ఇటలీ నేవీ అధికారులపై హత్య కేసు.. సుప్రీంకోర్టు కీలక ఆదేశాలు
కేరళ మత్స్యకారుల హత్య ఘటనలో ఆరోపణలు ఎదుర్కొంటున్న ఇటలీ నౌకదళ అధికారులపై కేసును కొట్టివేసింది. బాధిత కుటుంబాలకు రూ. 10 కోట్లు నష్ట పరిహారం చెల్లిస్తే ఈ కేసును మూసివేస్తామని గతంలో సర్వోన్నత న్యాయస్థానం స్పష్టం చేసిన విషయం తెలిసిందే. ఆ మొత్తాన్ని ఇటలీ ప్రభుత్వం గతవారం చెల్లించడంతో సర్వోన్నత న్యాయస్థానం మంగళవారం వారిపై ఉన్న అన్ని క్రిమినల్ కేసులను కొట్టివేస్తూ నిర్ణయం తీసుకుంది. మత్స్యకారుల కుటుంబాలకు రూ.10 కోట్లు నష్టపరిహారం చెల్లించడంపై జస్టిస్ ఇందిరా బెనర్జీ, జస్టిస్ ఎంఆర్ షా వెకేషన్ బెంచ్ ఆదేశాలు జారీచేసింది. నష్టపరిహారం సక్రమంగా పంపిణీ అయ్యేలా చూడాలని కేరళ హైకోర్టుకు సూచించింది. వాస్తవానికి ఈ కేసు రెండు నెలల కిందటే ముగించాల్సి ఉన్నా.. పరిహారం చెల్లింపులో జాప్యం వల్ల కుదరలేదు. ఇటలీ నేవీ అధికారులపై కేసును కొట్టివేయాలంటూ కేంద్రం చేసిన విజ్ఞప్తిని పరిగణనలోకి తీసుకున్న సుప్రీంకోర్టు.. మత్య్సకారుల కుటుంబాలకు రూ. 10 కోట్లు నష్ట పరిహారం చెల్లించాలని సూచించింది. పది రోజుల్లోగా ఆ ప్రక్రియను పూర్తిచేయాలని ఏప్రిల్ 9న ఆదేశించింది. అనంతరం ఏప్రిల్ 19న కేసు పూర్తిచేస్తామని స్పష్టం చేసింది. ఏప్రిల్ 19 నాటికి ప్రక్రియ పూర్తికాకపోవడంతో న్యాయస్థానం తీవ్ర ఆగ్రహం వ్యక్తం చేసింది. ఇటలీ నుంచి నష్టపరిహారం ఇంకా అందలేదని కేంద్రం చెప్పడంతో కేసును వాయిదా వేసింది. హత్యకు గురైన ఇద్దరు మత్స్యకారుల కుటుంబాలకు రూ. 4 కోట్లు చొప్పున, బోటు యజమానికి రూ. 2 కోట్లు చెల్లించారు. 2012 నాటి కేరళ మత్స్యకారుల హత్య కేసులో ఇటలీ నౌకాదళానికి చెందిన సల్వేటోర్ గైరోనే, మాస్సి‌మిలియనో లాటోర్రేలు ఆరోపణలు ఎదుర్కొంటున్నారు. ఇటలీ నావికులపై మోపిన కొన్ని అభియోగాలను కేంద్రం ఉపసంహరించుకోవడంతో వారికి మరణశిక్ష తప్పింది. తాజాగా వారిపై ఉన్న క్రిమినల్ కేసులన్నీ సర్వోన్నత న్యాయస్థానం కొట్టివేసింది. ఫిబ్రవరి 2012లో చేపల పడవలో వెళ్ళిన ఇద్దరు భారతీయ మత్స్యకారులను భారత దేశ ప్రత్యేక ఆర్థిక మండలి (ఈఈజెడ్) పరిధిలో ఇద్దరు ఇటాలియన్ మెరైన్స్ కాల్పులు జరిపి, హత్య చేశారు. ఈ ఇటాలియన్ అధికారులు ఎంవీ ఎన్రికా లెక్సీ అనే ఇటాలియన్ ఆయిల్ ట్యాంకర్ నౌకలో ఉన్నారు.
By June 15, 2021 at 11:28AM
No comments