వివాహేతర సంబంధం.. మహిళకు దారుణమైన శిక్షవేసిన యువకులు.. వీడియో వైరల్
భర్తను వదిలేసి వేరొకరితో వివాహేతర సంబంధం పెట్టుకుందనే సాకుతో ఇంటిలో నుంచి ఈడ్చుకొచ్చి వివస్త్రను చేసి ఊరేగించారు. గిరిజన మహిళను ఇంటిలో నుంచి ఈడ్చుకొచ్చిన యువకులు.. వివస్త్రను చేసి ఊరేగించారు. ఈ తతంగాన్ని మొత్తం వీడియో తీసి సోషల్ మీడియాలో పోస్ట్ చేశారు. ఈ వీడియో వైరల్ కావడంతో ఘటన వెలుగులోకి వచ్చింది. ఈ అమానవీయ ఘటన పశ్చిమ్ బెంగాల్‌లోని అలీపూర్దౌర్ జిల్లా కుమరగ్రామ్ పోలీస్ స్టేషన్ పరిధిలో జూన్ 9న చోటుచేసుకుంది. దీనికి సంబంధించిన వీడియోలు ఆదివారం వెలుగులోకి రావడంతో పోలీసులు తక్షణమే స్పందించారు. మొత్తం 11 మంది నిందితుల్లో ఆరుగుర్ని సోమవారం అరెస్ట్ చేశారు. మరో వ్యక్తితో వివాహేతర సంబంధం పెట్టుకున్న బాధిత మహిళ ఆరు నెలల కిందట భర్తను వదిలేసి అతడితో వెళ్లిపోయింది. అయితే, వారం రోజుల కిందట తిరిగి రావడంతో గత బుధవారం రాత్రి ఆమెపై గ్రామస్థులు దాడి చేశారు. ఇంట్లో నుంచి ఈడ్చుకొచ్చి ఒంటిపై దుస్తులు చించేశారు. అనంతరం ఊరంతా ఊరేగించారు. ఈ ఘటన తర్వాత బాధితురాలు కనిపించకుండాపోయినా వీడియో బయటకు వచ్చేవరకూ ఎవ్వరూ పోలీసులకు ఫిర్యాదు చేయలేదు. అనంతరం కేసు నమోదుచేసిన పోలీసులు.. బాధితురాలు అసోంలోని తన తల్లిదండ్రులు ఇంట్లో ఉన్నట్టు గుర్తించారు. కౌన్సెలింగ్ ఇచ్చిన తర్వాత భర్త సమక్షంలో ఫిర్యాదు చేసింది. మొత్తం 11 మంది నిందితుల పేర్లను చెప్పడంతో.. వారిపై వివిధ సెక్షన్ల కింద కేసులు నమోదుచేశారు. ఆరుగుర్ని అదుపులోకి తీసుకోగా.. పరారీలో ఉన్న మిగతావారి కోసం గాలిస్తున్నారు. పోలీసులు తెలిపిన వివరాల ప్రకారం.. కాప్ పంచాయతీ పెట్టి పెద్దలు వేసిన శిక్ష కాదని తెలిపారు. కానీ, కొంత మంది యువకులు ఆమెపై హఠాత్తుగా దాడిచేసి అవమానించారని పేర్కొన్నారు. ఈ ఘటనపై సామాజిక కార్యక్తలు తీవ్రంగా మండిపడుతున్నారు. అధికారులు దీనిపై మౌనంగా ఉండటంపై మండిపడుతున్నారు. మహిళకు జరిగిన దారుణాన్ని స్థానిక టీఎంసీ నేత ధిరేశ్ రాయ్ తీవ్రంగా ఖండించారు. నిందితులను కఠినంగా శిక్షించాలని పోలీసులను కోరారు.
By June 15, 2021 at 09:02AM
No comments