కష్ట కాలంలో డ్యాన్స‌ర్ల‌కు అండగా శేఖర్ మాస్టర్.. సాయం కోసం కాల్ చేయండంటూ ఫోన్ నెంబర్స్
కరోనా మ‌హ‌మ్మారి మరోసారి యావ‌త్ భారతదేశాన్ని అతలాకుతలం చేస్తోంది. గతేడాది ఫస్ట్ వేవ్ ప్రభావంతో అన్ని రంగాలు ఆర్ధికంగా కుదేలయ్యాయి. దినసరి కార్మికుల పరిస్థితి అయితే మరీ దారుణంగా తయారైంది. అయితే ఇప్పుడు కరోనా సెకండ్ వేవ్‌లో కూడా అవే పరిస్థితులు కనిపిస్తున్నాయి. లాక్‌డౌన్‌ వల్ల చాలామందికి పూట గడవని పరిస్థితి నెలకొంది. దీంతో పలువురు సెలబ్రిటీలు ముందుకొచ్చి తమకు తోచిన సాయం చేస్తూ ఆపదలో ఉన్న వారికి అండగా నిలుస్తున్నారు. అయితే ఈ సెకండ్ వేవ్‌లో కళను నమ్ముకుని జీవనం సాగిస్తోన్న ఎంతోమంది డ్యాన్సర్లు కూడా పని లేక పస్తులు ఉండాల్సిన పరిస్థితి వచ్చింది. దీంతో అలాంటివారి కోసం నేనున్నా అంటూ ముందుకొచ్చారు శేఖర్ మాస్టర్. గ్రూపు డ్యాన్సర్లు, టీవీ షోలు చేసే డ్యాన్స‌ర్ల‌కు ఈ స‌మ‌యంలో పని దొర‌క‌డం చాలా క‌ష్టంగా మారింద‌ని చెప్పిన ఆయన, భోజ‌నానికి కూడా డ‌బ్బులు లేక చాలామంది ఇబ్బందులు ప‌డుతున్నార‌ని అన్నారు. ఇలా ఎవ‌రైనా ఇబ్బందులు ప‌డుతుంటే వెంట‌నే త‌న‌కు ఫోన్ చేసి చెప్ప‌మ‌ని తెలుపుతూ తన సోషల్ మీడియా ఖాతాలో ఓ వీడియో పోస్ట్ చేశారు శేఖర్ మాస్టర్. ఆడియో ఫంక్షన్లు, సంగీత్‌ వంటి కార్యక్రమాలు ఆగిపోవడంతో గ్రూప్‌ డ్యాన్సర్లు సహా చాలామందికి ఆదాయం లేదని, హైదరాబాద్‌లో ఉన్న డ్యాన్సర్లకి ఎవరికైనా నిత్యావసర సరకులు అవసరమైతే తాను అందజేస్తానని ఆయన చెప్పారు. ఈ మేరకు 9989189885, 9618961492, 7416519257 నెంబర్లకి ఫోన్ చేసి ఉచితంగా నిత్యావసర సరకులు తీసుకోవచ్చని ఆయన పేర్కొన్నారు. ప్ర‌స్తుతం పరిస్థితులు బాగాలేవ‌ని అత్య‌వ‌స‌ర‌మైతే త‌ప్ప బ‌య‌ట‌కు రావొద్ద‌ని ఆయన అన్నారు.
By May 16, 2021 at 02:47PM
No comments