Breaking News

జమ్మూ ఎయిర్ ఫోర్స్ స్టేషన్‌లో పేలుళ్లు.. డ్రోన్ల సాయంతో పేలుళ్లు!?


జమ్ము విమానాశ్రయంలో ఐదు నిమిషాల వ్యవధిలో రెండు పేలుళ్లు సంభవించాయి. ఆదివారం తెల్లవారుజామున 2 గంటల సమయంలో పేలుళ్లు సంభవించినట్టు భారత వైమానిక దళ(ఐఏఎఫ్‌) అధికారులు తెలిపారు. పేలుళ్ల ధాటికి విమానాశ్రయంలోని ఓ భవనం పైకప్పు దెబ్బతిందని, ఎటువంటి ప్రాణనష్టం జరగలేదని వెల్లడించారు. ఇద్దరు వాయుసేన సిబ్బంది గాయపడ్డారు. పేలుళ్ల గురించి సమాచారం అందుకున్న బాంబు స్క్యాడ్‌, ఫోరెన్సిక్‌ బృందాలు వెంటనే ఘటనా స్థలికి చేరుకుని తనిఖీలు ప్రారంభించాయి. ఈ ఘటనపై దర్యాప్తు కొనసాగుతోంది. జమ్మూ ఎయిర్‌ఫోర్స్ స్టేషన్ టెక్నికల్ ఏరియాలో ఆదివారం తెల్లవారు జామున పేలుళ్లు జరిగాయి. కట్టుదిట్టమైన భద్రత ఉండే ప్రాంతంలో ఈ పేలుళ్లు జరగడంతో రక్షణ విభాగం అప్రమత్తమైంది. ఈ పేలుళ్లు తక్కువ తీవ్రతతో సంభవించాయని, రెండు పేలుళ్లు జరిగాయని ఇండియన్ ఎయిర్‌ఫోర్స్ ట్విట్టర్ ద్వారా వెల్లడించింది. ఒక పేలుడు అర్ధరాత్రి ఒంటి గంట 37 నిమిషాలకు చోటు చేసుకోగా.. మరొకటి ఒంటి గంట 42 నిమిషాలకు చోటు చేసుకుంది. జమ్ము విమానాశ్రయ రన్‌వే, ఎయిర్‌ ట్రాఫిక్‌ కంట్రోల్‌ వ్యవస్థ ఐఏఎఫ్‌ నియంత్రణలో ఉంటాయి. స్థానిక పోలీసులతో కలిసి భద్రతా బలగాలు విమానాశ్రయం వెలుపల ముమ్మర గాలింపు చేపట్టాయి. పేలుళ్లు ఉగ్రవాదుల దుశ్చర్య అయి ఉండొచ్చనే కోణంలోనూ దర్యాప్తు కొనసాగుతోందని ఉన్నతాధికారులు తెలిపారు. ఎన్‌ఐఏ, ఎన్ఎస్‌జీ బలగాలు సైతం అక్కడికి చేరుకునే అవకాశం ఉంది. ఈ ఘటనపై రక్షణ మంత్రి రాజ్‌నాథ్ సింగ్.. వైస్ ఎయిర్ చీఫ్, ఎయిర్ మార్షల్ హెచ్ఎస్ అరోరాతో మాట్లాడి, అక్కడి పరిస్థితులపై ఆరా తీసినట్లు ఢిపెన్స్ కార్యాలయం పేర్కొంది. మరో ఉన్నతాధికారి ఎయిర్‌ మార్షల్‌ విక్రమ్ సింగ్‌ ఆదివారం సంఘటనా స్థలానికి వెళ్లి పరిస్థితిని సమీక్షించనున్నారు. పేలుళ్లకు నిందితులు డ్రోన్లను ఉపయోగించినట్టు అధికారులు భావిస్తున్నారు. 2016లో ఆరుగురు ఉగ్రవాదులు పఠాన్‌కోట్ ఎయిర్‌బేస్‌పై ఆత్మాహుతి దాడి చేసిన సంగతి తెలిసిందే. ఈ ఆపరేషన్ 36 గంటలు సాగగా.. ఇందులో ఐదుగురు ఉగ్రవాదులు, ముగ్గురు భద్రతా సిబ్బంది మరణించారు. జమ్మూ కశ్మీర్ అంశంపై అఖిలపక్షం నేతలతో ప్రధాని సమావేశం నిర్వహించిన మూడు రోజుల్లోనే ఈ పేలుళ్లు చోటుచేసుకోవడం గమనార్హం.


By June 27, 2021 at 10:57AM


Read More https://telugu.samayam.com/latest-news/india-news/probe-on-for-possible-drone-attack-on-jammu-air-force-station/articleshow/83888120.cms

No comments