Breaking News

వ్యాక్సిన్ పాలసీలో న్యాయవ్యవస్థ జోక్యం తగదు.. కేంద్రం సంచలన వ్యాఖ్యలు


ప్రస్తుత వ్యాక్సినేషన్ విధానాన్ని సమర్ధించుకుంటూ ఈ మేరకు కేంద్ర ప్రభుత్వం సుప్రీంకోర్టులో ఆదివారం రాత్రి అఫిడ్‌విట్ దాఖలు చేసింది. టీకా ధరల్లో వ్యత్యాసం, వ్యాక్సిన్ కొరత వంటి అంశాలపై అభ్యంతరం వ్యక్తం చేసిన విషయం తెలిసిందే. ఈ నేపథ్యంలో అఫిడ్‌విట్ దాఖలుచేసిన కేంద్రం.. ఇందులో న్యాయవ్యవస్థ జోక్యం చేసుకోరాదని పేర్కొంది. ‘న్యాయవ్యవస్థ జోక్యాన్ని వ్యతిరేకిస్తున్నాం.. అతిగా జోక్యం చేసుకుంటే ఇది ఊహించని, అనాలోచిత పరిణామాలకు దారితీస్తుంది’అని హెచ్చరించింది. ‘‘ప్రపంచ మహమ్మారి కట్టడికి వైద్య నిపుణులు, శాస్త్రవేత్తల సలహాతోనే వ్యూహరచన చేశాం.. ఇందులో న్యాయపరమైన జోక్యానికి తావులేదు. ఏదైనా అతిగా న్యాయపరమైన జోక్యం ఊహించని, అనాలోచిత పరిణామాలకు దారితీయవచ్చు... వైద్యులు, నిపుణులు, శాస్త్రవేత్తల సలహా లేదా పరిపాలనా అనుభవం లేకపోవడం వల్ల వినూత్న పరిష్కారాలను కనుగొనటానికి చాలా తక్కువ అవకాశం ఉంటుంది.. టీకా ధరలను సవరించాలని ఉత్పత్తి సంస్థలను ప్రభుత్వం ఒప్పించిన తర్వాత దేశవ్యాప్తంగా వ్యాక్సిన్ల ధర సహేతుకంగా, ఏకరీతిగా ఉంది’’ అని పేర్కొంది. 18 ఏళ్లు పూర్తయిన ప్రతి ఒక్కరికీ ఉచితంగానే వ్యాక్సిన్ అందజేయడానికి పలు రాష్ట్రాలు ఇప్పటికే ప్రకటనలు చేశాయి.. అంత్యక్రియలు నిర్వహించే కార్మికులు, గ్రామీణ ప్రాంతాల్లోని పంచాయతీ సిబ్బందిని ఫ్రంట్‌లైన్ వర్కర్లుగా గుర్తించామని, వీరికి ఉచితంగానే టీకా అందజేయనున్నామని తెలిపింది. కోవిడ్ కేంద్రాలు, పడకలు పెంచామని, బాధితులు దేశంలోని ఏ ఆస్పత్రిలోనైనా చేరవచ్చని తెలిపింది. దేశంలో కరోనా పరిస్థితులపై సుమోటో స్వీకరించిన సర్వోన్నత న్యాయస్థానం.. కోవిడ్ వ్యాప్తి నియంత్రణ, వ్యాక్సినేషన్‌ ప్రక్రియలో కేంద్రం వైఖరిపై సుప్రీంకోర్టు ఒకింత అసహనం వ్యక్తం చేసిన విషయం తెలిసిందే. ఈ సందర్భంగా వ్యాక్సిన్ ధరలలో వ్యత్యాసంపై కేంద్రానికి పలు ప్రశ్నలు సంధించింది. కేంద్రం, రాష్ట్రాలకు వేర్వేరు ధరలు ఎందుకని జస్టిస్‌ డీవై చంద్రచూడ్‌ నేతృత్వంలోని ధర్మాసనం నిలదీసింది. జాతీయ వ్యాక్సినేషన్ విధానంలో 100శాతం టీకాలను కేంద్రమే ఎందుకు కొనుగోలు చేయడం లేదని ప్రశ్నించింది. కేంద్ర, రాష్ట్ర ప్రభుత్వాలకు టీకా ధరల్లో ఎందుకు వ్యత్యాసం ఉంది? ఆ మేరకు సేకరణ పూర్తిగా కేంద్రమే చేపట్టి పంపిణీ వికేంద్రీకరణ చేయవచ్చు కదా? వ్యాక్సిన్‌ తయారీ సంస్థలు డోసులు అందించే క్రమంలో రాష్ట్రాల మధ్య సమానత్వాన్ని ఎలా పాటిస్తున్నారు? జాతీయ ఇమ్యూనైజేషన్‌ కార్యక్రమం విధి విధానాలను కేంద్రం ఎందుకు పాటించట్లేదు? 18-44 ఏళ్ల మధ్య జనాభా ఎంత? వ్యాక్సిన్‌ ఉత్పత్తి పెంపులో కేంద్రం పెట్టుబడి ఎంత?’ అంటూ ధర్మాసనం కేంద్రంపై ప్రశ్నల వర్షం కురిపించింది.


By May 10, 2021 at 10:17AM


Read More https://telugu.samayam.com/latest-news/india-news/centre-file-affidvit-to-supreme-court-on-vaccine-policy-and-covid-situation/articleshow/82514772.cms

No comments