ఢిల్లీలో భారీగా తగ్గిన పాజిటివిటీ రేటు.. అయినా లాక్‌డౌన్ పొడిగింపు

దేశ రాజధాని ఢిల్లీలో కరోనా కట్టడికి విధించిన లాక్‌డౌన్‌ను మరోసారి పొడిగించారు. రోజువారీ కేసులు కాస్త తగ్గుతున్నా లాక్‌డౌన్‌ను పొడిగించాలని ఢిల్లీ ప్రభుత్వం నిర్ణయించింది. సోమవారంతో ముగియనున్న లాక్‌డౌన్‌ను మరోవారం పాటు పొడిగిస్తున్నట్లు సీఎం కేజ్రీవాల్‌ ప్రకటించారు. ఆదివారం వర్చువల్‌గా జరిగిన మీడియాలో సమావేశంలో కేజ్రీవాల్ ఈ ప్రకటన చేశారు. లాక్‌డౌన్ సత్ఫలితాన్నిస్తోందని, పాజిటివ్ కేసులు గణనీయంగా తగ్గాయని సీఎం పేర్కొన్నారు. అయితే, ఈ ప్రయోజనం కోల్పోకూడదంటే లాక్‌డౌన్ కొద్ది రోజులు కొనసాగించాల్సిందేనని స్పష్టం చేశారు. వచ్చే సోమవారం ఉదయం వరకూ లాక్‌డౌన్ కొనసాగుతుందని కేజ్రీవాల్ తెలిపారు. ఏప్రిల్ మధ్య నాటికి ఢిల్లీలో 35 శాతంగా ఉన్న పాజిటివిటీ రేటు ప్రస్తుతం 11.32 శాతానికి తగ్గింది. ఇది ఐదు శాతానికి చేరుకుంటేనే ముప్పు తగ్గినట్టు భావించాలని వైద్యులు వ్యాఖ్యానించారు. మునుపటితో పోలిస్తే పాజిటివిటీ రేటు తగ్గినప్పటికీ.. ఇంకా ఆందోళనకరంగానే కొనసాగుతోందని తెలిపారు. ఈ నేపథ్యంలోనే లాక్‌డౌన్‌ను మరో వారం పొడిగించినట్లు తెలుస్తోంది. ఢిల్లీలో రోజువారీ కేసులు 10 వేల దిగువన నమోదవుతుండడం గమనార్హం. ‘‘గడచిన 24 గంటల్లో 6,000 కేసులు నమోదయ్యాయి.. పాజిటివిటీ రేటు 10 శాతానికి తగ్గింది.. క్రమంగా ఢిల్లీలో సాధారణ పరిస్థితులు నెలకుంటున్నాయి.. వచ్చేవారికి రికవరీ రేటు ఇంకా పెరుగుతుందని భావిస్తున్నాం... ఆంక్షలు మాత్రం మునుపటిలాగే కొనసాగుతాయి’’ అని సీఎం వివరించారు. ఢిల్లీలో వరుసగా ఐదో వారం లాక్‌డౌన్ కొనసాగుతోంది. కరోనా కేసులు రాకెట్ వేగంతో ఢిల్లీలో నమోదుకావడం, భారీగా మరణాలు చోటుచేసుకోవడం పట్ల ఆందోళన వ్యక్తమయ్యింది. ఈ నేపథ్యంలో ఏప్రిల్ మూడో వారం నుంచి లాక్‌డౌన్ అమల్లోకి వచ్చింది. అటు, పలు రాష్ట్రాల్లో లాక్‌డౌన్ ఆంక్షలు సత్ఫలితాలను ఇస్తున్నాయి. దాదాపు అన్ని రాష్ట్రాలూ లాక్‌డౌన్ తరహా ఆంక్షలను అమలు చేయడంతో దేశవ్యాప్తంగా కరోనా కేసులు మూడు రోజులు నుంచి తగ్గుతున్నాయి. గడచిన 24 గంటల్లో 3.11 లక్షల కేసులు, 4 వేల మరణాలు చోటుచేసుకున్నాయి. 25 రోజుల తర్వాత దేశంలో కరోనా రోజువారీ కేసులు తగ్గడం ఇదే తొలిసారి.

By May 16, 2021 at 01:44PM

Read More https://telugu.samayam.com/latest-news/india-news/positivity-rate-reduced-but-lockdown-extended-by-another-week-in-delhi/articleshow/82677880.cms