NTR 30: చివరకు కియారానే ఫైనల్ చేసిన కొరటాల.. ఎన్టీఆర్‌తో తొలిసారి కావడంతో పక్కా ప్లాన్

తన ప్రతిష్టాత్మక మూవీ RRR ఫినిష్ కాగానే యంగ్ టైగర్ , స్టార్ డైరెక్టర్ కాంబోలో కొత్త సినిమా సెట్స్ మీదకు రానున్న సంగతి తెలిసిందే. ఇన్ని రోజులు 'ఆచార్య' పనుల్లో బిజీగా ఉన్న కొరటాల.. ఇప్పుడు షూటింగ్స్‌కి బ్రేక్ పడటంతో మూవీ స్క్రిప్ట్ మెరుగులుదిద్దే పనిలో పడ్డారట. ఈ మేరకు హీరోయిన్ ఎంపికపై స్పెషల్ ఇంట్రెస్ట్ పెట్టిన ఆయన బాలీవుడ్ బ్యూటీ కియారా అద్వానీని ఫైనల్ చేశారని, ఈ మేరకు ఆమెతో సంప్రదింపులు ఫినిష్ చేసి డేట్స్ కూడా తీసుకున్నారని విశ్వసనీయ వర్గాల సమాచారం. 'ఎన్టీఆర్‌-కొరటాల2'గా ఎన్టీఆర్ 30వ సినిమాను ఇటీవలే అనౌన్స్ చేశారు. దీంతో ఈ సినిమాలో ఎన్టీఆర్ సరసన ఏ హీరోయిన్ నటిస్తుందనే దానిపై అందరి దృష్టి పడింది. ఈ నేపథ్యంలో పేరు తెరపైకి రావడం, చివరకు ఆమెనే ఫైనల్ అయిందని తెలుస్తుండటం నందమూరి అభిమానులను హుషారెత్తిస్తోంది. గతంలో ఇదే కొరటాల శివ దర్శకత్వంలో మహేష్ బాబు హీరోగా వచ్చిన ‘భరత్‌ అనే నేను’ సినిమాలో నటించి తెలుగు ప్రేక్షకులను ఫిదా చేసింది కియారా. దీంతో ఎన్టీఆర్ సినిమాలో ఆమె నటించనుండటం అంతా స్వాగతిస్తున్నారు. మొదట మహేష్ బాబు, ఆ తర్వాత రామ్ చరణ్‌లతో రొమాన్స్ చేసిన ఈ భామ.. మరో టాలీవుడ్ స్టార్ హీరో ఎన్టీఆర్‌తో తొలిసారి రొమాన్స్ చేయబోతోంది. అటు కియారా, ఇటు ఎన్టీఆర్ డాన్సుల్లోనూ ఇరగదీస్తారు కాబట్టి ఇద్దరి కాంబోలో వచ్చే పాటలు మాంచి బీట్‌తో ఉండేలా ప్లాన్ చేస్తున్నారట కొరటాల. నందమూరి కళ్యాణ్‌రామ్ సమర్పణలో యువసుధ ఆర్ట్స్, ఎన్టీఆర్ ఆర్ట్స్ బ్యానర్లపై భారీ బడ్జెట్‌తో ఈ సినిమా రూపొందనుంది. ఏప్రిల్ 29వ తేదీ 2022న ఈ మూవీ రిలీజ్ చేయబోతున్నట్లు ముందే ప్రకటించారు మేకర్స్. అతిత్వరలో ఈ సినిమా రెగ్యులర్ షూటింగ్ ప్రారంభం కానుందని సమాచారం.

By May 16, 2021 at 07:55AM

Read More https://telugu.samayam.com/telugu-movies/cinema-news/koratala-shiva-kiara-advani-final-as-heroine-in-ntr-30/articleshow/82673714.cms