తల్లికి నెగెటివ్, కడుపులో బిడ్డకి పాజిటివ్.. అవాక్కైన వైద్యులు

తల్లికి వ్యాధి సంక్రమించినా.. వైరస్ సోకినా అది కడుపులో ఉన్న బిడ్డకు సోకకుండా ఆధునిక వైద్యశాస్త్రం రక్షణ కల్పిస్తోంది. ఎన్నో రకాల వ్యాధులను గర్భస్థ శిశువుకు సోకకుండా కాపాడుతోంది. అయితే కడుపులో మోస్తున్న తల్లికి లేకుండా.. గర్భంలో ఉన్న శిశువుకు వైరస్ సోకిన అత్యంత ఆశ్చర్యకర సంఘటన వెలుగుచూసింది. ప్రసవం కోసం వచ్చిన మహిళకు కరోనా నెగెటివ్ రాగా.. అప్పుడే పుట్టిన బిడ్డకు పాజిటివ్ రావడం చూసి వైద్యులే అవాక్కయ్యారు. ప్రధాన మంత్రి నరేంద్ర మోదీ ప్రాతినిధ్యం వహిస్తున్న వారణాసిలో ఈ షాకింగ్ ఘటన వెలుగుచూసింది. వారణాసికి చెందిన అనిల్ ప్రజాపతి నెలలు నిండిన తన భార్య సుప్రియను బెనారస్ హిందూ యూనివర్సిటీ పరిధిలోని ఎస్‌ఎస్ ఆస్పత్రికి ఈ నెల 24న తీసుకెళ్లాడు. ఆమెకు ప్రసవం చేసే ముందు కరోనా నిర్ధారణ పరీక్షలు నిర్వహించగా నెగెటివ్ రిపోర్ట్ వచ్చింది. ఆ మరుసటి రోజే ఆమెకు ప్రసవం చేశారు. పండంటి బిడ్డ జన్మించాడు. శిశువుకు కూడా కరోనా నిర్ధారణ పాజిటివ్ పరీక్షలు చేయడంతో షాకింగ్ విషయం వెల్లడైంది. అప్పుడే పుట్టిన శిశువుకు కరోనా పాజిటివ్ అని తేలింది. తల్లికి లేకుండా బిడ్డకు వైరస్ పాజిటివ్ రావడంతో వైద్యులు ఆశ్యర్యపోయారు. తన భార్యను ఆస్పత్రికి తీసుకొచ్చిన రోజు ఆర్టీపీసీఆర్ నిర్ధారణ పరీక్షలు చేశారని.. ఆమెకు నెగెటివ్ వచ్చిందని అనిల్ ప్రజాపతి తెలిపారు. మరుసటి రోజు ప్రసవం అనంతరం బిడ్డ శాంపిల్స్ తీసుకున్నారని.. ఆర్టీపీసీఆర్ టెస్ట్‌లో పాజిటివ్ అని వచ్చిందన్నారు. రిపోర్టులు తప్పుగా వచ్చి ఉంటాయని భావిస్తున్నట్లు చెప్పారు. అయితే ఈ విషయంపై ఆస్పత్రి సూపరింటెండెంట్ విచారణకు ఆదేశించారు. కొద్దిరోజుల తర్వాత మరోమారు తల్లీబిడ్డలకు నిర్ధారణ పరీక్షలు నిర్వహించనున్నట్లు చెప్పారు. ప్రస్తుతం తల్లీబిడ్డ క్షేమంగా ఉన్నారు. Also Read: https://telugu.samayam.com/latest-news/india-news/covaxin-mystery-6-crore-shots-ready-2-crore-given-where-the-rest/articleshow/83032702.cms

By May 28, 2021 at 05:11PM

Read More https://telugu.samayam.com/latest-news/india-news/covid-positive-baby-born-in-varanasi-mother-tested-negative/articleshow/83035203.cms