దూసుకొస్తున్న పెను తుఫాను ‘తాక్టే’.. ఆ రాష్ట్రాలకు పొంచి ఉన్న ముప్పు: IMD
అరేబియా సముద్రంలో లక్షద్వీప్ వద్ద ఏర్పడిన అల్పపీడనం శుక్రవారం వాయుగుండంగా మారింది. ఇది శనివారం నాటికి తుఫాను మారి.. ఆదివారం నాటికి అత్యంత తీవ్ర తుఫానుగా మారుతుందని భారత వాతావరణ విభాగం హెచ్చరించింది. దీనికి ‘తౌక్టే’అనే పేరును సూచించారు. తుఫాను మే 18న గుజరాత్ వద్ద తీరాన్ని దాటే అవకాశముందని తెలిపింది. తీరం దాటే సమయంలో గంటకు 150 నుంచి 175 కిలోమీటర్ల వేగంతో బలమైన గాలులు వీస్తాయని పేర్కొంది. తాక్టే ప్రభావం గుజరాత్, మహారాష్ట్ర, కర్ణాటక, కేరళ, గోవా, తెలంగాణపై ఉంటుందని ఐఎండీ వెల్లడించింది. ‘తౌక్టే’ కారణంగా కేరళలో భారీ నుంచి అతి భారీ వర్షాలు కురిసే ప్రమాదముందని హెచ్చరించింది. వాయుగుండం వల్ల ఇప్పటికే ఇప్పటికే కొల్లాం జిల్లాలో అనేకచోట్ల చెట్లు నేలకూలి, వందల ఇళ్లు దెబ్బతిన్నాయి. ప్రస్తుతం ఇది ఉత్తరంలో అమిని దీవికి వాయువ్యంగా 100 కిలోమీటర్లు, కేరళలోని కన్నూరుకు వాయువ్యంగా 290 కిలోమీటర్లు, గుజరాత్‌లోని వీరావల్‌కు దక్షిణంగా 1010 కిలోమీటర్ల దూరంలో కేంద్రకృతమై ఉన్నట్టు తెలిపింది. ప్రస్తుతం ఇది గంటకు 7 కిలోమీటర్ల వేగంతో ఉత్తర దిశగా కదులుతోందని పేర్కొంది. శనివారం తెల్లవారుజామున తుఫానుగా మారిన తౌక్టా.. ఈ సాయంత్రానికి తీవ్ర తుఫానుగా.. ఆదివారం ఉదయానికి అత్యంత తీవ్ర తుఫానుగా రూపుదాల్చుతుందని పేర్కొంది. తీరం దాటే సమయంలో అత్యంత తీవ్ర తుఫానుగా కొనసాగి.. తర్వాత తీవ్ర తుఫానుగా బలహీనపడుతుందని వివరించింది. దీని ప్రభావంతో మే 15, 16,17 తేదీల్లో లక్షద్వీప్, కేరళ, కర్ణాటక, మహారాష్ట్ర, గోవా, గుజరాత్‌లోని చాలా ప్రాంతాల్లో భారీ నుంచి అతిభారీ వర్షాలు కురుస్తాయని, పలు చోట్ల ఓ మోస్తరు వర్షాలు కురుస్తాయని అప్రమత్తం చేసింది. గుజరాత్‌లోని సౌరాష్ట్ర, కచ్‌లోని పలు ప్రాంతాల్లో మే 17 భారీ నుంచి అతిభారీ, మే 18న కొన్ని చోట్ల కుంభవృష్టి కురిసి 20 సెం.మీ.లకుపైగా వర్షపాతం నమోదవుతుందని హెచ్చరించింది. కాగా, కొండ ప్రాంతాలు ఎక్కువగా ఉన్న వయనాడ్‌, ఇడుక్కి జిల్లాల్లో ప్రాణనష్టం జరక్కుండా ముందస్తు జాగ్రత్త చర్యలు చేపట్టినట్లు ఎన్డీఆర్ఎఫ్ అధికారులు తెలిపారు. తుఫాను తీవ్రతను ఎదుర్కొనేందుకు కేరళ, కర్ణాటక, తమిళనాడు, గుజరాత్, మహారాష్ట్ర తీర ప్రాంతాల్లో 53 బృందాలను మోహరించినట్టు ఎన్డీఆర్ఎఫ్ డైరెక్టర్‌ జనరల్‌ ఎస్‌.ఎన్‌.ప్రధాన్‌ తెలిపారు.
By May 15, 2021 at 08:06AM
No comments