శర్వానంద్ సోనోవాల్‌కు షాక్.. అసోం కొత్త సీఎంగా హిమాంత బిశ్వ శర్మ

అసోం కొత్త ముఖ్యమంత్రి ఎవరనే సంధిగ్దతకు తెరపడింది. ప్రస్తుత సీఎం శర్వానంద్ సోనోవాల్‌ను బీజేపీ పక్కనబెట్టింది. ఆర్థిక మంత్రి హిమంత బిశ్వ శర్మను సీఎం అభ్యర్థిగా ఖరారు చేసింది. ఆదివారం జరిగిన బీజేపీ శాసనసభాపక్ష సమావేశంలో హిమంత బిశ్వ శర్మను ఆ పార్టీ ఎమ్మెల్యేలు తమ నేతగా ఎన్నుకున్నారు. హిమాంత పేరును ప్రతిపాదించగా.. ఇతర ఎమ్మెల్యేలు మద్దతు తెలిపారు. త్వరలోనే సీఎంగా ఆయన ప్రమాణస్వీకారం చేయనున్నారు. ఇటీవల ఎన్నికల జరిగిన రాష్ట్రాల్లో కొత్త ప్రభుత్వాలు ఏర్పడగా.. అసోంలో మాత్రం సీఎం పదవికి ఇద్దరు నేతల మధ్య గట్టిపోటీ నెలకునడంతో జాప్యం జరుగుతోంది. కొత్త సీఎం ఎంపికపై బీజేపీ అధిష్ఠానం పలు దఫాలుగా సమావేశాలు నిర్వహించింది. శర్వానంద సోనోవాల్‌, హిమంత బిశ్వశర్మలు సీఎం పీఠం కోసం పట్టుబట్టడంతో ఇద్దర్నీ ఢిల్లీకి పిలిపించి జాతీయ అధ్యక్షుడు జేపీ నడ్డా, కేంద్ర హోంమంత్రి అమిత్‌ షాలు పలు దఫాలుగా చర్చించారు. విడివిడిగా.. ఆ తర్వాత ఇద్దరితోనూ సమావేశమయ్యారు. ఈ విషయంలో హిమంత వెనక్కు తగ్గకపోవడంతో సీఎం అభ్యర్థిగా ఆయననే ఖరారు చేశారు. కాంగ్రెస్‌లో సీఎం పదవి దక్కకపోవడంతో హిమంత శర్మ 2016 ఎన్నికలకు ముందు బీజేపీలో చేరారు. అదే పరిస్థితి ఇప్పుడు మళ్లీ తలెత్తడాన్ని ఆయన జీర్ణించుకోలేకపోయారు. బీజేపీ నుంచి గెలిచిన ఎమ్మెల్యేలలో కనీసం 30 మంది శర్మకు మద్దతిస్తున్నారు. ఈ పరిస్థితుల్లో హిమంత వైపే బీజేపీ అధిష్ఠానం మొగ్గుచూపింది. బీజేపీ ఎక్కువ సీట్ల సాధించిన ఎగువ అస్సాం నుంచి ఎన్నికైన ఎమ్మెల్యేల్లో ఎక్కువ మంది సోనోవాల్‌కు మద్దతుగా ఉన్నారు. బీజేపీలో పరిణామాలను నిశితంగా గమనిస్తోన్న కాంగ్రెస్‌ పార్టీ.. హిమాంతకు గాలం వేయడానికి కూడా ప్రయత్నించింది. ఆయన బీజేపీ నుంచి బయటకు వస్తే తమ పార్టీ ఎమ్మెల్యేలంతా మద్దతు ఇస్తారని ప్రకటించింది. కాంగ్రెస్ ప్రకటనతో బీజేపీ అప్రమత్తమయ్యింది. సోనోవాల్‌కు సర్దిచెప్పి హిమాంత బిశ్వ శర్మనే చివరకు సీఎంగా ఎంపిక చేసింది. మొత్తం 126 స్థానాలున్న అసోం అసెంబ్లీలో 75 చోట్ల ఎన్‌డీఏ కూటమి విజయం సాధించింది. ఇందులో బీజేపీ 60 సీట్లను గెలిచింది. కాంగ్రెస్ కూటమి 51 స్థానాలను దక్కించుకుంది.

By May 09, 2021 at 01:52PM

Read More https://telugu.samayam.com/latest-news/india-news/bjp-leader-himanta-biswa-sarma-to-be-assams-new-chief-minister/articleshow/82495425.cms