కరోనా విజృంభణ వేళ షాక్.. 3,000 మంది వైద్యులు రాజీనామా
కరోనా మహమ్మారి విజృంభిస్తున్న వేళ మధ్యప్రదేశ్‌లో దాదాపు 3వేల మంది వైద్యులు తమ ఉద్యోగాలకు రాజీనామా చేయడం దేశవ్యాప్తంగా చర్చనీయాంశంగా మారింది. సమ్మె చేస్తున్న జూనియర్ డాక్టర్లు 24 గంటల్లో తిరిగి విధుల్లో చేరాలని గురువారం ఆదేశించింది. కానీ, జూడాలు తమ ఉద్యోగాలకు రాజీనామా చేసి తీర్పును సుప్రీంకోర్టులో సవాలు చేస్తామని ప్రకటించారు. నాలుగు రోజుల వైద్యుల సమ్మెను చట్టవిరుద్ధమని కోర్టు పేర్కొంది. రాష్ట్రంలోని ఆరు ప్రభుత్వ వైద్య కళాశాలల్లో పనిచేస్తున్న దాదాపు 3 వేల మంది జూనియర్ వైద్యులు గురువారం రాజీనామా చేశారు. తమ రాజీనామాలను ఆయా కళాశాలల డీన్‌లకు సమర్పించినట్లు మధ్యప్రదేశ్ జూనియర్ డాక్టర్స్ అసోసియేషన్ (ఎంపీజేడీఏ) అధ్యక్షుడు డాక్టర్ అరవింద్ మీనా తెలిపారు. సోమవారం ప్రారంభమైన తమ సమ్మె డిమాండ్లు నెరవేరే వరకు కొనసాగుతుందని స్పష్టం చేశారు. స్టయిపెండ్ పెంచాలని ప్రాణాంతక కరోనా వైరస్ సంక్రమిస్తే తమకు, తమ కుటుంబాలకు ఉచిత వైద్యం అందజేయాలని జూనియర్ వైద్యులు డిమాండు చేస్తున్నారు. అంతేకాదు, పీజీ మూడో సంవత్సరం నమోదును రాష్ట్ర ప్రభుత్వం రద్దుచేసిందని, తాము పరీక్షలకు హాజరుకాబోమని తెలిపారు. హైకోర్టు తీర్పును సర్వోన్నత న్యాయస్థానంలో సవాల్ చేస్తామని స్పష్టం చేశారు. మెడికల్ ఆఫీసర్ల సంఘం, రెసిడెంట్ డాక్టర్ల సంఘాలు కూడా త్వరలో సమ్మెలో పాల్గొంటాయని డాక్టర్ అరవింద్ మీనా పేర్కొన్నారు. రాజస్థాన్, బిహార్, ఉత్తర్ ప్రదేశ్, కర్ణాటక, తెలంగాణ, బిహార్, మహారాష్ట్ర, ఎయిమ్స్-రిషికేష్ జూనియర్, సీనియర్ వైద్యులు తమకు మద్దతు తెలిపారని అన్నారు. తమ డిమాండ్లను నెరవేర్చుతామని మే 6న హామీ ఇచ్చిన ప్రభుత్వం.. ఇంత వరకూ ఎటువంటి చర్యలు చేపట్టలేదని ఆరోపించారు. స్టయిపెండ్‌ను పెంచుతున్నట్టు ఉత్తర్వులు వచ్చిన తర్వాతే విధుల్లో పాల్గొంటామని స్పష్టం చేశారు. తమకు 24 శాతం పెంచుతామని ప్రభుత్వం హామీ ఇచ్చిందని మీనా అన్నారు. కరోనా మహమ్మారి ప్రబలుతున్న సమయంలో జూనియర్ వైద్యులు సమ్మెకు దిగటాన్ని ధర్మాసనం ఖండించింది. శుక్రవారం మధ్యాహ్నం 2.30 గంటల్లోగా విధుల్లోకి చేరాలని ఆదేశించింది. ఈ సమయంలోగా వైద్యులు విధుల్లోకి చేరకుంటే ప్రభుత్వం కఠిన చర్యలు తీసుకోవచ్చని చీఫ్ జస్టిస్ మహమ్మద్ అహ్మద్, జస్టిస్ సుజోయ్ పాల్ ధర్మాసనం పేర్కొంది.
By June 04, 2021 at 11:18AM
No comments