చోక్సీని భారత్‌కు రాకుండా అడ్డుకున్న ప్రతిపక్ష నేత.. కథ నడిపించిన సోదరుడు!
డొమినికాలో పట్టుబడిన పంజాబ్ నేషనల్ కుంభకోణం నిందితుడు, వజ్రాల వ్యాపారి మెహుల్ చోక్సీని భారత్‌కు రప్పించడానికి చేసిన ప్రయత్నాలు చివరి నిమిషంలో విఫలమయ్యాయి. అంతా సజావుగా సాగుతున్న తరుణంలో కేసును డొమినికన్ కోర్టు వాయిదా వేసింది. దీంతో చోక్సీ కోసం వెళ్లిన ప్రైవేటు జెట్, భారత ఆధికారుల బృందం స్వదేశానికి తిరిగి వచ్చేసింది. ఆఖరి క్షణంలో చోక్సీ అప్పగింత ఆగిపోవడం వెనుక డొమినికా ప్రతిపక్షాల హస్తం ఉందని స్థానిక మీడియా కథనాలు వెలువరించింది. వాటి ఒత్తిడికి ఏకంగా డొమినికా న్యాయవ్యవస్థే తలొగ్గడం గమనార్హం. చోక్సీని భారత్‌కు పంపకుండా అడ్డుకోవడం వెనుక ప్రతిపక్షాల పాత్ర ఉందన్న డొమినికా మీడియా కథనాలు కలకం సృష్టిస్తున్నాయి. చోక్సీ తరఫు న్యాయవాదుల బృందం డొమినికా ప్రతిపక్ష నేతలను కలిసి.. వారి ద్వారా న్యాయవ్యవస్థపై ఒత్తిడి తీసుకొచ్చింది. అతడిని వెంటనే భారత్‌కు తరలించే అవకాశాన్ని అడ్డుకుంది. చోక్సీ అక్రమంగా డొమినికాలో ప్రవేశించలేదని.. అతడిని కిడ్నాప్ చేశారని ప్రతిపక్ష నేతలను న్యాయవాదులు ఒప్పించినట్టు స్థానిక మీడియా పేర్కొంది. ఈ కేసును వెంటనే తేల్చే అవకాశం ఉన్నా.. అక్కడ న్యాయస్థానం విచారణను వాయిదా వేసింది. చోక్సీ సోదరుడు చేతన్‌ చింటూభాయ్ సాయంతో లండన్‌కు చెందిన నలుగురు న్యాయవాదుల బృందం మొత్తం వ్యవహారం నడిపించినట్లు తెలుస్తోంది. తన సోదరుడ్ని కిడ్నాప్ చేశారని కట్టుకథను అల్లిన చింటూభాయ్.. ఎన్నికల నిధులు ఇస్తానని డొమినికన్ ప్రతిపక్ష నేతకు ఆశచూపినట్టు స్థానిక మీడియా సహా మెహుల్ బంధువు ఒకరు తెలిపారు. డొమినికా విపక్ష నేత లెనాక్స్‌ లింటన్‌ను మే 29న కలిసిన చింటూభాయ్.. రెండు గంటలపాటు సమావేశమయ్యాని మీడియా తెలిపింది. చోక్సీని భారత్‌కు అప్పగించకుండా డొమినికా ప్రభుత్వంపై ఒత్తిడి తేవాలని ఈ సందర్భంగా కోరినట్లు తెలిసింది. ఇలా చేస్తే వచ్చే ఎన్నికల ఖర్చుకు నిధులిస్తామని హామీ ఇచ్చారని మీడియా పేర్కొంది. చింటూభాయ్ ఆఫర్‌తోనే ప్రతిపక్ష నేత న్యాయవ్యవస్థపై ఒత్తిడి తెచ్చి చోక్సీని భారత్‌కు పంపకుండా అడ్డుకున్నాడని సమాచారం. మెహుల్ చోక్సీకి వ్యతిరేకంగా అనేక బలమైన ఆధారాలు ఉన్నప్పటికీ అతడిని భారత్‌ పంపకుండా కేసును వాయిదా వేసింది. అయితే, బలహీన చట్టాలవల్లే ఆర్ధిక నేరస్థుల ఆటలు సాగుతున్నాయని న్యాయనిపుణులు అంటున్నారు. సంస్కరణలు ప్రారంభించకపోతే చోక్సీని తిరిగి తీసుకొచ్చినా.. బలహీన చట్టాలను ఆశ్రయిస్తాడని పేర్కొంటున్నారు.
By June 07, 2021 at 08:13AM
No comments