Chirag Paswan మలుపు తిరిగిన ఎల్జేజీ సంక్షోభం.. చిరాగ్ కజిన్‌పై రేప్ కేసు!
లోక్‌ జనశక్తి పార్టీ (ఎల్జేపీ)లో ఏర్పడిన సంక్షోభం బుధవారం మరో మలుపు తిరిగింది. తిరుగుబాటు వర్గంలోని ప్రిన్స్ రాజ్ పాశ్వాన్‌పై లైంగిక వేధింపుల కేసు నమోదయ్యింది. ప్రిన్స్ రాజ్ తనను లైంగికంగా వేధించినట్టు ఢిల్లీ కన్నాట్ ప్లేస్ పోలీస్ స్టేషన్‌లో బాధిత మహిళ ఫిర్యాదు చేసింది. ప్రిన్స్ రాజ్ తనపై అత్యాచారానికి పాల్పడినట్టు పార్టీలోని మహిళా నేత ఫిర్యాదు చేసిందని ఢిల్లీ పోలీస్ వర్గాలు తెలిపాయి. ప్రిన్స్ లైంగిక వేధింపుల గురించి బాబాయ్ పశుపతి పరాస్‌కు తెలియజేస్తూ మార్చి 29 లేఖ రాసినట్టు మంగళవారం దానిని మీడియాకు విడుదల చేశారు. ‘‘కన్నాట్ ప్లేస్ పోలీస్ స్టేషన్‌లో చిరాగ్ పాశ్వాన్ బాబాయి కుమారుడు ప్రిన్స్ రాజ్ పాశ్వాన్‌పై జూన్ 15న ఫిర్యాదు చేసిన ఓ మహిళ.. తనపై అత్యాచారానికి పాల్పడినట్టు ఆరోపించింది.. ఈ మేరకు మూడు పేజీల ఫిర్యాదు లేఖను రాసింది.. దీనిపై . ఎఫ్‌ఐఆర్ నమోదుచేసి దర్యాప్తు చేపట్టనున్నాం’’ అని ఢిల్లీ పోలీస్ వర్గాలు పేర్కొన్నాయి. న్యాయపరమైన అభిప్రాయాలు తీసుకుని, తదనుగుణంగా తదుపరి చట్టపరమైన చర్యలు తీసుకోవాలని ఢిల్లీ పోలీసులు భావిస్తున్నారు. మంగళవారం చిరాగ్ విడుదల చేసిన లేఖలో ‘‘కొద్ది రోజులుగా పార్టీతో సంబంధం ఉన్న ఒక మహిళ ప్రిన్స్‌పై లైంగిక వేధింపుల ఆరోపణలు చేస్తూ బ్లాక్ మెయిల్ చేస్తోంది.. కుటుంబ పెద్ద అయినందున, ఈ విషయంపై నేను మిమ్మల్ని సంప్రదించాను.. కానీ మీరు కూడా ఈ తీవ్రమైన విషయాన్ని విస్మరించారు. విస్మరించిన తరువాత ప్రిన్స్‌పై నిజానిజాలు బయటకు వచ్చి దోషి ఎవరో తెలుతుందని పోలీసుల వద్దకు వెళ్లమని సలహా ఇచ్చాను’’ అని చిరాగ్ అన్నారు. రాంవిలాస్‌ కుమారుడు చిరాగ్ పాశ్వాన్‌ను సోమవారం ఎల్జేపీ అధ్యక్ష పదవి నుంచి తొలగించిన విషయం తెలిసిందే. చిరాగ్‌తో కలిసి ఆ పార్టీ తరఫున ఆరుగురు లోక్‌సభ సభ్యులు ఉండగా, అందులో అయిదుగురు ఓ వర్గంగా ఏర్పడ్డారు. చిరాగ్ చిన్నాన్న, ఎంపీ పశుపతి కుమార్‌ పారస్‌ను తమ అధ్యక్షునిగా ఎన్నుకున్నారు. ఇందుకు బిహార్‌ అసెంబ్లీ ఎన్నికల్లో చిరాగ్ వ్యవహరించిన తీరే కారణం. ఎన్‌డీఏ నుంచి బయటకు రావడం, జేడీ(యూ), సీఎం నీతీశ్‌కు వ్యతిరేకంగా ఎల్జేపీ తరఫున అభ్యర్థులను నిలబెట్టడం అసంతృప్తికి దారితీసింది.
By June 17, 2021 at 08:12AM
No comments