Covid Vaccine 45 ఏళ్లలోపు వారికి స్పాట్ రిజస్ట్రేషన్.. కేంద్రం కీలక మార్పులు
దేశంలో వ్యాక్సిన్ల కొరత తీవ్రంగా వేధిస్తుండగా.. ఓవైపు వృధా ఎక్కువగా ఉంది. ఈ నేపథ్యంలో వృధాను అరికట్టడానికి కేంద్రం చర్యలు ప్రారంభించింది. కోసం ముందస్తుగా కొవిన్‌ యాప్‌ ద్వారా రిజిస్ట్రేషన్ చేసుకొన్నవారు టీకా తీసుకోకుంటే రిజిస్ట్రేషన్ చేసుకోనివారికి కూడా కేంద్రం అనుమతిచ్చింది. యాప్‌తో సంబంధం లేకుండా నేరుగా వ్యాక్సినేషన్ కేంద్రాల్లోనే రిజిస్ట్రేషన్ చేసుకొని టీకా వేయించుకోవచ్చని స్పష్టం చేసింది. ప్రస్తుతం కొవిన్‌ యాప్‌ ద్వారా ఒక్కో మొబైల్‌ నంబరుతో నలుగురు మాత్రమే రిజిస్ట్రేషన్ చేసుకొనే వీలుంది. 18-44 ఏళ్ల మధ్యవారికి వ్యాక్సినేషన్‌‌ను దృష్టిలో ఉంచుకొని కేంద్రం తాజా మినహాయింపులు ఇచ్చింది. కుటుంబంలో నలుగురి కంటే ఎక్కువ మంది ఉన్న సందర్భాల్లో అందరికీ ఒకేసారి, ఒకేచోట వ్యాక్సినేషన్ వీలుకాదు. ఇలాంటి పరిస్థితుల్లోనూ నేరుగా వ్యాక్సిన్ కేంద్రంలో రిజిస్ట్రేషన్ చేసుకోవచ్చు. దీని వల్ల వ్యాక్సిన్ల వృధాను అరికట్టవచ్చు. స్లాట్ బుకింగ్ చేసుకున్న వ్యక్తులు టీకా తీసుకోడానికి రాకపోతే స్పాట్ రిజిస్ట్రేషన్ వల్ల మిగిలి ఉన్న వయల్‌లోని వ్యాక్సిన్ వారికి ఇవ్వొచ్చు. అయితే, అసలు వ్యాక్సిన్లు ఎక్కడ అందుబాటులో ఉన్నాయో కేంద్రం చెప్పాలని కాంగ్రెస్ సీనియర్ నేత, ఎంపీ జైరాం రమేశ్ ప్రశ్నించారు. ఏ టీకా కేంద్రంలో వ్యాక్సిన్లు మిగిలిపోయాయో తెలుసుకోవడం ఎలా సాధ్యమని ఆయన వ్యాఖ్యానించారు. ‘‘టీకా విధానంలో ఎక్కువ మినహాయింపులు విఫలయత్నం... అందుకే 18-44 ఏళ్లకు కోవిన్ రిజిస్ట్రేషన్ తప్పనిసరి చేయడం చాలా పెద్ద తప్పు అని మేము చెప్పాం... మోడీ ప్రభుత్వం సవరణలు చేసినట్లు అనిపించినప్పటికీ, ఇప్పుడు సమస్య ఏమిటంటే, వ్యాక్సిన్లు ఎక్కడ ఉన్నాయి?’ అని ట్విట్టర్ ద్వారా నిలదీశారు. ఇదిలా ఉండగా, కేంద్రం అనుమతించినా ఇది స్థానిక రాష్ట్ర ప్రభుత్వాలు, కేంద్రపాలిత ప్రాంతాల నిర్ణయాలపై అధారపడి ఉంటాయని కేంద్రం పేర్కొంది. అంతేకాదు, ఇది కేవలం ప్రభుత్వం ఆధ్వర్యంలో నడిచే వ్యాక్సినేషన్ కేంద్రాలకు మాత్రమే వర్తిస్తుంది. కేవలం కొన్ని రాష్ట్రాల్లోనే 18 ఏళ్లు పూర్తయినవారికి వ్యాక్సినేషన్‌కు అనుమతించాయి. ఇప్పటి వరకూ 18 ఏళ్లు పూర్తయినవారికి టీకా ఇచ్చిన ఢిల్లీ కూడా తాజాగా రద్దుచేసింది.
By May 25, 2021 at 01:34PM
No comments