Breaking News

లాక్‌డౌన్‌లోనూ ఆకలి తీరుస్తున్న ‘అమ్మ’ క్యాంటీన్లు.. సీఎం స్టాలిన్‌పై ప్రశంసలు


దివంగత జయలలిత పేరుతో ప్రారంభమైన ‘అమ్మ’ క్యాంటీన్లు పేదల ఆకలి తీరుస్తున్నాయి. నిరుపేదలే లక్ష్యంగా తక్కువ ధరకు ఆహారం విక్రయించడంతో వీటికి అతితక్కువ సమయంలో ఆదరణ పెరిగింది. చెన్నై కార్పొరేషన్‌ పరిధిలో 2013లో 207 అమ్మ క్యాంటీన్లను అప్పటి ముఖ్యమంత్రిగా ఉన్న జయలలిత ఏర్పాటు చేశారు. ఆమె చనిపోయినా అన్నాడీఎంకే ప్రభుత్వం ఆ క్యాంటీన్లు సమర్థంగా నిర్వహిస్తూ వచ్చింది. ప్రస్తుతం చెన్నైలో 400కు పైగా క్యాంటీన్లు, రాష్ట్రవ్యాప్తంగా 700కుపైగా పని చేస్తున్నాయి. గతేడాది కరోనా లాక్‌డౌన్‌ సమయంలో కొన్ని క్యాంటీన్లలో ఉచితంగా ఆహారం అందించడంతో పేద ప్రజల ఆకలి తీరింది. అయితే 2019-20లో క్యాంటీన్ల ఆదాయం అంతకు మునుపు ఆర్థిక సంవత్సరంతో పోలిస్తే రూ.3 కోట్లు తక్కువగా వచ్చినట్లు అధికారులు తెలిపారు. కొన్ని సంవత్సరాలుగా నష్టాల్లో ఉన్నా ప్రభుత్వం వీటిని కొనసాగిస్తోంది. దీంతో చెన్నై కార్పొరేషన్‌ కమిషనర్‌ విజ్ఞప్తి మేరకు అమ్మ క్యాంటీన్‌లకు సంబంధించి ప్రత్యేక సంస్థను ఏర్పాటు చేసేందుకు ప్రభుత్వం అనుమతి ఇచ్చింది. జయలలిత పేరిట ఉన్న పథకం కావడంతో అమ్మ మరణానంతరం కూడా నిన్నటి వరకు అన్నాడీఎంకే ప్రభుత్వం నిర్వహణకు మొగ్గుచూపింది. చెన్నైలోని 200 డివిజన్లలో ఒక్కో దానికి రెండు చొప్పున 400 క్యాంటీన్లు ఉన్నాయి. ఈ క్యాంటీన్లలో ఉదయం ఇడ్లీ రూపాయికి, పొంగల్‌ రూ.5కు, మధ్యాహ్నం సాంబార్‌ అన్నం, పుదీనా రైస్‌ రూ.5కు, పెరుగన్నం రూ.3కు విక్రయిస్తున్నారు. రాత్రి వేళల్లో రెండు చపాతీలు రూ.3కు ఇస్తున్నారు. పేదల కోసం ఏర్పాటు చేసిన ఈ క్యాంటీన్లలో భవన నిర్మాణ కార్మికులు, రోజువారీ కూలీలు, నిరుపేదలు కడుపు నింపుకుంటున్నారు. తాము అధికారంలోకి వస్తే కలైంజ్ఞర్‌ క్యాంటీన్లు ఏర్పాటు చేస్తామని డీఎంకే పార్టీ ప్రకటించింది. ముఖ్యమంత్రిగా పదవీ బాధ్యతలు వెంటనే అమ్మ క్యాంటీన్ల పేరు మార్పు లేదా వాటిని తొలగించడం చేస్తారని చాలామంది భావించారు. చెన్నై ముగప్పెయిర్‌లో గత వారం అమ్మ క్యాంటీన్‌పై ఇద్దరు డీఎంకే కార్యకర్తలు దాడి చేశారు. ఆహార పదార్థాలతోపాటు కూరగాయలను కూడా చెల్లాచెదురు చేశారు. ఈ నేపథ్యంలో వారిని పార్టీ నుంచి బహిష్కరిస్తున్నట్లు డీఎంకే అధినేత, సీఎం స్టాలిన్‌ ప్రకటించారు. దీనిపై వెంటనే స్పందించిన ఆరోగ్యశాఖ మంత్రి సుబ్రమణియన్‌ మాట్లాడుతూ.. సంబంధిత వ్యక్తులను పార్టీ నుంచి బహిష్కరించాలని స్టాలిన్‌ సూచించారని, తప్పు చేస్తే పార్టీ వారినైనా ఉపేక్షించవద్దని స్టాలిన్‌ సూచించినట్లు తెలిపారు. తొలగించిన బోర్డులను యథాస్థానంలో ఏర్పాటు చేయాలని ఆదేశించడంతో ఈ వ్యవహారాన్ని సమసిపోయేలా చేసి స్టాలిన్ అందరి మన్ననలు అందుకున్నారు. గతంలో కరుణానిధి, జయలలితల మధ్య పచ్చగడ్డేస్తే భగ్గుమన్న సందర్భాలు ఉన్నాయి. ప్రస్తుతం కరోనా నేపథ్యంలో పేద ప్రజల ఆకలి తీర్చేందుకు అమ్మ క్యాంటీన్లు కొనసాగిస్తున్నట్లు, అందుకు అవసరమైన నిధులు విడుదల చేస్తామని స్టాలిన్ ప్రకటించారు. ఆయన నిర్ణయంపై రాష్ట్ర ప్రజలతో పాటు ప్రతిపక్షాలు హర్షం వ్యక్తం చేస్తున్నాయి.


By May 12, 2021 at 11:24AM


Read More https://telugu.samayam.com/latest-news/india-news/dmk-government-continues-amma-canteens-in-lockdown-people-praises-tamil-nadu-cm-mk-stalin/articleshow/82568018.cms

No comments