సైనికుల ప్రతిష్ఠకు భంగం కలిగిస్తే జైలుకే.. కఠిన చట్టాన్ని తీసుకొచ్చిన డ్రాగన్!
సైనికులను కించపరిచేవారిని శిక్షించే కొత్త చట్టానికి చైనా ఆమోదం తెలిపింది. 2018 నాటికి చట్టంలో పలు మార్పులు చేసిన చైనా.. సైనికుల ప్రతిష్ఠకు భంగం కలిగించేవారిని కఠినంగా శిక్షించేలా కొత్త నిబంధనలు చేర్చింది. తూర్పు లడఖ్‌ గల్వాన్ లోయ వద్ద గతేడాది జూన్‌లో భారత సైన్యంతో జరిగిన ఘర్షణలో చనిపోయిన సైనికులను కించపరిచేలా వ్యాఖ్యలు చేసిన ఓ ప్రముఖ బ్లాగర్‌పై ఇటీవల కఠిన చర్యలు తీసుకుంది. నేషనల్ పీపుల్స్ కాంగ్రెస్ (ఎన్‌పీసీ) స్టాండింగ్ కమిటీ గురువారం ఆమోదించిన ఈ చట్టం ప్రకారం.. సైనికులను ఎవరైనా కించపరిచేలా వ్యాఖ్యలు చేస్తే శిక్షార్హులు. వ్యవస్థ లేదా వ్యక్తులు ఏ విధంగానూ సైనికుల ప్రతిష్ఠకు భంగం కలిగించరాదని అధికారిక మీడియా జున్హూ వెల్లడించింది. అలాగే, సైనికుల గౌరవార్ధం నిర్మించిన ఫలకాలను అపవిత్రం చేయడం కూడా నిషేధించింది. కొత్త చట్టం ప్రకారం.. సైనిక సిబ్బందికి పరువునష్టం కలిగించడం..వారి చట్టబద్ధమైన హక్కులు, ఆసక్తుల ఉల్లంఘన కేసులలో న్యాయవాదులు ప్రజా ప్రయోజన వ్యాజ్యాన్ని దాఖలు చేయవచ్చు. ఇప్పటికే అమల్లో ఉన్న కఠిన చట్టానికి సవరణలు చేయడం సహా "అమరుల" పరువు ప్రతిష్ఠలకు భంగం కలిగిస్తే చట్టపరంగా చర్యలు తీసుకునే అవకాశాన్ని కొత్తచట్టం కల్పిస్తుందని హంకాంగ్ నుంచి వెలువడే సౌత్ చైనా మార్నింగ్ పోస్ట్ పత్రిక పేర్కొంది. సైనికుల కుటుంబాలను కూడా ఈ పరిధిలోకి తీసుకొచ్చి పీపుల్స్ లిబరేషన్ ఆర్మీ మిషన్ స్ఫూర్తిని పెంచడానికి దోహదం చేసేలా ఉందని కొత్త చట్టంపై పీఎల్ఏ మాజీ అధికారి, సైనిక సంబంధాలపై హాంకాంగ్‌ వ్యాఖ్యాత సాంగ్ జోంగ్‌పింగ్ అన్నారు. ప్రస్తుతం ఉన్న చట్టం తమ సైనికుల గౌరవం, హక్కులకు పూర్తిస్థాయి రక్షణ కల్పించలేదని, తాజాగా చట్టంతో ఆ లోటు తీరుతుందని అన్నారు. ‘భవిష్యత్తులో సైనిక సంఘర్షణలు చాలా తీవ్రంగా ఉంటాయని మనం గుర్తించాలి.. సమాజంలో మిలటరీకి మంచి గౌరవం లభించేలా చూడటం చాలా ముఖ్యం’ అని వ్యాఖ్యానించారు. గల్వాన్ ఘర్షణల్లో చనిపోయిన సైనికులను కించపరిచేలా పోస్ట్ పెట్టారనే ఆరోపణలపై క్యూ జిమింగ్ అనే వ్యక్తికి మే 31 ఎనిమిది నెలల జైలు శిక్ష విధించారు. 2018లో తీసుకొచ్చిన చట్టం కింద నమోదయిన తొలి కేసు ఇదే కావడం గమనార్హం.
By June 12, 2021 at 07:06AM
No comments