట్‌లకు వ్యతిరేకంగా రోగనిరోధక శక్తి తగినంతగా లేనివారికి బూస్టర్‌ డోస్‌లను అందజేయాలని మా ఫలితాలు సూచిస్తున్నాయి’ అని యూసీఎల్‌హెచ్ ఇన్‌ఫెక్టియస్ డిసీజెస్ కన్సల్టెంట్, సీనియర్ రిసెర్చ్ ఫెలో డాక్టర్ ఎమ్మా వాల్ అన్నారు. ఈ అధ్యయనం కోవిషీల్డ్ డోస్‌ల మధ్య వ్యవధిని ఆరు- ఎనిమిది వారాల నుంచి 12 నుంచి 16 వారాలకు పెంచుతూ భారత్ ఇటీవల తీసుకున్న నిర్ణయానికి విరుద్ధంగా ఉంది. టీకా ప్రభావం కాలక్రమేణా పెరిగిందని ప్రభుత్వం అధ్యయనాలను ఉదహరించింది. డోస్‌ల కొరత, వ్యాక్సిన్ల పరిమిత సరఫరాలో ఇబ్బందుల వల్ల వ్యాక్సినేషన్ విషయంలో ఒత్తిడి ఎదుర్కొవడంతో ప్రభుత్వం విరామాన్ని విస్తరించిందని విమర్శకులు ఆరోపిస్తున్నారు. రెండు డోస్‌ల మధ్య వ్యవధి ఆరు వారాల కంటే తక్కువ ఉంటే 55.1 శాతం.. 12 లేదా అంత కంటే ఎక్కువ వారాలు ఉంటే టీకా 81.3 శాతం సమర్ధవంతంగా పనిచేస్తున్నట్టు యూకేలోని ఓ అధ్యయనాన్ని ప్రభుత్వం ఉదాహరణగా చూపినట్టు విశ్వసనీయ వర్గాలు తెలిపాయి. అయితే, ఈ అధ్యయనం ఆధారంగా చేపట్టలేదని అన్నారు. అయితే, తాజా రెండు డోస్‌ల మధ్య వ్యవధిని తగ్గించడానికి యూకే తీసుకొచ్చిన ప్రస్తుత ప్రణాళికలకు మద్దతు ఇస్తుంది.. ఎందుకంటే ఫైజర్-బయోఎన్‌టెక్ వ్యాక్సిన్ తొలి డోస్ తీసుకున్న తర్వాత డెల్టా వేరియంట్‌కు వ్యతిరేకంగా యాంటీబాడీ స్థాయిలను అభివృద్ధి చేసే అవకాశం తక్కువగా ఉందని కనుగొన్నారు. యూకేలో వ్యాప్తికి కారణమైన ఆల్ఫా వేరియంట్‌ను మొదట కెంట్‌లో గుర్తించారు. డెల్టా వేరియంట్ దేశంలో ఆల్ఫాను అధిగమించిందని నిపుణులు భావిస్తున్నారు.., ఆల్ఫాతో పోల్చితే డెల్టా వేరియంట్ వల్ల ఆసుపత్రిలో చేరే ప్రమాదం ఎక్కువ ఉందని ముందస్తు ఆధారాలు సూచిస్తున్నాయని యూకే పబ్లిక్ హెల్త్ ఇంగ్లాండ్ (పీహెచ్ఈ) తెలిపింది. ఫైజర్-బయోఎన్‌టెక్ టీకా అసలు కరోనా స్ట్రెయిన్‌తో పోల్చితే డెల్టా వేరియంట్‌పై ఐదు రెట్లు తక్కువ యాంటీబాడీలను ఉత్పత్తి చేస్తున్నట్టు లాన్సెట్ తెలిపింది.

By June 05, 2021 at 10:58AM

Read More https://telugu.samayam.com/latest-news/international-news/for-delta-variant-need-shorter-gap-between-vaccine-doses-says-lancet-study/articleshow/83254423.cms