‘ప్రశ్నిస్తున్నా.. నన్ను అరెస్ట్ చేయండి’.. ఢిల్లీ పోస్టర్లపై రాహుల్ సంచలన ట్వీట్
దేశంలో కరోనా వైరస్ కట్టడిలో కేంద్ర ప్రభుత్వం ఘోరంగా విఫలమయ్యిందని ఆరోపిస్తూ ఢిల్లీ వీధుల్లో మోదీకి వ్యతిరేకంగా పోస్టర్లు వేయడం కలకలం రేపింది. మోదీని ప్రశ్నిస్తూ దేశ రాజధాని వీధుల్లో పోస్టర్లు వేసినవారిపై కేసులు నమోదుచేసిన ఢిల్లీ పోలీసులు.. 17 మందిని అరెస్టు చేశారు. ఈ అరెస్ట్‌లపై నేత రాహుల్ గాంధీ, ఇతర నేతలు తీవ్రంగా స్పందించారు. ‘‘నన్ను కూడా అరెస్ట్ చేయండి’’ అంటూ హిందీ, ఇంగ్లీషులో ట్వీట్ చేశారు. నలుపు రంగు బ్యాక్‌గ్రౌండ్‌పై తెల్లని అక్షరాలతో ‘‘మోదీ జీ మన పిల్లలకు వేయాల్సిన వ్యాక్సిన్లను విదేశాలకు ఎందుకు పంపించారు?’’ అంటూ ప్రశ్నించారు. ఢిల్లీ నగరంలో చాలా చోట్ల ఈ పోస్టర్లు అంటించినట్టు పోలీసులు చెబుతున్నారు. పోస్టర్ల వ్యవహారంపై ఫిర్యాదులు రావడంతో 21 కేసులు నమోదు చేశారు. ఢిల్లీలోని రోహిణి, ఈశాన్య ఢిల్లీ, ఔటర్ ఢిల్లీ, ద్వారక, పశ్చిమ ఢిల్లీ, ఉత్తర ఢిల్లీ పరిధిలో కేసులు నమోదు చేసినట్లు పోలీసులు పేర్కొన్నారు. పోస్టర్ల వెనక ఎవరున్నారనే దిశగా విచారణ చేపట్టామని, ప్రభుత్వ ఆదేశాలపై అవిధేయత చూపినందుకు సెక్షన్ 188 కింద, ప్రజా ఆస్తులకు నష్టం కలిగించిన సెక్షన్ల కింద కేసులు నమోదయ్యాయి. దేశంలో కరోనా వైరస్ రోజువారీ కేసులు, మరణాలు రికార్డుస్థాయిలో నమోదవుతున్నాయి. ప్రపంచంలోనే మరే దేశంలో లేని విధంగా రోజుకు మూడు లక్షలకుపైగా కేసులు, 4వేలకుపైగా మరణాలు రోజూ చోటుచేసుకుంటున్నాయి. మధ్యప్రదేశ్, ఉత్తర్ ప్రదేశ్, గుజరాత్ వంటి రాష్ట్రాల్లో మరణాలను అధికారులు తక్కువగా చేసి చూపుతున్నారనే ఆరోపణలు వెల్లువెత్తుతున్నాయి. వందలాది మృతదేహాలు గంగా నదిలో కొట్టుకొస్తుండగా.. నదీ తీరంలో ఇసుకలోనే ఖననం చేసిన ఘటనలు వెలుగుచూస్తున్నాయి. కరోనా కట్టడిలో ఘోరంగా విఫలమైందని మోదీ ప్రభుత్వం తీవ్ర విమర్శలు ఎదుర్కొంటోంది. కనీసం శ్మశానాల్లో ఖాళీలేక గే శవాలు బారులుదీరుతున్నాయని సోషల్ మీడియాలో పెద్ద దుమారమే కొనసాగుతోంది. తాజాగా వ్యాక్సినేషన్ ప్రక్రియపై కూడా విమర్శలు వస్తున్నాయి. మన దేశంలో వ్యాక్సినేషన్‌కు టీకాలను ఉంచకుండా విదేశాలకు ఎగుమతి, పలు దేశాలకు ఉచితంగా పంపిణీ చేయడం పట్ల దుమారం రేగుతోంది.
By May 16, 2021 at 03:55PM
No comments