Breaking News

కోవిడ్ నిబంధనలు ఉల్లంఘన.. పోలీస్ అధికారిపై మూక దాడి


కరోనా నిబంధనలు సక్రమంగా పాటించాలని చెప్పిన పోలీస్ అధికారిపై అల్లరి మూకలు దాడికి పాల్పడిన ఘటన మహారాష్ట్రలో చోటుచేసుకుంది. ప్రస్తుతం ఈ ఘటనకు సంబంధించిన వీడియోలు సోషల్ మీడియాలో వైరల్ అవుతున్నాయి. మహారాష్ట్రలో కరోనా కట్టడికి లాక్‌డౌన్ విధించడంతో ప్రజలు ఖచ్చితంగా నిబంధనలు పాటించాలని పోలీసులు సూచిస్తున్నారు. ఈ నేపథ్యంలో అహ్మద్‌నగర్ జిల్లా సంగమ్‌నేర్‌‌ పట్టణంలో కొందరు యువకులు లాక్‌డౌన్ నిబంధనలు ఉల్లంఘించి రోడ్లపై తిరుగుతుండటంతో పోలీసులు అడ్డుకున్నారు. సంగమ్‌నేర్ పట్టణంలోని తిన్‌బత్తీ చౌక్ వద్ద గురువారం సాయంత్రం కనీసం మాస్క్‌లు కూడా ధరించకుండా యువత భారీగా రోడ్లపైకి రావడం పోలీసులు గమనించారు. వీరిని అడ్డుకుని ఇళ్లకు వెళ్లాలని పోలీసులు ఆదేశించడంతో వారితో వాగ్వాదానికి దిగారు. తర్వాత ఇది ఘర్షణకు దారితీయడంతో భారీగా వీధుల్లోకి వచ్చిన అల్లరి మూకలు పోలీసులపై దాడి చేశాయి. పోలీస్ అధికారిపై రాళ్లు రువ్వి, ఇటుకలు విసిరి వెంబడించారు. దాదాపు 150 మంది ఈ దాడిలో పాల్గొనగా.. ప్రాణాలు అరచేతిలో పెట్టుకుని పోలీసులు పరుగులెత్తారు. పోలీస్ వాహనాలు, ఓ చోట ఏర్పాటుచేసిన పోలీస్ పోస్ట్‌ను ధ్వంసం చేశారు. ఈ ఘటనలో సల్మాన్ షయిక్ అనే పోలీస్ అధికారి సహా మరో ఇద్దరు పోలీసులు గాయపడ్డారు. తర్వాత భారీ సంఖ్యలో అక్కడకు పోలీసులు చేరుకుని అల్లరి మూకను చెదరగొట్టారు. ర్యాపిడ్ యాక్షన్ ఫోర్స్‌ను ఆ ప్రాంతంలో మోహరించారు. ఈ ఘటన పోలీస్ అధికారి ఫిర్యాదుతో పలువురు గుర్తుతెలియని వ్యక్తులపై కేసు నమోదుచేశారు. తీన్‌బత్తీ చౌక్ వద్ద జుబయిర్ హోటల్‌లో పనిచేసే సిబ్బందిగా వారిని గుర్తించారు. పోలీసుల విధులకు ఆటంకం కలిగించడమే కాకుండా, ప్రజా ఆస్తులను ధ్వంసం చేయడం, దాడులకు పాల్పడటం వంటి నేరాల కింద నిందితులపై కేసు నమోదుచేసినట్టు తెలిపారు.


By May 08, 2021 at 11:50AM


Read More https://telugu.samayam.com/latest-news/india-news/police-personnel-attacked-by-mob-in-maharashtra-vehicles-damaged/articleshow/82476123.cms

No comments