ఢిల్లీలో లాక్‌డౌన్ పొడిగింపు.. సత్ఫలతాలిస్తోందన్న సీఎం కేజ్రీవాల్
దేశ రాజధాని ఢిల్లీలో కరోనా కట్టడికి విధించిన లాక్‌డౌన్‌ను మరో వారం రోజులు పొడిగిస్తూ నిర్ణయం తీసుకున్నారు. మే 17 వరకు లాక్‌డౌన్ అమల్లో ఉంటుందని ఢిల్లీ ముఖ్యమంత్రి ఆదివారం ప్రకటించారు. గత నెల 19 నుంచి ఢిల్లీలో లాక్‌డౌన్ కొనసాగుతోంది. తొలుత వారం రోజుల లాక్‌డౌన్ ప్రకటించిన కేజ్రీవాల్.. దాన్ని వారం వారం పొడిగిస్తూ ఉన్నారు. సోమవారం ఉదయంతో లాక్‌డౌన్ ముగియనుండగా.. మళ్లీ మరో వారం పొడిగించారు. ఈ సందర్భంగా ఢిల్లీ సీఎం కేజ్రీవాల్ మాట్లాడుతూ.. లాక్‌డౌన్ సత్ఫలితాలనిస్తోందని అన్నారు. లాక్‌డౌన్ విధించిన తర్వాత ఢిల్లీలో పాజిటివిటీ రేటు 35 శాతం నుంచి 23 శాతానికి తగ్గిందన్నారు. ఒక దశలో రోజూ 25వేలకుపైగా కేసులు వచ్చాయని, ప్రస్తుతం 17వేలకు తగ్గిందని కేజ్రీవాల్ పేర్కొన్నారు. పాజిటివిటీ రేటు తగ్గినా నిర్లక్ష్యం పనికిరాదని, అందుకే లాక్‌డౌన్ పొడిగించాలని నిర్ణయం తీసుకున్నామని అన్నారు. 23 శాతానికి తగ్గినా ఇది ప్రమాదకరంగానే ఉందని, పూర్తిగా వైరస్ గొలుసు విచ్ఛిన్నం చేయాలని వైద్యులు సూచించారు. ‘‘లాక్‌డౌన్ సమయాన్ని ఆరోగ్య మౌలిక సదుపాయలను మెరుగుపరచడానికి సద్వినియోగం చేసుకుంటాం.. ముఖ్యంగా ఢిల్లీలో ఆక్సిజన్ కొరత తీవ్రంగా ఉంది... కేంద్రం సహకారంతో ప్రస్తుతం పరిస్థితి కొంత పర్వాలేదు’’ అని కేజ్రీవాల్ అన్నారు. గత నెల ఢిల్లీలో రాకెట్ వేగంతో కోవిడ్ కేసులు నమోదయ్యాయి. దీంతో అప్రమత్తమయిన ఢిల్లీ ప్రభుత్వం లాక్‌డౌన్ విధించింది. ఆక్సిజన్ కొరతపై ఢిల్లీ హైకోర్టు, సుప్రీంకోర్టులు సీరియస్‌గానే స్పందించిన విషయం తెలిసిందే. కేంద్రంపై న్యాయస్థానాలు తీవ్ర ఆగ్రహం వ్యక్తం చేశాయి. ఆక్సిజన్ సరఫరా, పంపిణీకి 12 సభ్యులతో జాతీయస్థాయి టాస్క్‌ఫోర్స్ ఏర్పాటుచేయాలని కేంద్రాన్ని సుప్రీంకోర్టు ఆదేశించింది. దేశవ్యాప్తంగా పలు రాష్ట్రాల్లో పడకలు, ఆక్సిజన్, ఔషధాల కొరత తీవ్రంగా వేధిస్తోంది. అలాగే, సరిపడేన్ని టీకాలు అందుబాటులోకి లేకపోవడంతో వ్యాక్సినేషన్ ప్రక్రియ కూడా నత్తనడకన సాగుతోంది. దేశంలో కరోనా విజృంభణ ఏమాత్రం తగ్గడం లేదు. నాలుగు రోజుల నుంచి వరుసగా రోజువారీ కేసులు 4 లక్షలు దాటుతున్నాయి. మరణాలు కూడా రెండో రోజు వరుసగా 4వేల నమోదయ్యాయి.
By May 09, 2021 at 01:03PM
No comments