దేశంలో కరోనా మహోగ్రరూపం.. 4 లక్షల మార్క్ చేరిన రోజువారీ కేసులు
దేశంలో మహమ్మారి మరింత కల్లోలం రేపుతోంది. రోజువారీ పాజిటివ్ కేసులు, మరణాల్లో కొత్త రికార్డులు నమోదవుతున్నాయి. ఏప్రిల్‌లో రోజువారీ కేసులు మూడు లక్షల మార్క్ దాటియేగా.. మే ప్రారంభంలో ఆ రికార్డు చెరిగిపోయింది. దేశవ్యాప్తంగా గడచిన 24 గంటల్లో 402,014 కేసులు నమోదుకాగా.. మరో 3,524 మంది ప్రాణాలు కోల్పోయారు. ఇప్పటి వరకూ మరే దేశంలోనూ ఇంత పెద్ద సంఖ్యలో పాజిటివ్ కేసులు నమోదుకాలేదు. సరికాదా ఇకపై కూడా ఈ సంఖ్యలో బయటపడవు. రెండో దశలో మహమ్మారి దావానంలా వ్యాపిస్తూ దేశాన్ని చాపచుట్టేస్తోంది. కోవిడ్ రోగులతో ఆస్పత్రుల్లో పడకలన్నీ నిండిపోతుంటే.. ఆక్సిజన్ కొరత తీవ్రంగా వేధిస్తోంది. ఆక్సిజన్ అందక వందలాది మంది ప్రాణాలు గాల్లో కలిసిపోతున్నాయి. వైద్య, ఆర్ధిక సహాయం కోసం సోషల్ మీడియాలో అభ్యర్థనలు నిండిపోతున్నాయి. భయంతో మానవ సంబంధాలు అత్యంత అమానవీయంగా మారుతున్నాయి. ఇంత జరుగుతున్నా పాలకులు మాత్రం కంటితుడుపు చర్యలు తీసుకని.. ప్రజల ప్రాణాలను కాపాడటంలో అలసత్వం ప్రదర్శిస్తున్నారు. దేశంలో మహమ్మారి భయోత్పతం సృష్టిస్తుంటే చోద్యం చూస్తున్నారు. అన్ని రాష్ట్రాల్లోనూ రికార్డుస్థాయిలో కేసులు, మరణాలు చోటుచేసుకుంటున్నాయి. మహారాష్ట్రలో గత నెల రోజులు నుంచి 60వేలకుపైగా కేసులు నమోదవుతున్నాయి. ప్రస్తుతం ఆ రాష్ట్రానికి కర్ణాటక చేరువలో ఉంది. గడచిన 24 గంటల్లో మహారాష్ట్రలో 62,919 మందికి వైరస్ నిర్ధారణ కాగా.. 828 మంది బలయ్యారు. ఆ తర్వాత కర్ణాటకలో 48,296 మందికి వైరస్ నిర్ధారణ కాగా..217 మంది ప్రాణాలు కోల్పోయారు. కేరళలో 37వేలకుపైగా కేసులు, ఉత్తర్ ప్రదేశ్‌లో 34 వేల మందికిపైగా కొత్తగా వైరస్ బారినపడ్డారు. ఢిల్లీలో 27 వేల కేసులు, తమిళనాడులో 18వేల కేసులు, ఆంధ్రప్రదేశ్, బెంగాల్, రాజస్థాన్‌లో 17వేల కేసులు బయటపడ్డాయి. ఢిల్లీ, ఉత్తర్ ప్రదేశ్‌లో కరోనా మరణాలు ఆందోళనకరంగా ఉన్నాయి. గడచిన 24 గంటల్లో దేశ రాజధానిలో మరో 375 మంది, యూపీలో 332 మంది కరోనాతో ప్రాణాలు కోల్పోయారు. కరోనా మృతుల అంత్యక్రియలకు శ్మశనాలు కూడా ఖాళీలేవు. ఢిల్లీలో అయితే రెండు మూడు రోజులు వేచిచూసే పరిస్థితి నెలకుంది. అస్పత్రుల్లోని మార్చురీల వద్ద కోవిడ్ మృతదేహాలు గుట్టలుగా పడి ఉన్నాయి.
By May 01, 2021 at 10:16AM
No comments